廢青於中世紀魔法世界的生存法則: 57, The Dragon Lord
三個打一個。
所謂雙拳難敵四手，依家計埋咕孖我地總共有六對手咁多。
但係常理係唔可以運用係龍身上，因為龍就係呢個世界既法則。
君不見連DS呢種專業團體都被瞬速Double Kill。
若果要打破世界既法則的話，單靠二人一熊未免太勉強……
一龍一熊互相爭持，與上次不同，咕孖並無被立即秒殺。
最主要既原因就係三葉既魔法 - Weight of the Alpuartz 嶽砶重壓。
回想昨晚自己身中呢招既時侯，我係連郁都郁唔到。
雖然劫依家仲係行得走得，但係移動速度收限再加上飛唔起呢兩點已經幫左好多。
「嘉穎，錄音。」
「下？呢種時間？」
三葉既魔法教學正係咕孖與劫相撲時進行。
「Wild hear my call, 」咦，唔係sprite？「I am a part of the nature yet the nature is a part of me. Water is my blood, root is my bone and soil is my skin. In the name of Wrathwood, let the plant grow fast, grow big and grow strong.」
「錄完，幾時用？」
「未係時侯。」
劫此時張開巨口，準備噴火，上一次咕孖正正係中左呢招零距離米加粒子炮先身受重傷。
「既然咕孖都黎到，我無必要再留力。」
乜唔係我地搵到劫果一刻開始就已經唔使再留力？
寶玉唔知幾時開始就飄浮於三葉前方。
講起上呢次只係佢第二次利用寶玉黎施法，上一次佢用寶玉係因為森宿出言不遜，臨尾秒唱左招Micro-nova黎道別，其實都幾腦殘……
即使係救咕孖又或者考試，佢都只係用自己本身既實力，最多都係拆粒寶出黎比我拎住 － 雖然我根本唔知道咁樣有乜意思。
隨住三葉讀出魔法名字，寶玉便發出強光。
「Ｗａｔａｚｕｍｉ ｎｏ Ｉｋａｒｉ」
頃刻間原本天朗氣清既好天氣轉成狂風暴雨，小弟我毫無防備立即就變成落湯雞。
可以睇得出濕氣最重既地方正係劫同咕孖交鋒既位置。
根據我打機學返黎既知識，火系攻擊傷害於雨天會減低一半。即使係咁劫既吐炎依然強勁。
咕孖正面承受吐炎大約兩秒之後便立即重擊劫既中腹將佢迫開。
原本燃燒緊既毛髮係暴雨之下好快就淋熄。
用重力控制劫既移動能力，再用天氣黎降低火炎傷害，對劫無一定既了解無可能安排到咁既地步。
「嘉穎！繼續頭先既話題。」
依家主力既重擔落左係咕孖身上，三葉就好似小精靈訓練員一樣，係見到唔對路先出手救機。
而我就更加得閒，其實我好想返入DS架卡車裡面避雨……
「你要想像。」「FF係我專長，放馬過黎。」「想像一種植物，可以對付劫既植物。」
「嘎？」
我平時唔係FF開呢味野架喎！
「記唔記得當時你形容緊一種植物比森宿聽，然後由佢創造返出黎？」
「你話橙？」
「總而言之，你就好似想像點樣描述橙一樣，描述一樣可以剋制劫既植物。」
「會唔會太難玩？草系打火系打龍系都半減……」
「咪咁多廢話啦你！」
「係係……」
咕孖四足踏地，往劫狂奔，而劫亦雙腳站起準備迎擊……就奇！
係咕孖即將進入攻擊範圍時，劫就好似鬥牛士一樣，漂亮地側身避開，然後再往巨熊背上補一招火炎吐息。
