如果你既人生好似打機一樣……: 2.2, 累隊友既人通常都無乜自覺
相信搏得我O FUCK一句既真係得呀方一個人，我唔知佢係邊到搵到D勇氣出黎夠膽死自願參戰。
一個連呀婆都不如既後生仔，睇怕只會捱打……
心裡面講左句O FUCK既應該唔止我一個，我地C班依面完全係一片死寂，雖然水牛一直都好鼓勵我地脫毒，但係佢絕對唔想搵場牙較戰黎較飛。
而另一邊D女同學就反應更加大，我聽到好多呀方既壞話，但係我唔知呀方選擇性失聰定係真係面皮厚成咁，佢完全面不改容。
「水牛，波仔，我地已經唔知係多少戰場上面並肩過，事關5C面子既重要關頭，我一定唔會離棄你地。」會唔會係因為面子關係所以你先唔應該參戰？
「咦，好少有喎，連呀方都咁主動；咁即係你地已經夠八個人啦？咁準備開始架喇。」
仆街，連林蛇都聽到，睇黎真係無灣轉！
「呀方，就睇下你今次救唔救得番你既面子啦！」依個時侯得呀飯會若無其事咁拍呀方既肩頭比咁大既信心佢，而我同水牛兩個正因為了解呀方先信佢唔落。
玩信長果陣，佢永遠係第一個連魔免都唔開衝入敵陣既人，而我同水牛負責執手尾；無玩信長既人可能會唔明依個比喻，簡單Ｄ黎講就係無戴套打真軍，但係我同水牛就做左果粒事後丸。
個玩法係，同一時間場上面最多只可以有五個，剩低三個做後備待命。
場區既樣可以參考番維基既依幅圖
正中間既兩個格仔就係內場，而內戰外面既就係另一隊既外場。
即係假設我地丟個波過去，就算打唔中人，如果佢地接唔到而比我地既外場接到，就依然係我地既回合。
而係內外場上面放幾多個人就完全自由，總之唔多過五個就得。
內場既人只要比手以外既部位被球擊中就要出局，然後再換後備上場。
當人數小於五個既時侯，就要打小D人，總之就要戰至最後一兵一卒。
我同水牛傾完之後都認為要將比較弱既朱純真、桑妮同埋呀方收埋，希望我地可以不費一兵一卒完場；但係呀飯有另一番睇法。
「我地應該一早就將弱人拎出黎。」
我同水牛都覺得好奇怪，但係仔細一諗又覺得呀飯佢真係講得好岩。
「天生我材必有用，就算佢地能力有限，但只要佢地頂得幾ROUND，比足夠既時間我地觀察同埋拖累對方既戰力，佢地依然好有用。」呀飯解釋：「而且……」呀飯同水牛咬耳仔，我完全唔知佢地講乜，同時我留意到隔離既朱純真表情開始改變。
鐘意既男仔同第個女仔咁親近，我都唔怪得佢會咁心酸。
水牛聽完之後個表情唔係幾好，但最後佢都點左頭，此時呀飯即刻大力一拍水牛背脊。
「好，各位準備開戰。」水牛說道。
「桑妮，水牛同埋我會做後備。」呀飯同我地交代戰略，三個被認為弱既隊員，有兩個會以首發上陣。
由於我平時運動不足，所以我自告奮勇去做外場，而呀方、鞏偉、朱純真仲有MANDY會係內場。
「嘿嘿，等本大爺CARRY你地啦！」呀方做晒全套熱身運動成個戰鬥格咁，我依家只係希望佢唔好CARRY對面隊咋……
所有人開始埋位，對面亦都係四前一後既策略，我揀做外場既另一個原因係我既魔眼能力可以好好觀察對面弱點所在。
D班四男四女既組合，估計女既威力唔高，只會係炮灰；反而男仔果面我比較擔心。
四個男仔入面，有三個特別高大，而剩低果個相對非常的骰，對坐擁八大金剛既D班黎講會出個睇起上黎咁毒既人，真係好奇怪。
對方既首發係兩個金剛再加兩隻狗乸係內場，而剩低果隻猩猩就係外場。
單係睇依兩個前場金剛粗過壘球棍既一對腳瓜，都估到佢地兩個係足球校隊，剩低兩個女仔望仔多過望波，我睇佢地兩個都只係個廿一層既魚柳包 － 即係多左廿舊魚。
水牛同隔離班代表去左林蛇到擲公字，我地班可以發球。
而發球既重任交左比鞏偉，佢已經係我地場上最靠得住果個。
鞏偉發球前托一托眼鏡，然後望向係後備席既水牛，同一時間水牛同呀飯傾緊計，完全無留意到鞏偉既舉動。
發球了！鞏偉瞄準既係狗乸A，而依個時侯狗乸A仲係到目及緊金剛，面對咁既情況真係用屎忽諗都知狗乸A仆硬街。
「哎呀……好痛呀……」果然，狗乸A應聲倒地，然後發出姣到爆既聲音，而金剛們亦都扮晒紳士咁去扶佢：「唔緊要啦，你去後面休息一下。」「哦…… 」
咁撚姣都頂得順，真係姣婆遇著姿粉客……
此時，5D班既女仔鼓譟聲此起彼落：「搞錯呀，咁樣蝦女仔！」
依班港女係要求男女平等既同時，亦都唔會放棄作為女仔擁有既「權利」，輸打嬴要既仆街就係依種人。
然後呀方又發功：「嘿嘿，無係戰場上受傷既覺悟既人無資格做一個戰士。」我唔知佢係邊套動漫搵依句台詞出黎，但依家剩係知道佢好戇尻，亦都無人理佢。
而當事人鞏偉爹都無爹一聲，佢只係托托眼鏡，嘴角微微向上揚，睇起上黎十分之奸，十足十A片入面既鬼畜西裝佬咁。
D班換出黎既係炮灰B，對戰局影響唔大，但係依家發球權就落左係佢地手上，到底佢地會瞄邊個呢？
發球既係金剛A，見佢成隻腳完全無毛，姑且就稱佢為光管腳啦。
《光管腳，小頭目級角色，
健康度Ａ、攻擊力Ａ、防禦力Ｃ、智慧Ｃ、幸運度Ｃ、耐性Ｂ、靈活度Ｃ……
總體評價Ｂ，若需要詳細評價請繼續……》
果然係體育健將，但係平時踢開波既佢用手開球有無力呢……
佢開球喇！個波既速度非常之快，而瞄準既正正係毒撚方，睇黎頭先佢講既野得罪左D班。
唉，呀方你都係早日收山啦，我低頭單手掩住眼，靜待呀方離場。
「鞏偉出局！」林蛇以混厚既聲音說道。
WTF?
完全唔知道發生咩事既我張開眼，見到呀方趴左係地上面，而企係後面既鞏偉就好愕然，個波仲係佢腳邊碌黎碌去。
原來呀方失驚無神爆SEED避到，而睇死呀方實避唔到既鞏偉就大意失賓周。
今次柒成咁真係有排比人恥笑，對咁要面既鞏偉黎講真係好大打擊。
而另一面，避到波既呀方就企番起身，以勝利者既姿態高舉雙手高呼。
我覺得呀方已經唔可以用戇尻黎形容，佢已經升左LV變成戇尻尻。
講真，對我黎講我寧願出局既係呀方，而D班意外拿下鞏偉，真係跌左個橙，執左舊金，賺到笑。