廢青於中世紀魔法世界的生存法則: 70, 權力鬥爭既始末唔係三言兩語就講得完

正當我仲諗緊點解三葉有尊稱而我無既時侯，伊曼已經帶同都鐸離開房間，伊曼當時既眼神仲如狼似虎一樣，睇黎佢對都鐸相當有興趣；而我旁邊既三葉則係一副幸災樂禍既表情……呢個女人真係……
「首先，感激兩位既貢獻，可以迅速救回菲兒係兩位既功勞。」

「門面說話可以唔使講，你出乜野待遇我地交乜野貨，天公地義。」

「好……好……」無其他外人響到，三葉表現得完全唔客氣。
「我想問下今次個任務係咪同咩國立祭有關？」

「的確係有間接關係。」伯雷回答：「坎特，解釋工作拜託你。」
故事發展黎到呢到，一直被稱為長老或者老野既人物終於有個名稱喇！




「解釋有點長……留心聽好。」

當長老話自己既解釋將會好長既時侯，佢並唔會令你失望；為左令各位更容易明白，以下為TL: DR版本。
In Short，任務既本身係去山獄鎮帶一個男人返黎；呢個男人就係一直只聞其聲不見其影既白石親王。
而背後既原因先係真正需要用大篇幅解釋既野……

巴克撒大公國由公元大龍禍災後發展至今大約七百餘年，一直依靠方舟教及皇家雙方緊密合作支牚，以保國內平穩發展；呢個並唔係全國人民大會剩係得個講字既口號，佢地真係做到成績出黎，巴克撒大公國雖然國力稍為落後，但國內政局非常平穩，經濟方面比上不足比下有餘。

但相信故事發展至今各位都應該好明白，大公國國內話事權最高既係方舟教，皇家只係緊隨其後，連大公加冕都係由教皇主持。
大公國國內並無「神」既概念，因此更加唔會有「君權神授」既思想，既然係咁點解巴克撒皇家要受教會氣呢？今次唔關土地問題事，主角係歷史問題。




話說，巴克撒家只係恩基大陸南方眾國中其中一個小國，適逢公元滅世，大陸上七成人口覆亡，人類及亞人類社會陷入崩潰邊緣……係咁樣既設定之下，邊個受到影響最少就係大嬴家。
於恩基大陸既西方及東方，所羅門國及當時既蒂芬妮亞（蒂芬妮亞曾多次滅亡及復國，公元大龍禍時既蒂芬妮亞及現今既蒂芬妮亞並唔一樣）各自依靠科技及魔法降低傷亡，令到本來於龍降後已經獲得優勢既兩個國家優勢再次擴大。

係北方既海奧先唔提，呢個國家受到龍王三太子渡澄既保護，捱得住都好合理。
真正唔合理既事出現左係南方，南方可以話係全個大陸最落後既地方，而事實上公元大龍禍事件中，呢個地區既死亡數目係最多。

而無死既人入面，正正包括左巴克撒家。
巴克撒家當時只係現今白石郡南方地區既小領主，該地遠離海岸線，山多平地少不利種植，但礦產亦唔算豐富，除非有奇跡出現，否則要發展成大國根本係無可能。
但係奇跡就出現左，係公元大龍禍發生之前，一名賢人告誡巴克撒公，一場大龍禍即將發生，仲想要命的話就照佢既說話做……
就於其他南方諸侯都wfc既時侯，巴克撒公竟然將賢人既要求做到足，其中最後要既一項就係到訪至白石鎮。




當時既白石鎮雖然未有今日既歷史意義，但已經係少有名氣既村莊；而就係巴克撒公一家到達白石鎮後不久，公元大龍禍就發生。
就係當時，方舟就「非常巧合地」出現於白石鎮，而出於佢既本能，成個白石鎮就此被保存落黎。

此後，當時既巴克撒公就信晒個賢人，係佢既指引之下巴克撒作為領主開始征服大陸南方……雖然咁講，但係係龍禍之後，抵抗勢力根本唔存在，更多人係主動加入當時坐擁最多資源既巴克撒公；而係巴克撒公擴張領土既同時，果名賢人亦都創立左方舟教，但雙方依然緊密合作，至此兩者就打風都打唔甩。

初代巴克撒公並唔算係非常優秀既人，佢只係咁岩信岩左人，做左正確既決定，然後發生既事就令到佢自自然然成為坐擁大陸近四份一面積既大公。而賢人同巴克撒公既不對等關係亦都一直延續至今。
經過七百年既發展，大公國已經成為行宗教法既國家，教會擁有立法及司法之權，而皇家本身則負責行政。

三權分立大家都應該好熟悉，行政立法司法三者互相制衡以防一方獨大；係行政主導既香港，只要行政長官夠厚面皮都足以破壞平衡，更何況根本無三權分立到既大公國？
皇家話就話手執行政之權，但實際上立法及解釋法律之權均於教會手中，到最後皇家只係負責履行方舟教教會既指示……
即使冠以皇家既美名，巴克撒家不過係行世襲制既公僕。
以皇家既角度黎講，只要安安份份的話，自己既統治將可以繼續維持，雖然皇位多少有傀儡性質，但名義上都算係一國之主，而且對於血統並非特別優秀既巴克撒皇室黎講，行政呢個遊戲已經非常難玩。
講左版幾紙咁多，但我仲未講到白石親王，大家可想而之長老係花左幾多口水。

但放心，係大家即將睇厭個世界觀既時侯，白石親王愛德華終於出場。




唔止白石親王，連佢既二弟聖廷堡親王艾爾凡斯……I mean 佐治同樣出場。
愛德華同佐治既誕生可以話係奇跡，係呢個非常平傭既血統裡面竟然於同一代裡面出現左兩名優秀既王子，基因既野真係神奇……
一講到呢種話題，我立即就問：「係咪上代巴克撒大公戴左綠帽呀？」

「非也非也。」老長解釋，歷代大公多有三妻四妾，雖然方舟教教條係推祟一夫一妻制，但係係某代極度咸濕既大公動之以情，說之以理（多老婆等於多子孫等於多皇位繼任人等於唔會絕後）游說之下，皇家終於嬴左呢一小仗，獲得方舟教非常罕有既讓步。
做個一國之主都唔可以有後宮？若果方舟教唔讓步的話，皇家同教會既紛爭可能早幾個世紀已經開始左……

講返正題，即使大公有個咁既特權，現任大公依然對皇后非常忠誠，二人經常出雙入對，可以話係皇家歷史之中稀有既美滿婚姻。
簡單黎講，愛德華及佐治可以話係基因突變既產物。
兩位王子自幼能文善武，以往討論繼承人問題既時侯煩既都係係一堆堆爛橙入面揀個無咁爛既，黎到今代，煩惱既問題竟然係兩個王子都太優秀，邊個做唔到王都會係損失。而到最後，愛德華僅僅因為比較年長呢一點而成為大公之任第一順位繼承人，獲得白石親王之名銜。

直至大約十六年前，白石親王愛德華竟然人間蒸發。