廢青於中世紀魔法世界的生存法則: 56, 以最強的鬥志，就算要去那裡我都可以

「兩位可以準備救人，救完之後你地自己去安全既地方就得，剩低既野可以交比我地。」

「你兩個真係搞得掂？」洛修準備起跑，但係走之前都表達左佢既懷疑。

「計劃既一開始就係建基於單靠我同嘉穎二人就可以同劫對抗呢一點之上。」土豪魔杖已經被三葉握於手中，Boss戰即將展開！
「首先要拖延時間，等其他人可以安全離開。」

「點樣做？」

「劫應該仲未留意到我地兩個既存在，首先要吸引左佢既注意先！」




聽起上黎好似好簡單，但係依家兩名騎兵均往山獄方向逃亡中，而劫就追係佢地後面，我地連車尾燈都見唔到……
「阿。」我拎起電話，極速輸入call車熱線，外賣電單車又再出現。

直到呢一刻我同三葉之間已經唔需要再講啲乜，就係我騎左上司機位既同時，三葉已經係我背後。
由於我地身處於大商路之上，沿途毫無障礙物，路線亦都幾乎係直線。

我立即就踩盡油門，數十秒之後劫已經係我地不遠之前！
「好喇，依家既問題就係點樣吸引佢注意……」三葉自語。

呢樣野你唔係好叻架咩？白石既OT大法師！




少女無用到太耐就搵到答案，就係我地同劫之間距離只餘十數米既時侯……

「Ｗｉｅｇｈｔ　ｏｆ　ｔｈｅ　Ａｌｐｕａｒｔｚ！」
於魔法被使用既同一瞬間，飛龍應聲倒地，並且岩岩好跌左係我地面前！

「嗚哇！」我感受到有人拉住我既衣領，然後用超人既力量從電單車上躍起，下一刻電單車已經撞向劫既身軀，但仿似電影特效一樣既爆炸並無發生，電單車只係好輕描淡寫咁倒地，然後消失。
「快啲起身！」我屁股此刻坐左係地上之下，但係少女並無讓我繼續休息既打算。

需要企起身既並唔止我一個，仲有劫。
「吼－－－－－」劫四腳站地後第一件事就係咆哮示威。




「你唔係落左重壓架咩？點解佢睇起上黎仲係咁生猛？」

「我唔可以出全力……依家佢飛唔到已經好好，唔好要求咁多！」
月尾你都唔發力？你係唔係想等到下年年頭先出力呀？全年之星唔係咁拎架喎！

老老豆豆，依家唔係吐槽搞笑既時侯，因為劫顯然對我地呢個組合興趣不大。
劫張開巨口，目標係我！

「搵障礙物！」三葉傳來指示，但係係大商路上面邊到會有障礙物？
咦唔係，有一個！

我立前往障礙物既方向奔跑，係火球命中之前勉強達陣！
「頂你咩！」障礙物破口大罵，然後大喝：「Ｗａｔａｚｕｍｉ　ｎｏ　Ｍｉｚｕ！」

我既障礙物就係三葉。




三葉魔法一出，一道巨型水簾就係最後一刻阻隔住劫既火球。

火水交融後，大量水蒸氣因而產生，仲發出左鐵板燒既渣渣聲！
「咁耐架……」

「乜野耐？井上麻里奈？」

「你明知自己講完啲野無人明既講黎做乜？」

「你咪又係一樣！」
水蒸氣散去之後，已經見到劫好敏捷咁往呢面衝鋒，就好似炎王龍既火車一樣！

物理既攻擊，三葉用方舟守護應該輕鬆檔得住，畢竟呢招連森宿既舌擊都檔到！
豈料三葉並無施法，佢再次拉住我條衣領，然後當我好似係貓一樣甩出去……





好邪呀！！！！！！！聽講比人打飛至半空中要咁樣講先可以大難不死。

然而，劫立即就剎停左架火車，無撞埋去三葉身上。

更加重要既係，劫又再次鎖定我！
「我做錯左乜野？點解要係咁追住我黎打喎！」

好彩三葉用重壓令到劫飛唔起之餘仲減埋速，若果唔係係我仲係半空既時侯劫接一套昇龍拳我分分鐘已經比人炒左per。
我調整姿勢著地之後，立即就輸入21800000，電單車係呢個世界入面唯一一個唔會背叛我既事物！

我騎上車之後，三葉又落柯打：「去白石鎮既方向走！」
下？點解要返白石？
我騎上車之後又再踩盡油門，劫就追係我後面，而再之後既就係徒步既三葉。

三葉老豆有三個仔，大仔叫大明，二仔叫中明，咁細仔叫乜野名？




答案係小明！因為三葉係生理上仲算係囡！
不久後，DS頭先架被遺棄既馬車已經出現係我面前，車卡內既燈光於黑夜之中非常顯眼。

但作為另一主要光源既車頭大燈忽然間貶貶下……唔撚係無電掛？夜晚渣電單車唔著車頭大燈犯法架喎！
奉公守法既我一路渣車一路打開電話查閱，明明仲有50%電！

然後連世界上唯一一樣唔會背叛我既野都背叛左我，電單車忽然消失，而我就因為牛頓第一定律，以合符牛頓第二定律既高速繼續往前仆，撞落地面之後承受牛頓第三定律帶來既傷害。
好叻呀我！點解我唔去教物理呢？湯博士同湯川教授分分鐘都唔夠我撈！
「吼－－－－」

劫既咆哮聲將我帶回殘酷既現實，呢架火車仲有五秒都唔夠就要撞落黎！
五……
「好痛……」話晒我都叫係炒車，要我即刻企起身又唱又跳係無可能……
四……
「有咩魔法可以用……有咩電話可以打呢……」





曾經有一秒鐘我係諗過打999，但係999背叛我既次數僅次於三葉，打呢個號碼只係浪費電源！
三……
時昌迷你倉……暗瘡Jackiline……戒賭熱線……戒毒熱線……

點解無個似有用架！
二……
我可以點做！點解太一你唔將我部電話變做數碼部龍機！你有無睇無限地帶架！
一……
無喇無喇無喇，咁重要既時侯我個腦剩係諗到無謂野。
對唔住呀爸呀媽，你地生左個好無用既仔，你地就當無生過我啦。

但佢兩個眼中一直都無我，咁我死同唔死有咩分別？
既然係咁，我都係唔死喇！
「到喇！」三葉大叫。

到？乜野到左？
忽然有一個黑影從我頭上跨過，然後企係我面前，用強而有力既臂彎停左劫呢架火車！

以最強的鬥志，就算要去哪裡我都可以！
「姑孖！」

係Annie隻寵物！