我去左間 Cafe 打工 , 想溝入面個 Mk 妹女同事: 係，係啊，每日係吹水多過做野啊！

女僕Café的工作其實也不怎麼忙碌，尤其我負責洗碗的，
 
早上沒有客人時，我也就不過是閒著，聊天的時間還要比真的工作多。
 
就像這天一大早也沒客人光顧時，Kay媽、Jude、文靜、小草、小月，
 
她們把整間店輕輕打掃了一下，然後也就都聚在休息室裡閒聊，
 
想也是因此之故，她們才在門前裝置了個搖鈴，
 


讓有客人進內時，也不致懵然不知。
 
「糖果呢，佢好多日無返工啦喎，佢去左邊啊？」
 
首先說話的是Kay媽，原來還有一個叫糖果的女僕。
 
「唔知啊，我都搵唔到佢，不過佢成日都係咁架啦，返一日工就唔見幾日，
 
佢到時到候就會返黎啦，」文靜笑說。
 


「又係咁，點解返工可以返到咁無責任感架！」Kay媽顯然沒有說笑的心情，
 
她對著眾女僕時，總有股威嚴，可對著男人麼，卻是嫵媚得要命。
 
「糖果成日神神秘秘，放工又一個人走，叫佢去玩又唔去，
 
但係名牌手袋就成日換，都唔知係咪出去兼職多份援交，」
 
我想女子的名聲最為重要，這樣說話也太不近人情了，
 


就可惜說這句話的是小草，我也不知是否要反駁她。
 
「但係文靜又話佢有男朋友？」Kay媽問，
 
一邊從手袋裡拿出一支口紅，開始對鏡塗抹著。
 
而我聽到「男朋友」三字，則又想起小草一顆心已屬他人，
 
我如此單戀著她，不知又算不算是個第三者呢。
 
「佢係咁同我講既 …… 不過我都未見過佢男朋友，
 
我地呢度係得小月同埋阿Jude單身咋嘛，」文靜笑說。
 
「唔係啊，小月琴晚都多左個男朋友啊，」Kay媽說，


 
此時卻換了去畫眼線，她也實在愛美得很。
 
此言一出，眾人都不約而同的往我身上看去，
 
而我只覺渾身不自在，羞得滿臉發紅。
 
 
 