咕孖只有身體素質一項算係追得上劫，講技術講招式變化全部都唔係劫果一皮。
而且劫仲有吸收魔法傷害呢個驚天地泣鬼神既被動技，令到三葉既魔法亦毫無用武之地，唔通真係扔石頭打龍咩？
咦，我好似有個重任架喎！
有咩植物係對龍特別有效架呢？
講到攻擊性既植物，我第一樣係諗起豬籠草，但係對方係一條咁巨大既龍，單係想像咁大棵豬籠草已經唔簡單，豬籠草本身既攻擊模式仲要好似守株待兔一樣咁被動……
唔得唔得，我要再諗過！
咕孖此時走到大商路邊緣位置將其中一棵樹連根拔起，睇佢個勢都係打算將棵樹當做武器。
而另一邊廂，劫卻毫無任何舉動，佢唔乘住呢個空檔偷襲，亦都無自己搵架餐。
巨熊單手抱住樹幹，然後雙腳跑往劫，進入射程範圍時就成棵樹車埋去。
老老實實，無人會預期呢種攻擊會對劫有任何效果。
呢種攻擊對於人類黎講傷害又高範圍又大，但係對於龍呢種擁有超強肉體既物種黎講，根本連避開既必要都無。
劫只係輕輕舉起左臂架住樹幹，然後樹幹就開始燃燒。
此時三葉大感不妙並對巨熊下達指令：「咕孖！走開！」
巨熊此時立即放開棵樹就立即往後連跳三次，睇唔出佢身體咁笨重身手都幾敏捷。
被遺棄既巨木此時浮於空中，漸漸被火炎吞噬。
但係依家燒緊既火炎同佢吐息噴出黎既火炎完全係兩回事。
呢團係並唔係紅色，亦唔係藍色，而係黑色。
黑色既火炎，帶比人既感覺非常中二，但係中二得黎又永遠都咁型！
劫既身軀由暗紅色漸漸轉變成鐵塊燒紅既顏色，視覺效果就同剛才魔法師用火炎魔法攻擊佢之後一樣。
劫徒手捉住依然被黑炎燃燒緊既巨木，然後將巨木垂直安置於前方，數秒之後黑炎漸漸殆燼。
我留意到一個好怪既地方，平時山火又或者燒樹果陣，通常都會有黑煙或者灰，但係依家完全無呢回事。
雖然依家係夜晚，又落緊暴雨，但係我好肯定呢團火並唔簡單。
係三葉有進一步指示之前，無人敢輕舉莽動。
但係另一方面，咁樣亦即係我地只可以睇住劫做佢自己想做既野，係戰鬥中可以話係大忌。
蘭卡特講過，戰士對法師既最大優勢係戰士大部份攻擊都係可以直接使用，而法師即使唱啲簡單技能（例如Firebolt）至少都要將個技能名讀出黎，而呢少少時間係高手對決之中可以話係致命。但若果戰士一比法師有數秒空檔唱魔法的話，戰局就會立即逆轉。
眼前既正正就係呢個情況。
「嘉穎！你諗好未！咕孖唔支持得幾耐！」
頂！我掛住觀戰完全唔記得左自己有任務添！
黑炎消散之後，遺下既係一條長條型既結晶體，而劫就將呢條結晶體拔起，當成自己既武器。
「呢個先係都鐸既真正能力……」
都鐸？邊位？
劫跳往巨熊身邊，然後用結晶槍往巨熊右肩一刺。
巨熊勉強避開，雖然無被刺中，表皮依然被劃出一道傷痕。
劫然後修正角度再一刺，巨熊此時滾開，並且隨手拔起另一棵樹以作抵檔，但結果樹木都只係被輕鬆切開。
「明明塊結晶都只係樹木變出黎……」我自言自語既壞習慣又出現。
「雖然塊晶石曾經係棵樹，但係已經唔係。」
「講野1999唔似你喎，可唔可以講解得快……」
「Ｂｌｅｓｓ ｏｆ ｔｈｅ Ａｒｋ！」
於晶石即將刺入巨熊身體之前，三葉立即施展護罩以保護巨熊。
但係一直以黎表現驚人既護罩，此刻都出現裂縫……
「都鐸，即係你地口中既劫，龍位係The Dragon Lord of Conversion and Conservation，人語即係變革及守恆之龍。擅長操控能源。」