我去左間 Cafe 打工 , 想溝入面個 Mk 妹女同事: 做乜都好，記住唔好打女人。
我生來本就怕事，與人爭吵更是從未有過，
此時對文靜語氣之重，我說著自己也是心驚，
但想她對人不對事，任由小草放縱自己，這口氣，叫我怎麼嚥得下去？
「你根本就唔明 …… 」文靜別過了頭去，不正眼看著我。
「咩唔明啊，我明啊，我就係明，我明你對人唔對事，
你把口就話人地鍾意點，我地唔應該去阻攔，
但係你呢，口講一套做一套，你咪又係去阻止牛奶妹，
你 …… 你叫我點聽你講啊！」
我說著想起小草一晚跟了兩個男的走，一顆心都傷透了。
「牛奶妹仲細啊，仲有得救，小草點同啊？」文靜忍不住說。
「有咩唔同啊？小草咪又係同你同我一樣咁大，
但係你有冇試過去幫佢，關心佢啊？你咁 …… 咁樣點做人朋友啊！」
我怕自己的措詞太過嚴厲，每說一字以前都先想過幾遍。
「佢玩左咁多年，你講一兩句佢就會聽？你唔好天真啦，」文靜冷笑。
「點 …… 點都要試啊！唔試過點知唔得啊？」我反問。
「我咪話應承你教你去追佢囉，你仲有咩滿意姐，」文靜說。
「我係講緊個晚啊，個晚點解你可以咁狠心啊，
一個人就係見到個細路仔要跌落井，都會有惻隱之心啦，
但係你睇住小草 …… 小草佢 …… 」我實在說不出那麼不堪的事。
「睇住佢去做公廁啊？佢去做公廁我都要有惻隱之心，
咁我咪好唔得閒？」文靜冷嘲，
我聽著只覺她說得過份，如此出言也太無禮了，我氣得緊緊的握起拳頭來，
「咩公廁啊？佢係你朋友啊，你點可以咁話佢啊？」我怒道。
「佢唔係人人都上得？你自己問佢啦，佢好享受添，佢不知幾鍾意比仔上啦，
咪話我唔教精你啦，一個人如果連自己都唔自愛，
就算比你追到佢又點啊？佢又可以有幾愛你啊？你唔好再發夢啦！」文靜說。
她如此沾污小草的名聲，我聽著怒不可遏，
一時衝動起來，那個緊握著的拳頭便不由自主的要向文靜揮去。
那知我才把拳頭向後揮動，即覺撞上了甚麼軟綿綿的，
接著是「咚」一聲，只覺有甚麼在我身後倒下了。
就是如此一個變故，我才驚覺自己要對文靜動粗，這可怎麼了得？
「我 …… 我 …… 我無心要打你啊 …… 係 …… 係意外啊 …… 」我顫聲道。
文靜嚇得目瞪口呆，只是怔怔的看著我背後，口裡緩緩吐出數字，
「你 …… 你都無打中我，我 …… 我講野又係過份左既，
不過 …… 不過你 …… 你睇下後面先啦 …… 」
文靜是受驚了，說起話來都斷斷續續。
我依她所言，回首一顧，
卻見一隻穿著女僕裝的喵喵怪，四腳朝天，就倒在我正後方。
「咦，點解佢會係度既 ……. ？」我看著一驚。
「你 …… 你打中左佢囉 …… 」文靜仍未回復過來。
「我 …… ？」我想自己剛才激動得想要揮拳向文靜打去，
一下無情力，威力確是不可估量，也幸得這隻喵喵怪在我身後受了這一擊，
不然文靜可要香消玉殞，待會我還是要好好感謝他才是。
於是我趕忙的蹲下來，察看那喵喵怪的傷勢，
「喂，喂，喵喵怪，你有冇事啊？」
我連忙在他身上推了兩下，只覺他那件套裝實在厚實得很。
他也不答我，只是不斷的擺動著四肢，
我看著不明用意，便乾脆把他的頭套脫了下來。
「你 …… 你有冇事啊 …… ？對唔住啊 …… 我無心架 …… 」我又說。
「我 …… 我 ……. 扶起我！！！」裡頭的是那個油頭粉面的三弟。
「係喎係喎，」說著我伸手想要將他扶起來，
只覺他那件套裝實在笨重得很，也難怪他剛才落得四腳朝天的窘態。
「好彩Mark哥係要我派下傳單姐，唔係啊，著住呢件野，熱都熱死啦，」
我心裡暗暗慶幸，想洗碗已是很丟臉的工種，但也總比扮公仔要好。
「你有冇事啊？」我將那隻喵喵怪扶起來後問。
「你好地地做咩打我啊？」他想搔搔腦袋，
但一隻手此時換上了一隻貓掌，那裡做得來？
「唔係啊，我都唔知你係度，你點解會落左黎既？」我又問。
「我幫老細佈置完上面咪落黎囉，點知一落黎就比你打左一拳啦，
你怕我溝左你女朋友都唔洗咁啊，」他皺皺眉。
「唔係啊，佢 …… 」我看了看文靜，「佢唔係我女朋友啊，你唔好亂講野添啊，」
「咁又係，你話過小月係你女朋友，呢件大波怪點都唔夠小月好，」他說。
「哎呀，你都誤會左啦，我都唔係小月男朋友，」我忙著解釋，「其實個日 ……
個日我都係臨時臨急比人捉左出去頂住數先咋，」
我如此不打自招，小月是要又惹上麻煩了，
但想黃金屋他現在每日垂頭喪氣的，我把事實告知，說不定能幫上一把。
「你講真既？！」他兩隻喵喵怪肉掌揮來揮去，很是高興。
「係啊，呃左你地咁耐，係我唔岩啦，」說謊總也是不對。
「唔怕啊唔怕啊，哈哈，」他不怒反笑？「你跟我上去同我二哥講清楚，
我就唔怪你，行啦行啦，」他催促著，一隻肉掌又在我後腦拍了幾下。
「好啦好啦，」臨行前我不忘向文靜看了一眼，
她似乎也跟我心有靈犀，我們四目正好接上。
「你 …… 你上去順便拎支筆落黎啦，」文靜說。
「拎支筆？」我聽著不明所以。
「叫你做就做啦！」她說，一邊又搶過我手上的傳單，從新開始派發著。