廢青於中世紀魔法世界的生存法則: 68. The Bond
「雖然我之前都大概感覺到，但係剛才聽完你既『愛情故事』……」三葉適當地停低笑一笑先再繼續：「之後，我就明白晒成件事。」
各位係高登打滾咁多年既巴打，應該都心中有數成件事係點。
成件事就由十年前既龍禍講起，當時劫同瞑，亦即係都鐸同三葉當時有一場家庭糾紛，而白石鎮就非常不幸地被無辜捲入，身為悲劇女主角既菲兒仲因此變成孤唔晒既孤兒。
該件龍禍(aka兄妹鬨牆)以三葉被都鐸大力打臉及老野出黎執死雞(根據三葉於WW中既演說所描述)完結，三葉離開白石鎮展開長達十年既旅行，菲兒由長老照顧並於無父母既情況下長大，而紳士都鐸就一直尾隨住菲兒直至今日終於得米。
十年後，三葉終於玩夠決定返黎見返佢阿哥，歸途中遇到做緊就職測試既我，因為發現自己唔可以直接殺死我而覺得好奇，並認為此乃命運所驅使（三葉龍位係The Dragon Lady of Miracle and Destiny，亦即奇跡及命運之龍，難怪佢當初係咁問我相唔相信命運……），因此埋堆，順便擊退拳鼠，拯救瀨死既熊侏族及熊侏首領。
然後為左了解白石鎮既最新狀況而老屈我係強姦犯，但係又被個癡線婆成功接觸村裡面既高層，而且接受就職測試技驚四座。
三葉唔知癡左邊條線而係就職測試放左招核武，而紳士都鐸雌伏十年終於搵到個機會強搶心愛既菲兒bb回家，仲交溝成功令對方願意對故友（即係我）兵戎相向……當然啦，可能係我一廂情願當菲兒係朋友。
呢二百幾頁紙既劇情就係咁用幾行字總結左，簡單黎講所有野都係呢對兄妹有意無意搞出黎，背後既動機仲非常無聊。
嘩！我覺得自己比人浪費左好多時間呀！
老老豆豆，一諗到呢一點我就想離開呢個地方，繼續上路尋找返香港既方法……但係我又無其他地方可以去。
既然係咁，就睇下呢對兄妹仲可以搞啲乜野出黎。
「我要求非常簡單。」三葉率先開出條件，但係呢條癡線婆口中既簡單一定係非常強人所難。「姑娘要跟我返白石鎮。」
「如果我拒絕？」都鐸改返用公主抱既姿勢抱住菲兒。
其實菲兒繼續昏迷都係一件好事，佢醒左的話形勢可能會更混亂。
「咁就再打過。」
「你認為憑進入唔到龍形態既你可以阻止我逃走？」
我對三葉其實係一條龍呢一點尚未習慣，但原來佢變唔返龍形態？
「你講得岩，我阻止唔到你逃走。」
「咁我先失陪。」都鐸調頭就想走。
「等等。」三葉當然唔會眼白白比佢走：「雖然我阻止唔到你逃走，但係將你懷中既少女殺死對我黎講可以話易如反掌。」
三葉呢句輕鬆將都鐸惹毛：「若果你敢的話，我保証果邊既少年會有同樣下場。」
『果邊既少年』即係我。
明明個三葉都特登返黎搵返都鐸，明明都鐸都想好好地傾下。
結果都係要講打講殺，傻的嗎？
更加傻的嗎既係點解你兩兄妹嗌交要拖埋其他人落水？十年前又係咁依家又係咁！
被動技又再發動。
「呵？區區一個異鄉人竟然有種介入古龍之間既糾紛？」都鐸貴族般的冷嘲。
「係我眼中，你兩個既糾紛僅僅係兄妹之間既糾紛。你地係人係龍我完全唔Care囉。」
頃刻間，一大群火蝴蝶圍住我飛下飛下。
「你真係唔在意我地係龍既身份？」好明顯呢群蝴蝶係由都鐸所召喚。
而召喚既目的就係嚇我，以剛才一隻蝴蝶就將森林炸到咁，呢到成群炸完我之後我應該會化為灰燼。
你覺得我係個咁易受威嚇既人？
「好啦，點都有啲Care既……」
「可唔可以收埋你既小動作？」三葉既語氣聽起上黎相當不悅。
「我只係教導一下佢對龍族應該用乜野態度。」
歸根究底都鐸都係有果種身為龍既優越感，只不過係無森宿咁誇張。
都鐸對於他人既尊重係基於其他人對佢既敬畏尊祟之上，若後者欠缺的話，都鐸將毫不留面。
若果三葉唔係到的話而令佢顧忌菲兒安危的話，我剛才大概已經變成光。
此刻都鐸三葉二人互相脅持人質，呢個可以話係談判難以好好進展既原因。
但係呢一點應該係對三葉比較有利，係呢種有可能玉石俱焚既情況，邊個對自己既人質比較唔Care絕對有優勢。
而我都幾肯定都鐸緊張菲兒既程度高過三葉緊張我既程度，由於理由太過明顯我就懶得解釋。
春袋被渣實既都鐸一定唔會輕舉莽動，而另一邊廂三葉都有任務要帶菲兒返白石鎮，所以未到一日未到三葉決定rage quit既一刻，佢都唔會郁手。
呢個就係我可以係到冷靜分析既原因，雖然係咁，但係咁樣繼續落去談判依然會卡住係到，進又唔得退又唔得。
兩版紙又過左喇，點解決呢？
