廢青於中世紀魔法世界的生存法則: 60, 或者大家已經唔記得左, 電話最基本既功能就係打電話

黑衣人用法杖推開我，雖然力度唔係好大，但我當時因為打擊太大而崩潰，所以被輕鬆推開。

佢順勢跳開幾步，然後輕輕一揮法杖。
與火之槍及熔岩之矛既剛烈形象不同，被召喚既只係三數火紅色既蝴蝶。

火蝶隨風飛舞並輕輕拍翼往我呢一邊飛過黎，火蝶既舞姿於黑夜中份外耀眼，不禁令我著迷。
周圍既熊侏就好唔同，佢地就好似見到鬼一樣馬上離開果幾隻火蝶，轉眼間我既視線範圍已經無晒熊侏。
空穴來風非必無因，睇黎我都係時侯走佬！

我馬上爬起身，然後往火蝶既相反方向拔足狂奔……




「滋滋………洪－－－－－－－－－－－－－－－－－」

與Micro-nova及Ultranova不同，呢招所產生既並唔係強烈既爆炸聲，而係平時係酒店廚房成日都會聽到既武火洪洪聲。
回頭一望，剛才既位置已經變成火海，而黑衣人就企係火海之中緩緩踏步，並無追擊既打算。

我挨係一棵樹之上思考應該要點樣對付眼前既黑衣人，雖然話大家都係人類，但係裝備差咁遠打碌撚咩？你打LOL都知啦，早期AD Carry打多把BF大劍已經可以唔使打！依家我係多蘭劍對對面沙漏加死帽，不如你打埋我果份啦！
由於剛才既一招將整片樹林燒光晒，依家我先留意到原來已經落返雨。

換而言之，佢既火炎魔法係已經被判弱左……糞GAME！
「半夜時份何以如此嘈吵？」





呢把聲好似好熟，係邊個黎？
咦唔係喎，會用書面語講野既人全個故暫時都係得兩個……

「森宿！」我大叫。
「誰敢在老子的地方放火？是你這臭小子嗎？」我仲未清楚聲音係由邊到傳黎，但肯定唔係森之鐲。

「最好我就有咁把炮啦！你再唔出手呢條黑衣癡線佬燒成你成個森林架喇，幫幫手啦！」
「臭小子，憑什麼要我出手幫你？三葉在哪？」





同森宿傾左幾句之後，黑衣人使出火之槍，由於佢就係我面前舉起法杖意圖太明顯，我並無花費太多功夫去避開呢招。
但係後面棵樹就咁燒焦，又係燒粟米咁橋。
而係我離開棵樹之後，森宿就好似CUT左我線一樣完全無晒音訊。

唔通要癡住棵樹先同佢傾到計？
我回想起當初老野扎營之前額頭癡住棵樹又傾又氹，原來係咁既意思！

黑衣人步離火海之後，一眾熊侏繼續零星既攻勢，雖然叫做可以拖慢佢既腳步，但始終要搞掂呢條友得話，一定要靠自己！
靠有森宿幫拖既自己！
我立即跑往另一樹旁邊，然後挨住樹幹大嗌：「喂？森宿你係咪到？」
「因為你的無能，又有一棵樹無辜地犧牲了！」

「係係係，你唔幫我的話我由佢燒晒成個樹林添！」

「你竟敢威脅我，好大的狗膽！如果你在我旁邊的話，我一鞭就把你打死！」





廢話，你係我旁邊我吠兩聲比你聽都仲得啦，但依家山高皇帝遠你吹得我漲咩？

更重要既係，你吹唔吹得個黑衣人漲！
「三葉佢同都鐸隻揪緊，依家就得我對付呢條友！」

「都鐸……你知道牠的真名了……」森宿原來都知道都鐸既底細，Well，佢都係一條相當有輩份既龍，住係同一個地區之內又好似無理由唔知。
「呢啲野係後話啦，我再唔搞掂呢條友去幫三葉的話佢好快就頂唔順！」

「哈！憑你就想介入那兩隻怪物的戰鬥之中，哪來的自信？」
黑衣人又放一招火球，轉眼間又多一棵燃燒中既巨木。

好彩我身處係一大片森林之中，要搵個電話亭實在唔難。
奇就奇在黑衣人進攻既步伐非常緩慢，莫非佢既魔力已經見底？





抑或佢根本無殺害我既打算？
「但若果有我幫助的話，也不是無可能。森之鐲有帶著吧？」

「有！」黎喇！！睇黎又可以學到新招！
「先把這黑衣人解決吧，他身上的布袍還真的有點棘手……」

「你點知佢有件神裝架？你裝左閉路電視？」

「還不是你告訴我的！雖然不知道你用什麼方法，但是黑衣人的外觀剛才清楚的出現在我眼前了，我還用自己的智識整理了這東西的能力。」
「阿！」佢係咪講緊頭先我用電話影果幅相？而且將件野既能力文字化既係森宿！？我都估撚到架喇，依家部電話無得上網連google都用唔到，若果唔係有人整蠱作怪我部電話有本事話到件袍既能力比我知！
而係呢個世界上有咩解釋唔到既野，大家睇左個故咁耐都好清楚要入邊個數！

無錯，就係龍！
「原來是你的魔具的能力嗎……看來和森之鐲的相性不差。」會唔會咁方便，咁巧合呀！？「話說我之前也曾聽家父提及過類似的魔具………不過這是後話了。」嶽砶又係適當既時侯刷左存在感。
然後黑衣人又係適當既時間燒左一個電話亭，不經不覺已經係第三棵。





「我地再係咁閒話家常真係大丈夫？你個後花園就快比人燒晒！」

「我同意，馬上就把這人解決吧。」

「話咁易咩，唔係佢放水既我死撚左喇！」

「嘛……其實也不難。」原來森宿你都係高登仔！