廢青於中世紀魔法世界的生存法則: 63, 港女統統都鐘意洋腸
「企係到咪郁！差人做野！」
我唔知點解我會將呢句講出口，明明由細到大我都無當差既意向。
雖然學歷要求唔高，又鐵飯碗糧期準岩晒我，連屎忽比人塞蛋糕都唔使！但係俗語話齋做人做警自己決定，點解有人唔做我要做警？係香港地，識玩既人一定係逗老綜住公屋UNUN腳享受人生，你咁辛苦都係得萬幾蚊人工住劏房咋？哎唷陰公豬囉。
更加重要既係，此刻我扶持住人質，明明係劫匪先做既野我竟然屈左落差佬到。
Well，雖然依家係香港地分分鐘劫匪既形象仲好過差佬。
都鐸一見到我扶持住昏迷既黑衣人首先係有點震驚，但係好快又冷靜落黎。
佢嘆一嘆氣，現場既氣溫唔知點解急降，仲落埋雪添，都鐸嘆氣既時侯吐出一大團白霧。
「有何貴幹？」
大家係咪好奇怪，點解我仲唔除左黑衣人套傳說級既布袍落黎中飽私囊呢？
並唔係因為呢件裝有拾取後綁定既特性。
「想傾兩句姐……by the way你係邊位？都鐸呢？」都鐸就唔見左，但係出現左個實力力壓三葉既壯年型棍子。
「請容我自我介紹，吾名為都鐸‧提默亞祖，乃創世古龍膝下第九子。」點解你變左做人樣既？
不過係呢個世界，龍係一切邏輯既根源，意識到呢一點之後我就無深究。
「都鐸大哥你剛才招招都想拎我命，我係咪同你有仇先？」我反而比較想知道呢一點。
「我剩係見過你兩次，我地之間可以有何過節？」都鐸反問我，真係不負責任，你睇我唔順眼仲想問返我原因？Ｗｈａｔ ｔｈｅ ｆｕｃｋ？龍語呀，識唔識聽呀你！
「既然係咁點解我地第一次相遇你要睥住我咁耐？」
「睥住你？」都鐸側側頭作思考狀。
「然後頭先你又下下想拎我命，又係咩意思？」
「就係覺得你礙事，想趕走你既意思。」
「郁啲就用武力，乜你咁野蠻既！」三葉同用類似既詞彙形容過佢。
「對唔住。」佢竟然直接就道左歉，然後佢繼續講：「但係脅持住人質實在無資格企係道德高地。」
「收聲！」我大喝一聲。
「好，你冷靜啲。」都鐸非常有禮貌而且非常冷靜地回答。
等等，呢個展開係咪越黎越錯？
做乜搞到都鐸越黎越似談判專家？
「三葉，你出句聲啦！」
平時最多野講既三葉呢刻竟然企左響到乜都唔講。
佢既眼神……非常奇怪。
莫非都鐸真係識幻術？萬華鏡寫輪眼？
「再叫佢都無用。」
「你搞成佢咁既？」
「間接造成。」呢個唔爹唔吊既答案又算係乜？
老老實實，如果佢都鐸好似一般大奸角咁一邊恥笑我一邊講自己既邪惡計劃，或者我仲識配合下。
但係佢依家既形象同佢龍既身份，同埋之前既行徑實在相差太遠。
係喎，佢係一條龍黎架喎，爭啲比佢咁有禮貌既對答欺騙到。
「老實講，我無必要答你既問題。」都鐸左手伸前，手掌向上，托起一棵浮空既菱型晶體。
仲等我頭先咁大聲喝佢，其實我一直在玩命！
「放開人質，可保你不死。」
對唔住大佬，你話點就點，有怪莫怪。
你一定以為我咁講……但係我今日並唔可以就此放棄！
「我欣賞你唔放棄既精神，但係你響我面前搞任何小動作都只會顯得你更愚蠢。」
我單手掩口，又將心裡面既諗法講左出口！屌！
都鐸慢慢向我呢面行過黎，然後以一貫輕鬆既貴族語氣：「你應該知道你所脅持住既係邊個？」
「知道。」老老實實，我仲幾震驚下。
「咁我就放心。」
既然底牌都已經揭開，我就將黑衣人既斗笠揭下。
斗笠下既係一名昏迷緊既圖書館理員。
順帶一提，佢既斗篷底下並無著其他衫，呢個就係我唔強搶傳說級裝備既原因。
至於點解我會知佢無著衫呢一點………
「以我同你既立場都唔會傷害呢位姑娘，換句話說你既脅持並無任何意義。」
咦？我係咪由一開始就已經做錯左？我係咪應該將菲兒抬返白石鎮先再作打算？
錯錯錯…就算帶左返去都鐸都可以輕鬆再要人，到時白石鎮只會多一棟被撞爛既建築。
除此之外仲有好多麻煩既解釋工作需要做……做乜天氣咁凍菲兒著得咁單薄？三葉去左邊？都鐸死左未？香港幾時先有真普選？
有咩就係呢到解決！大不了就死姐！
「對唔住大佬，你話點就點，有怪莫怪，我唔想死呀！」
我將昏迷既菲兒放係地下之後向都鐸做出土下座，若果唔係天氣咁凍我會連上衣都除埋露出胸部以表誠意。
「若非必要的話我想和平解決。」都鐸抱起昏迷既菲兒，然後再道：「當然，有必要使用武力的話我都好樂意。」
唔通我就要咁樣睇住嘴邊既肥肉跌返出黎？等等，呢個比喻好似有啲問題。
「等等！」我要盡量拖延時間！
但係拖延左又點？依家有邊個會幫到我？
「唔？」都鐸依然從容不迫：「我時間有限。」
「你可唔可以解除左佢既魔法先？」我指住神智不清既三葉。
「你有乜理據覺得係我施法令到佢咁？」
呢個世界發生左乜野科學解釋唔到既事都係入龍既數……我當然無可能咁樣回答。
「因為菲兒被你催眠左，所以你連三葉都可以催眠都好合理？」
「我無催眠任何人。」都鐸答得好快。
「哈！你意思係菲兒用魔法幫你叉電，然後再引開我甚至用魔法攻擊我都係自願？」
「無錯。」
矣矣矣矣矣矣？？？？？