廢青於中世紀魔法世界的生存法則: 55, 打龍識打一定係用冰
此時騎兵牽"馬"過來，再道：「我地討論完之後認為小姐你說話不無道理，幾位請移玉步到鹿車之上等待，等任務完成之後我地便會放行。」
你地會唔會太合作？你地就唔識得懷疑下其他人？呢個睇起上黎又清純又有教養既貴族少女點諗都有疑點！
「好，我就等你地既好消息！」三葉仲要扮個天真既笑容出黎。
三名本身坐於鹿車上既DS團員騎於三名騎兵背後，一行六人策"馬"而去，此處就只餘兩個DS團既法師同我地四個。
佢地其實都幾人頭豬腦，先唔講三葉同將軍實力驚人，單從數字上考慮兩個人點看四個人？
當然，我都有可能錯，話唔定呢兩個法師都大有來頭。
我地未等法師既指示就自己從鹿車後方上車。
兩名法師坐於卡車最前既"司機"位置，而我地四個就坐係卡車最後方，如果細聲交談的話，呢個距離班法師應該岩岩好聽唔到。
「日出之前。」三葉係唔知邊到拎左套茶具出黎，此刻既佢已經品嘗緊一壺熱茶：「日出之前DS六人一定全滅。」
「但係佢地係DS……」洛修似乎仲係唔相信三葉對DS既斷言。
但顯然，三葉先係坐擁更多資訊既一方。
「無需要爭拗，等多個幾鐘就會開估。」少女舉起手掌示意停止，然後轉頭就往車頭方向大喝：「兩位大哥！」
於車頭既兩名魔法師轉身面向我地，表情都相當不友善，似乎DS唔係全部人都用陰莖思考。
「我有小小凍，方唔方便放個魔法暖下身？」
「你地四個人一個識魔法既人都無咩？」魔法師步進車卡之中，我先睇得出斗篷之下既原來係一名女姓，唔會用陰莖思考都好合理。
頭先三葉仲稱呼佢做大哥，難怪佢貌似不太高興。
「呢兩個大漢都係武人，身上只得好少魔力；而我地兩個仲後生，所以魔法造藝亦都唔係好高……唔該幫個手丫。」
聽到三葉話自己魔法造藝唔高，我地三個幾乎都笑出聲。
示弱示得太誇張反而有種滑稽既效果，但係對方完全睇唔出呢一點更加滑稽。
「嘖……Ｆｉｒｅｂｏｌｔ！」魔法師向卡車內充當燈籠既光球射出一記火球，然而火球係擊中光球之前，所有火力已經被迅速吸收，光球亦因此變得更光猛，更溫暖。
「真係厲害！」
呢個魔法師眼尾都唔望下我地，非常高竇。
「條女咁串既？」
「精靈族就係咁，除左半龍人之外完全唔將其他種族放係眼內。」將軍解釋。
出現了！常見既遊戲動漫設定，今次係精靈族！
「我係白石從來都無見過人類以外既種族，我仲以為成個恩基大陸無其他人種添！」
「海人同半龍人係一般情況下外觀同人類無分別，就算係你身邊你都未必會知。」三葉再次用茶。
的而且確，例子就係我旁邊。
「咁精靈族有咩特徵？尖長既耳朵、高瘦既體型、善於用弓同魔法？」我將一路以黎對精靈既印像照講返出黎。
「咦，估唔到你又知道幾多，唔似係第一次見到精靈喎。」
「唔係第一次，我之前打機睇動畫睇美劇都見過唔少精靈……點解呢個世界既精靈同我地世界既精靈描述會係一樣……明明係虛構既生物……」
仲有語文既設定又係，人講既語言係中文，龍講既語言係英文……
「會唔會太巧合？」
「巧合？」三葉將茶杯放於左手一直拎住既陶碟之上，然後再打一個指響，整套茶具便憑空消失。
「無野係偶然，所有野都係必然。呢句好似係你自己講？」
「嚴格黎講唔係由我講，我只係引用其他人既說話。」我到底係引用緊壹原侑子既說話，定係CLAMP果班腐女既說話？呢個問題好哲學，連我都不禁進入賢者時間。
「事物同時出現並唔係巧合，只係你見唔到背後既邏輯關係。」
一直擔任聽眾既兩名巨漢忽然變得緊張，坐於車頭位置既兩名魔法師亦有舉動。
「龍！」魔法師大叫。
「竟然係呢面黎先……真失策。」
癡線婆又講左啲莫名奇妙既野，究竟佢個壺爐入面收埋左幾多禁藥？
車上面既兩班人分別由車頭及車尾兩面落車，立即留意到剛才進入森林既六個人，只有四個人出返黎，而且仲被一條巨龍追趕住。
而講到龍，條龍當然就係劫。
「喂，無全滅喎。」嘉穎對三葉使出下馬威！
「都未天光。」
兩匹"馬"背上既四人且戰且退，但係即使戰鬥經驗極少既我都睇得出佢地唔會捱得好耐。
唔知魔法師既加入又可唔可以扭轉戰局？
「喂喂，姑娘仔我地真係袖手旁觀？」洛修問。
「如果呢班人全滅的話，DS可能會認為係我地WW做……」將軍道。
「當然，我遲早會出手，但係係我出手之前想做少少講解先。」
依家既情況可以話係值十二個趣，一方面DS既六人（馬背上四人加魔法師二人）係到玩緊芒亨，生死相搏，而且已經貓車左兩個人，瀕臨任務失敗邊緣。
而另一邊我地就極之悠閒，三葉老師仲好有心機咁準備解說，雞、鴨、雀仔、千祈唔好摸佢地既便便……哈哈哈哈。
「與劫對抗天字第一號守則。」
「Ｌａｖａ Ｄａｒｔ！」另一邊廂其中一名魔法師對劫使出魔法。
「千祈唔好用火屬性魔法及純魔法。」
火炎打係劫既鱗片之上，就好似泥牛入海一樣，完全起唔到任何作用……
唔通同之前劫吸走三葉既ultranova係同一原因？
等等，唔止咁簡單！劫身上被火球擊中既位置，由原本鮮紅色既鱗片漸漸變光，就好似燒紅左既鐵一樣。
傻豬，打龍用火屬？有無常識架！識用一定係用冰！