「嘉穎。」三葉突然嗌我個名。
「係？」
「今次我對你唔住喇。」
「矣矣矣矣矣矣？？？」你真係要推我去死？？
金黃色的巨型魔法陣於三葉腳底出現，此魔法陣更延伸至都鐸腳底…
「喂，三葉大人，你真係唔考慮多陣先？」
「有咩好考慮？」
「求下你丫！」
「收聲。」
「我可唔可以唔死呀？」好多野都唔到你揀，連生存既選擇都唔到我揀。
「收聲！」
此時三葉高舉土豪魔杖，腳下既魔法陣開始轉動。
一直見証住一切發生既都鐸竟然不加以阻止，你唔係愛菲兒架咩？你真係由呢條癡線婆亂咁黎？
「喔？不失為好方法。既然你有覺悟我地就立即解決呢件事」都鐸竟然同意！？！？
「Ｄｅｓｔｉｎｙ Ｂｏｎｄ」就係下一秒，三葉詠唱一招我未見過佢用既魔法。
「阿……阿………阿阿阿阿阿………」我全身散發出淡淡既金光，然後呢啲金光化成如塵埃一樣既金屑慢慢被吸走……
對於目前既狀況我完全毫無頭緒，但至少目前我無穿無爛，無覺得唔舒服，只係心裡面有一種失去左啲非常重要既野既失落感。
而被都鐸以公主抱姿勢抱起的菲兒身上亦有同樣現象，從佢身上飄落既金屑亦都被緩緩吸走，牽引到土豪魔杖正前方。
從我同菲兒身上既金屑就於該處交匯、融合……
「做咩呀？你想同歸於盡？」雖然眼前既景象非常華麗，但我並無心情去欣賞，因為我威覺到生命受到威脅！
「同歸於盡？的確係幾貼切既字眼。」三葉回答既時侯仲附上奸笑。
「咚！」說畢後三葉利用土豪法杖大力敲擊地面一下，發出悶響聲，而與此同時金屑亦有異變，原來零散既金屑忽然捲動被聚集起來，數秒之後金屑已經捲成一條金色既絲帶，而絲帶既兩端正正係我同菲兒。
數秒之後，金絲帶漸漸消散於空氣之中，而地面上既巨型魔法陣亦於同一時間消失。
呼吸OK，心跳OK，身體控制OK，思想依然污穢，一切如常。
「咁樣我地可以開始傾下未？」三葉向都鐸問。
「樂意奉陪。」
「喂……等等……」我冒住生命危險強生插入佢地既對話。
「又點樣？」
「你係咪應該解釋下你頭先係未得我同意之下對我做左啲乜？」
「時間無多。」都鐸催促。
「Ｍａｇｍａ Ｓｐｅａｒ！」三葉眼尾都唔望都鐸就直接向佢轟出一招魔法，然後熔岩之矛就係擊中都鐸之前，恍如打左落個防護罩一樣被慢慢吸收。
「好，你地繼續。」
「我頭先用既魔法就係將你同管理員小姐之間繫上一個結？」
「咩結？情結？你唔怕你呀哥呷醋咩？」
「你應該慶幸自己有呢個結，否則你已經死左。」都鐸不悅道。
「呢條結既主要效果就係，當連結既其中一端死於非命既時侯，另一端亦都會立即死亡。」
「我d……我尸……我…………！！」
「想講乜？夠膽就講埋佢。」三葉對嘉穎使用威嚇，it's super effective！
「唉……」我嘆嘆氣，冷靜……冷靜……
諗深一層其實唔係壞事，都鐸一定會鍚住菲兒，佢死於非命既可能性就只有三葉一個。
而另一方面，若果都鐸出手殺我的話，菲兒都會立即陪葬，所以佢都唔會出手……
諗深一層，其實呢個結都叫做保護左我既安全。
「明白未？明白就收聲唔好阻大人傾計。」
「係既係既……」
「我已經答應帶呢個女仔四處遊歷，兄妹一場我希望你唔好阻止我。」
「兄妹一場，哈！」嘲笑一聲。
「九爺我希望你唔好嬲，我都知佢既性格係有啲難頂……」
「啪－－－」三葉一巴就刮左落我塊面到，算唔算係自我實現？
「我對你同呢位小姐之間發生過既事、將會發生既事其實興趣唔係好大。」
你無興趣姐，話唔定啲讀者有興趣呢？
「但係依家管理員小姐一定要跟我返白石鎮。」
「佢一返去就會受到其他人影響，然後就會被困返係牢裡面，無左出去遊歷既決心。」
「若果佢既決心係得咁多的話，呢個根本就唔係決心。」
都鐸一下就被駁倒，然後三葉繼續補刀：「講到尾都只係你自己既私心。」
「無錯，係我既私心。」然後都鐸一下子就承認。
「為管理員小姐既著想，至少比機會佢向所有人解釋同埋道別。」
佢稍稍停頓，然後若有所指地續道：「不辭而別者想要歸家既時侯，心裡面並唔好受。」
阿，原來如此。
「九爺，大不了你咪跟埋去囉，有咩冬瓜豆腐大不了你再劫走佢一次啫。」為左溝女有咩你做唔出丫？呢句我唔敢講出口。
「唔…………」
「到時就算你要夷平白石鎮我都唔會出手。」
「你明知如果我咁做的話大哥一定會唔高興先咁講。」
「適當既時侯要運用下做細佬細妹既任性權利。」
「明顯地你係運用過度……」
「邊個叫我係幺女。」
對話既溫度明顯下降，睇黎事情就咁塵埃落定。