廢青於中世紀魔法世界的生存法則: 67, The Lady

「啪啪啪啪啪啪。」我不禁拍爛手掌：「九爺威武，若果我把口有你一半咁叻都足以溝死女。」
「咳咳。」都鐸睇起上黎竟然有啲尷尬。

「但係你頭先咪話你並唔係鐘意菲兒既？」

「我唔係鐘意佢。」都鐸非常認真：「我係愛佢。」
「啪啪啪啪啪啪。」天氣已經咁凍，你仲講啲咁肉麻既說話？理下聽眾感受好唔好？

咦唔係喎，我無拍到手喎。
「我真係寧願自己失神多陣，至少我就唔使聽到啲咁肉麻既故事。」





說話者字裡行間都帶住攻擊性，仲可以係邊個？
「三葉！」

「塞洛。」

「睇黎我地之間需要談判。」三葉既笑容非常虛偽。
「點解你兩個好似咁熟咁既？」我問。

Well，其實我唔係好意外，畢竟三葉同森宿都好熟，都鐸都係一條龍姐，有咩咁出奇。




我既接受能力真係高……
「為左令嘉穎可以清楚此刻既處境，先容我正式自我介紹一下，」都鐸頭先已經自我介紹左一次，計埋佢個溝女真人真事非FF我已經聽左佢自我介紹三次。
「吾全名為三葉‧提默亞祖，龍位為The Dragon Lady of Miracle and Destiny。」

「父母比你既名字明明係塞洛……」

「收聲，我先係背負住個名生存既人，所以我要人地點樣稱呼自己應該由我自己話事。」
天阿……
我依家既感覺大概就係岩岩開學，終於識到一千零一個朋友。





雖然對方外表唔差，但係我依然一廂情願地以為對方身份同自己相近，16碎，係一個又可愛又靚女又索既女仔，校花，然後先發現佢成績好到年年第1,唔好以為佢\好恰 佢\好打得嫁,勁串,有錢(啊爸啊媽係全球第一第二富,但好忙 每日都要輪住開工)。
個感覺就係一心睇個輕鬆既校園故結果要考個語言學博士學位先睇得明！

我係咪比人背叛左！？！？！？！
「順帶一提，我亦即係一般人口中既『瞑』。」

暝？呢個名我係咪聽過？
我緊閉雙眼努力回帶……
是咁的，十年前白石鎮發生左次龍禍，而引發龍禍既主角之一，正正係頭先，某程度上令我地逃過一劫既果條龍，亦即係「劫」。
當時「劫」同另一條龍「瞑」之間發生左場戰鬥，而戰場咁岩就係白石鎮附近。
……………
屌你老母我記起喇！原來個答案一早就開左估！

「十年前係白石附近同劫隻揪既果條龍！」





「雖然覺得你既用字有啲冒犯……但你講得無錯。」
「亦即係十年前既龍禍……」

「只係我地兩兄妹嗌交。」都鐸插嘴。
喂，成件事會唔會太兒戲？
「塞洛，原來少年唔知你真正身份？」

「嘛，我無講比佢聽，雖然我亦都無刻意誤導。」
「無刻意誤導！？！？！？你肯定！？！？！？！？」
我開始回想過往三葉種種既蛛絲馬跡…

當初我問佢既身份，有無去過白石，佢既回答係自己來自一個好出名既大家族，本身同其中一個呀哥住白石，因為家庭暴力先離家出走………
屌你又好似真係無講錯……
「唔好意思，談判可以開始未？我等唔到幾耐。」都鐸問。





「Sorry……你地隨便……」我單手抱頭，直到依家我都仲未接受到呢個事實。

「唔該。」連都鐸竟然咁有禮貌呢一點我都難以接受！