廢青於中世紀魔法世界的生存法則: 62, 身為戰五渣渣打擾高手對決等於自尋死路
之前我係高登睇過個故，有個情節係打電話問功夫。
既然係咁，我打電話問魔法都唔係好過份姐？
「係咪真係得架……」我耳仔貼實棵樹，靜待對方既回答。
「要不你自己想辦法吧？」
「唉，死就死。」
就係第五棵樹被燒毀之前，森宿將佢既作戰計劃講左比我聽。
老老實實，我仲未被佢說服到，始終我對呢個世界既認知唔多唔少都混入左遊戲既世界觀。
遊戲做唔到既野，我好難想像呢道係做到，但呢到係一個真實既世界。
既然係咁，遊戲中不予許而只存在係真實既卑鄙手段係呢道就變成可能……即使我仲未接受到。
突然，遠處傳來一聲非常響亮既雷轟聲，然後所有熊侏就朝雷聲傳來既方向急奔。
係喎，呢個世界電就等如魔法，換而言之佢地覺得頭先果下雷既威脅大過黑衣人？
嘛算，反正我要思考既地方唔係呢到……
我於電話中輸入一個背叛左我數次既號碼，希望呢個數次今日唔會更新。
「九九九！」
「汪－－－」三隻黑狗於魔法陣中躍出，一上場就急不及待咁亂咁吠，睇佢地個外貌同埋嚇人既吠叫聲，唔知道底細既人可能真係會比佢地嚇親……
一切都只係假象。
「去！」我唔知道個原理係點，但係三隻黑狗似乎都已經知道我想佢地做乜。
三隻黑犬分別從三路進攻，除左剛才被燒著既果片樹林之外，其餘地方依然漆黑一片，對黑狗黎講係完美既偷襲環境。
我唔排除黑衣人可以再放多次AOE炸晒成片森林，但係目前我只可以假設佢頭先招魔法唔可以短時間放兩次。
「洪！」黑衣人接連往森林放出幾招火球，樹就打中幾棵，狗就射唔中。
由於黑狗過往既表現實在太差，我決定自己都要親身上陣。
避左一兩下火球之後，我再次接近黑衣人，而黑衣人已經向我舉起魔杖準備迎擊。
「去！」三隻黑狗分別從黑衣人左中後三方躍出，並將黑衣人推倒在地，黑衣人既施法立即被中斷。
左右兩匹黑犬撲在黑衣人腰上，就好似向主人撒嬌一樣；只有正後方一匹粗暴地拉扯黑衣人斗篷。
就係咁，黑衣人就失去還手能力，跌低果陣仲非常合作地昏迷左。整個過程意外地簡單……以佢既傷害力，放招以自己為中心既範圍魔法解圍根本唔難。而圍住佢既火牆除左檔箭之外，對物理攻擊方面可以話完全無用。
打機既時侯，玩家好自然就會被數據綑綁住，神一樣既對手擁有神一樣既裝備，用劍斬唔破防的話用黑狗一樣會唔破防。
但係實戰並無「破唔破防」呢條非黑即白既界線。
除此之外，係遊戲入面攻擊以外既選項亦都有限。
而森宿頭先就係教左我一樣我諗都無諗過既野。
「若果對方的裝備是你苦惱的根源的話，將對方的裝備奪去不就行了？」
最有歷史既online game都仲有打跌對方裝備／打爛對方裝備既概念；但係最近既online game又好，其他game又好都已經無左呢樣野。
好簡單，依家啲遊戲裝備往往要用真錢，若果你使用幾千蚊先砌成既+99白金鍵盤被人地用一招技，唔好話擊落，只係耐久度上限扣左都心痛到仆街。
遊戲既平衡往往同遊戲公司賺錢既方法離唔開，成日有人係高登呻依家既ONLINE GAME唔好玩，但係另一邊廂又有一大堆人衝去玩呢啲名義上係免費既遊戲。
各位玩家們，呢個世界上係無免費既午餐，想玩隻似樣既遊戲就乖乖地比錢，順帶一提，個人推介係FF14。
尻UP完一輪係時侯做正經野，究竟要點樣炮製個黑衣人呢……
＊ ＊ ＊ ＊ ＊
「Ｆｌａｍｅ Ｓｔｅｐ！」
此次已經為都鐸第四次嘗試。
他左手＂托＂住浮空的鮮紅色荾型晶體，然後右手手掌攤開就如撥水一樣，握住一團火球衝往三葉。
明明身上已經再無重壓既負擔，但每次三葉均能匪而所思地避開。
自從三葉使用暴風雪之後，現場氣溫漸漸下降，由於剛才渡澄之怒帶來既雨水，二人身體早已沾濕，降溫速度亦因此變得更快。
換轉係普通人，可能早已經凍傷或者凍僵，但呢個兩人都唔係普通人。
少女輕輕一側身便再次化解了都鐸的攻擊。
雖然自剛才開始少女便再沒攻擊過，但另一方面都鐸的攻擊亦完全不見效。
即使係身為創世古龍提默亞祖既九子，都鐸都開始感到焦慮。
三葉雙眼並沒有仇恨，甚至連鬥志都無，於常人眼中，呢對只係因為疲憊連抬起雙眼都覺得辛苦既眼神。
即使知道原理係點，若果對方唔露出破綻的話我根本無機可乘……都鐸如此於心裡暗道。
又或者，自從三葉進入呢個狀態開始，雙方既戰鬥就已經變得無意義。
唔係，都鐸沙漏上面既沙已經漸漸溜走。
但即使係咁都唔代表三葉可以獲勝。
二人只係靠自己既特徵而處於不敗之地，但亦因此，無任何一方可以獲勝。
「不如停手。」都鐸道。
但少女沒有回應。
「再係咁你隻寵物會死。」都鐸指住被自己用雷擊打至瀕死既巨熊首領，但赫然發現巨熊首領早已不在。
「………………」少女依然沒有任何回應。
都鐸於心中嘆息，本來仲想好好地講兩句，但睇黎都係徒勞無功。
於事都鐸準備就此離去，反正一開始係對方搵自己搵上門。
但係離開之前……
就係呢個時間，森林既方向傳來一把男聲。
「企係到咪郁！差人做野！」