廢青於中世紀魔法世界的生存法則: 69, 老闆呢種生物只會係有求於人既時侯先會出重金禮聘

一行四人……應該話兩人兩龍，駛住DS漏低左果架卡車返返白石鎮。

真係諷刺，屠龍大團Dragon Slayer既卡車竟然被兩條龍騎劫左……果對兄妹此刻佔據於車頭位置，而我同依然昏迷既菲兒則坐係車卡裡面。
通過城門之時提默已經昇起，又係新既一日。

城門裡不遠處，係坐於長椅上雙手抱胸閉目養神既將軍。
當我地駛近，連招呼都未打既時侯將軍立即開眼道：「辛苦晒。」

乜野都唔需要交代，將軍似乎已經確信菲兒已經安全。
「將軍你都辛苦，DS果兩個精靈法師已經安頓好？」





「我地響WW既宿舍比左間客房佢兩位，一直都有人看守住，放心。」講到咁好聽，軟禁咪軟禁囉。

「交佢地比蘭卡特處理咪得，一舉兩得。」
一舉兩得既意思係乜？
「好………點解無見一陣嘉穎型左咁多？」將軍終於意識到三葉旁邊既壯男。

此時我從車卡裡探頭而出回話：「你係咪諗多左？」
「哈哈！」將軍豪爽地大笑：「我都估到，嘉穎既氣場邊有可能咁霸氣。」





你識左我兩日咋，唔好扮熟得唔得呀？
「在下都鐸。」九爺抱拳問侯將軍。

「係佢幫手救返菲兒。」
「哦？」語氣帶住懷疑。

三葉你作理由都作好啲丫，你叫將軍點信你呀？
「在下剛好路過。」

「半夜三間咁岩係荒野路過……？」





「話晒都係大商路之前，深夜有人趕路應該唔出奇？」我又大腳解圍。

「唔……」將軍此時走上前，探頭望入車卡中昏迷既菲兒，然後點頭：「呢個可能性都唔係無。」
其實對佢黎講最緊要係菲兒平安返到黎，過程係點Who cares？
「我地仲要去聖堂同長老匯報，先失陪。」三葉策"馬"而去，臨離開將軍視線之前再次叮囑：「記得將果兩個精靈交比蘭卡特。」
＊　＊　＊　＊　＊
「汝名為……」

「都鐸。」
再次返到熟悉無比既審問之間，相比起上一次，人數又有變動。

總數依然係六個，但係由四比二既比例變成三比三。
我地呢面多左個都鐸，而佢此刻就坐於最前方。





而對面就少左個蘭卡特，我終於明白三葉頭先對吩咐將軍既動機係乜。
都鐸毫不猶豫地將自己既本名講出黎，似乎知道佢本名既一般人並唔存在。
「聽聞係你擊退劫，救返菲兒？」伯雷主教急不及待地加入對話。

「無錯。」

然後都鐸略略解釋下自己既身世，佢既"設定"係居於山獄鎮，職業係做護衛，受聘保護北方大商路上既石頭商人，琴晚係準備回程返山獄。
當然伯雷覺得有古怪，點會夜媽媽先返屋企？但係都被都鐸同三葉兩個一齊搵籍口扯過去。
「你地點樣擊退劫？」發問既係伊曼，凡人可以憑一己之力擊退龍可以話係大新聞，若果知道方法的話，人類以後就唔使受龍族既氣。
不過佢問既對象本身已經係一條龍，而且仲係一直以黎擔任惡役既『劫』。

當然，我就唔會蠢到爆響口，一黎就算我講佢地都唔會信……就算佢地信，咁又點？
係懸殊既力量差距之下，我只可以奶人袋底維生。
「雖然劫佢唔怕黑，但係佢怕凍；而琴晚天氣忽然轉凍，所以佢就夾住條尾走左。」





都鐸怒睥三葉，對於自己既形象被毀滅，唔高興都係正常……

但係毀滅都鐸形象最深既人正正係都鐸自己。
「我都有聽聞北方大商路路上有結霜既痕跡……最近幾年天氣反常得非常厲害，似乎又有人觸怒渡澄……」
雖然呢個理由聽起上黎好可信，但係三位高層唔在場，而三葉既口供與環境證供配合，所以好快就轉左話題。

其實在場所有人都好清楚，最重要既唔係都鐸係乜水，佢地點樣砌低左條龍。
「汝等是擊倒了劫沒錯，老夫仍恐劫會捲土重來……」

佢既擔心並不無道理，自古奸角多爛命，君不見寵物小精靈之中武藏小次郎同喵喵怪係上集爆炸大嗌好邪呀飛天之後，下集依然可以身光頸靚帶住新玩具出黎諗住捉比卡超；劫都可以。
當然啦，知道所有野既各位以上帝視角睇可能只會覺得老野非常傻豬豬。
「若果長老你擔心的話，不如就聘請都鐸駐守係白石鎮一段時間，直到你相信劫唔會再返黎為止。」三葉提議。
呢單生意都幾好做，基本上劫幾時返黎係完全由都鐸決定，若果白石鎮方面認為劫已經唔會再出現就炒人的話，都鐸只要變個身出黎say個hello再坐上西門樓閣睇個日落，嚇到賴屎既管理層立即就會求都鐸返黎……
點解有以unun腳就搵到錢，而我就要搵命搏仲要受人氣？公平咩？呢個世界公平咩？
「不失為好方法。」伯雷主教表示同意。





「你意下如何？」長老聞言立即徵求都鐸意見。
「以武力及承諾交換錢財係我一直以黎既生存方式。」九爺此刻非常入戲：「條件好的話我唔會拒絕。」
根據三葉所得到既待遇，我好肯定都鐸逗果份糧將會係我幾倍。

「國立祭舉行在即，鎮內安全將需要如閣下般之人才來守護。」
話說國立祭呢個字眼我都唔係第一次聽，之前係WW食早餐既時侯都聽到有人提過……

「正好，我都打算逗留至國立祭。」睇黎契約已經成立。
「阿阿，提到國立祭。」伯雷同長老打個眼色，然後繼續：「三葉小姐，嘉穎，我地有任務需要委託你。」