我去左間 Cafe 打工 , 想溝入面個 Mk 妹女同事: 影相定影波啊？

回得咖啡店，場內已換上一大堆的寵物小精靈佈置，
 
想不到才幾個小時，一間咖啡店已然改頭換面，
 
跟一個星期前初見已是天壤之別，但這一個星期以來，我又得到甚麼了嗎？
 
不，不，其實交到文靜、小月她們幾個朋友也好啊，
 
三人行必有我師，其中的得著不過是我未覺而已。
 


如此想著，喵喵怪已領我到他那個扮演著比卡超的二哥黃金屋身前，
 
「喂，你幫佢除左個頭套啦，」他說，一隻肉掌又在我腦後舞動。
 
我依他所說替黃金屋脫了，只見裡頭仍是一張頹喪的臉，
 
若這不過是由我一個無傷大雅的謊言引起，可真會叫我過意不去。
 
「二哥，我幫你問清楚啦，佢根本唔係小月男朋友啊，佢扮架咋，
 


喂，你自己講啦，」
 
我屈服在他貓掌的淫威之下，終於把真相一五一十的告知了，
 
我本道他聽過後心情是要轉好了，
 
豈料他還是一臉沮喪，似乎那日的打擊真的很大。
 
「算啦，無用架啦，就算佢唔係小月男朋友，小月都唔會鍾意我，」
 


他說話變得無比的悲觀。
 
「點係呢二哥，咁就證明你仲有機會啊，我地而家入左黎打工，
 
你同小月日見夜見，所謂近水 …… 近水 …… 近水咩啊喂，」
 
三弟又用隻貓掌打了我一下。
 
「係近水樓台先得月，」這些我便最是在行了。
 
「係啦，無錯啦，近水樓台先得小月，
 
小月唔係你既仲可以係邊個啊，唔好灰心啊，」
 
喵喵怪此時一隻貓掌拍向比卡超的身上，想不到現實中竟能見他們化的為友。


 
「我 …… 我落返去做野啦 …… 」
 
我想他們兄弟二人聚首，我在旁偷聽總不妥當。
 
「好啦，我都落去陪隻大波怪啦，你諗下啦，」
 
他臨行前不忘多開解一下二哥，若是我也有這種手足之情，你說多好？
 
我想著便要舉步離開咖啡店，卻又突然被他的貓掌攔住，
 
「喂，你唔記得隻大波怪同你講咩咩？」喵喵怪提醒我。
 
「啊，係喎係喎，差D唔記得左添，」
 


怎麼每次文靜說的話，我總是放不上心？
 
此時小月離我最近，我便上前要問她借上一支筆，
 
「筆啊？小月無喎 …… ？」她說，然後在胸口處摸了兩摸，「呢支啦，
 
你拎去用住先啦主人，」她手上拿著的，正是那日警察Don送她的鋼筆。
 
 
 
「咁 …… 」我想這是Don給小月的禮物，我不好意思就取過去用。
 
「竹生主人你用住先啦，反正小月又用唔著既，
 
竹生主人對小月咁好，小月既咪即係竹生主人既，」她笑說。


 
「好 …… 好啦咁 …… 」於是我拿著筆，便又回去找文靜了。
 
此時天色已晚，路上行人漸多，
 
包圍著文靜要合照的人也就更多，我和喵喵怪一起走到她身後，
 
「喂，我 …… 我拎左支筆落黎啦 …… 」我說。
 
「算你今次有良心，有記住我講既野啦，」
 
她笑說，態度已回復昔時般，「如果你不過係兩三分鐘既事都唔擺上心，
 
我真係嬲都嬲死你，以後唔同你講野啊，」
 


我聽著捏了一把汗，也幸得喵喵怪提醒，不然我又要遭殃了。
 
「咁 …… 咁你叫我拎支筆落黎，你又唔用既 …… 」
 
我輕輕帶過，我雖沒有把實情告知，但也總算沒有欺騙她。
 
「梗係啦，我叫你拎落黎啊，係等你用架，拿，」她回首向我遞來一張傳單。
 
「傳單？」我看著不解。
 
「一個男人派傳單啊，邊會有人理啊？
 
都係我派啦，你企係隔離，我一路派，一路順便教你脫毒就係啦，
 
學得一樣係一樣嘛，」文靜嘆了一氣，「其實你都講得岩既，小草係我朋友，
 
我總唔可以睇住佢咁落去，或者你真係會幫到佢呢，」
 
「嗯，多謝你啊，」我聽著大喜，
 
想這次我以道理說過她，文靜終於肯誠心誠意的助我。
 
「但係 …… 但係淨係你用口講，
 
會唔會 …… 會唔會有D紙上談兵啊？」我又問。
 
「唉，學住先啦，你先執好左入面個涵，之後再執埋出面個殼，
 
先去諗實戰啦，唔係你幾多條命都無命賠啊，」文靜說。
 
「哦，我明啦，係咪就即係好似學好左內功心法，先可以去學武功套路，
 
最後先真係出去打交一樣？」我高興的問。
 
「類似啦，如果你咁諗易明D都得既，」她說，「不過我有個要求架，
 
你知你個人蠢啦，但係我個人又無耐性喎，
 
我驚你要我講完又講，講完又講會激到我嘔血啊，」她說著微微一笑，
 
「所以你就係張傳單背面抄低佢先，你遲D再自己整本筆記啦，
 
咁樣我講完唔洗重覆嘛，」
 
原來文靜於學習一節也有心得，她倒替我想得周到。
 
「係既，徒兒受教啦文靜師傅，」我說。
 
「嗯，乖啦，咁我而家就開始同你講第一課啦 …… 」
 
那知文靜正說著，卻有個八、九歲的女孩上前要求合照。
 
文靜自然是來者不拒，可此時站跟她站得近了，
 
才發覺圍著她的鏡頭都在拍著她的胸部和兩腿，
 
就只有與那小女孩同行的姊姊才是認真把文靜當是一個整體來拍。
 
我看著感慨，真是道德淪亡，也難為文靜如此出賣色相。