「唔係架，我同竹生主人，佢 …… 我 …… 」小月也是同樣羞得兩頰飛紅。
 
「不過我唔明喎，文靜你點叫到小月去鍚竹生，」Jude問。
 
我想起昨夜文靜忽爾對小月像念咒一般，說了一大堆似是而非的英語，
 


然後小月便似是著了魔的對她言聽計從，
 
其中的道理，我至今也未想得出個所以來，Jude這一問，實在正中我的心意。
 
「哦，呢樣咋，」文靜笑說，小月也在旁邊嘻嘻的笑著。
 
「文靜姐姐唔准反口架！」小月說得像個可愛的小女孩。
 
「得啦得啦，應承左你就係啦，」
 
文靜說著伸手摸了摸小月的頭，玩弄著她兩條馬尾。
 
「咁即係點解啊？」我見文靜始終不說，便忍不住出口要問。
 
「你條淫蟲，有得比你鍚咪執到囉，仲要問問問！」


 
文靜一臉鄙夷的看著我，怎麼她對每人都好，就是對著我是如此的嬌蠻。
 
「我 …… 我唔係淫蟲啊 …… 你話過 …… 哎唷！」
 
我想起昨夜與文靜之約，她說過了十二時後，
 
便是我喊千百萬聲「我是死淫蟲」，也是呼天不應了，這次可真乖乖不得了。
 
「哈哈，你都知呢，無啦，機會過左就無啦，講左係限定架嘛，
 
死淫蟲死淫蟲！！哈哈，」文靜洋洋得意的，
 
我心裡想的卻是小草，不知她聽文靜說我是淫蟲以後，會否就對我有所忌諱。
 


「點 …… 點得啊 …… 唔算 …… 咁樣唔算 …… 」
 
我想這也太不公平了啊，我本來就願意裝猩猩搥胸口，然後說自己是淫蟲，
 
可卻突如其來的卻殺出來了千鍾粟、黃金屋、顏如玉三人的「三怪之亂」，
 
這可苦了我呢，以後都要帶著這個污名。
 
「你唔服啊？」文靜笑說，向我扮了個鬼臉。
 
「我 …… 」我想自己沒理由也學千鍾粟一套賴皮的方法。
 
「量你都唔服架啦，咁啦，而家你爭我一個願望，
 
下次我要你做咩你就做咩，聽聽話話既話，
 
我就考慮下唔叫你做淫蟲啦，」文靜笑說。
 
「文靜你唔好蝦佢啦，佢好慘啦，」Jude笑說，還是她對我最好。
 
「係啊係啊，唔好蝦我啊，我係好人黎，你去搵壞人蝦啦，」我說。
 
「大把人想我理下佢都無，你身在福中不知福，」
 
文靜說著又用力在我頭上敲了一下。
 
「咁究竟你同小月講左咩，點解佢會聽晒你話姐？」
 
Jude又問，對了，這個問題比較重要。
 
「無啊，我話要送張Poster比佢姐嘛，」文靜答道。
 
「咁 …… 咁個堆咒語呢 ……  ？」我想起文靜被西方女巫附身，心裡不禁一寒。
 
「咒語 …… ？」文靜沉思了好一會，「哦 ……
 
個幾個係日文名黎架，係小月鍾意個隊日本Band既隊員名黎，
 
不過我都唔係幾記得個隊野叫咩 …… 等我諗下先 …… 」
 
「係Silent Siren，Silent Siren啊！」小月一臉雀躍地說，「佢地好靚女架！」
 
原來文靜不過是說要送她偶像的海報，小月也真太為之瘋狂了，
 
竟然連如此珍貴的初吻也都獻上，唉，不過小月如此喜歡日本文化，
 
她的口音又怪怪的，也不知她會不會其實就是一個日本人，
 
但我還有一事更不解 ……
 
「咁 …… 咁文靜屋企隻 …… 隻男人 …… 又係咩一回事啊 …… ？ 」我問。
 
「啊？」她們相顧一眼，然後都哈哈大笑起來。
 
「即係點啊？」我看著仍是不解，好像就只有我一人蒙在鼓裡，
 
莫非文靜家中當真藏起了一個小白臉？
 
「唔好問啦，」Jude笑說，「呢樣你唔知好D，」
 
「啊 …… ？哦 …… 好啦 …… 」我見是Jude要我不要問，
 
想她也不會加害於我，所謂難得糊塗，有些事還是不要知道好了。
 
 
 
 
 
「係喎，今個禮拜六我地去邊度玩啊？」
 
小草把話題轉過，似是對我完全不感興趣。
 
「都係去飲野架啦，不過今次我仲有個朋友都會黎啊，」
 
文靜答道，她仍是笑個未止。
 
「係喎，竹生你黎唔黎啊？我地每個禮拜六都會一齊出去玩，」
 
Jude盛意拳拳的邀請我。
 
「唔啦，我都唔飲酒既 ……. 」我想起自己昨夜犯了酒戒已然內疚得很，
 
於是便婉拒了Jude的好意。
 
「練下D酒量都好啊，飲一杯就訓左係度，笑死人啊，」文靜在旁打鬧著。
 
「我 …… 」對著文靜我總會啞口無言，
 
「都係架，一陣下次佢地返黎搵你，你都唔至於咁吃力嘛，」Jude說。
 
「係喎 …… 」我在心裡嘀咕，「阿Jude話佢地要返黎搵我報仇，
 
所謂有備無患，我學識飲酒其實都無壞，」
 
我想著只覺Jude說話實在有理，「如果飲酒係要學既話呢 …… 嗯，
 
所謂 …… 學而時習之，不亦說乎？我下定決心去學，就應該係要勤勤練，
 
日日飲，夜夜飲先係，」想到這裡，反覺泰然。
 
「嗯，好啦，一齊去啦咁，」我答道，然後即聽「摺」的一聲。
 
「我叫你就唔聽，阿Jude講一句你就去，好啊，即係同我過唔去啊，
 
小草我地一於唔好理隻竹生姐！」
 
文靜說著與小草摟成一團，想她們之間的感情也不壞。
 
「我 …… 」我也不知該如何替自己辯護，卻聽外邊傳來「鈴鈴」兩響。