廢青於中世紀魔法世界的生存法則: 54, 若果你知道三葉係邊個的話，你一定唔敢咁樣同佢講野
於大商路既前方，即係前往山獄鎮既方向，有一架卡車往我們駛來，卡車由四周非常光亮既光球所圍繞，所以我一眼就睇得出拖車既係一隻雄鹿。係深夜中開咁大燈，同對住野獸講「快點襲擊我」、對土匪講「快點打劫我」同對美女教師講「快點強姦我」並無半點分別。
若果美女教師唔係美女就另作別論。
卡車前方有三名騎住不明生物既騎兵，不久後三名騎兵已經圍繞住我地一行四人。
「係DS……」將軍低聲道。
「哦？」此展開出乎三葉意料之外，但掛佢臉上既表情依然從容。
DS呢個名詞我今朝聽過一次，當時將軍問三葉係唔係DS，而當時三葉否認左。究竟DS係乜野黎？任天堂既手提遊戲主機？
「係WW既大當家。」騎兵往鹿車方向大叫，完全不在意我地既存在。
佢一眼就認得出將軍，睇黎將軍個朵都唔惹少。
我望向開聲既騎兵，騎兵胸前有一個光球，上面有一個類似City of London市徽既盾型圖案。
「DS既各位係咪為左賞金而來？」將軍右手已經放於刀柄之上，動作非常刻意，想必係做比騎兵睇。
「係為左賞金無錯，但係懸紅既對象並唔係兩位。」
即使騎兵咁樣講，現場既氣氛並未鬆懈，維護世界和平既蘿莉一定唔會出夜街，今次呢個局點拆呢？
「既然係咁可唔可以當我地無見過對方呢？」洛修代替將軍向對方示弱，考慮到今次行程既目的，避免無謂既戰鬥係必需。
「唔可以。」騎兵決斷道：「雖然我地DS並唔係賞金獵人，但係貴會與本會亦並非毫無過節。」
我低聲問三葉：「咁係咪即係會開大片呀？」
「要打既佢地出左手啦，仲使講咁多咩？」
你又幾有道理喎！
洛修聽話後立即將掛係背上既長矛垂直咁插係前方土地之上。
然後將軍就立即同洛修講：「等等，我諗呢位大哥並唔係咁既意思。」
三葉又於我耳邊細聲道：「演技真係好。」
「下？扮出黎架？」
「你唔係睇唔出下話？呢個互動表面上係將主導權比對方，實際上就係表達『要打就放馬過黎』既訊息。」
「我地陣間唔係要同劫打架咩？雖然話主力係你姐，但係佢地兩位都應該保留更多體力？」
「死蠢，對方都唔知我地既目的！」又係喎。
「呢位大哥，我地只係護送後面呢兩位少年去山獄鎮，無論貴工會目的係乜，我地都無意阻止。相信你地都好清楚我已經金盤洗手，我睇多一事不如少一事，未知你點睇？」
「你啲大話呃細路就得。你估你地WW今朝派咁多人出境我地DS真係留意唔到咩？」
原來對方有探子！難怪佢地由一開始就好似衝住我地而黎咁！
「呵呵，咁我明白喇。」三葉又唔知盤算住啲乜。
「幾位DS既大哥。」少女走到兩名大漢既前方，直接與騎兵對話。
「呃……你係邊個？」
「小女子係大公國伊斯洛克省(Eastrockshire)既小貴族，近日到白石旅行，豈料白石被一條不知好歹既龍襲擊……」
雖然我唔知道三葉既真正身份，但係佢單憑佢既外貌、衣著同語氣，自稱係貴族呢一點都係非常有說服力。但係佢將咁大既情報咁毫無防備既就講左比人聽？
唔係！若果對方係白石鎮有探子，佢地一定知道發生左單咁既事！
「本來我係想懲罰下條龍，先聘請WW既咁多位去教訓下條龍，佢地本身都唔係好想接受我既請求，係睇在方舟教教義既份上先肯出手。」
連自己此程既目的都講埋出黎，將軍同洛修都已經一副不妙既表情。
「哈！昔日既餓狼竟然做左方舟教既綿羊！」
洛修拳頭又握實，佢雖然嬲，但係並未衝動到會壞三葉既事。
「聽講Dragon Slayer係專門屠龍既大工會，既然係咁的話不如由好似DS咁專業既工會黎接受我既依賴好過！」
「哈……估唔到大公國既貴族小姐都有聽過我地DS既名……」
喂喂，你知唔知你令到DS既形象急速下降緊……
「當然啦。」三葉加重語氣：「畢竟我同貴團既沙加斯領主(Lord Xagas)有啲交情，佢右手好返啲未？」
三名騎兵及WW既兩名巨漢聞訊後異口同聲地「矣！？」了一聲，我無反應係因為而我不知道沙加斯是誰，若果我知道大概我都會有同樣既反應。
「咳咳，領主大人既身體狀況我不便透露，但我地小隊正正係奉沙加斯領主之命討伐最近於白石出現既惡龍。」
「咁就岩喇！」三葉講之前仲露出左0.2秒計劃TONY既猙獰奸笑，若果我唔係望實佢個樣，我都可能會留意唔到。
「既然如此，我地WW亦無謂班門弄斧。我地就此告辭。」將軍拱手告退。
「邊個話比你地走？」騎兵又開聲。
「我都覺得唔可以比你兩個走。」三葉附和：「如果唔睇實你兩個的話，DS既各位點樣可以放心屠龍？」
「呃……又係喎，哈哈……」將軍既笑容非常生硬，同頭先既演技完全係兩回事。
「既然小姐你都咁講，我地就出發。」
「咪住先，單靠我地邊到可以睇實兩名大漢？你地陣中有無魔法師？有就留低同我一齊看住佢兩個。」
「呃……點解要係魔法師？」騎兵又問。
騎兵此刻已經被三葉大小姐帶住黎遊花園。
「唔…………」提出要求既三葉竟然一時講唔出理由。
係囉到底係點解呢？
「幾位有所不知。」難得有機會，本大爺立即出招救機：「係白石附近有一種稱為熊侏既生物，對魔法使用者反應好大，因此帶魔法師去討伐惡龍的話，反而可能會引來熊侏造成被兩面夾擊既困局。」
「喔……！講起上黎又好似聽過白石有呢種生物。」
三兵騎兵走到遠處商量，而我地一行四人亦都開始自己既討論。
「睇唔出你條廢柴都有啲急智。」
「你算唔算係讚緊我？」
「姑娘，你剛才講果番話動機為何？」
「非常簡單，你覺得打一隻狀態良好既劫簡單啲定係打一隻岩岩先開完片既劫好啲？」
當然係執人死雞比較好！
「我都有考慮過呢個可能性，但係你怕唔怕DS真係殺左劫，但係又搵唔到雪菲兒，咁我地咪無晒線索？」
「得罪講句，就算你留返劫條命都唔代表可以搵到雪菲兒……」我道。
我覺得我地可能從根本上就搞錯左，搵到劫未必等於搵到菲兒，只不過我地此刻毫無線索先被迫從此下手。
「呢層兩位大可以放心，DS係無可能殺死劫，再者劫一定唔會離開管理員小姐。」
「但佢地係專門屠龍既Dragon Slayer喎……」洛修道。
真係慘，睇黎三葉既瘋言瘋語會令到洛修既世界觀崩壞。
好彩我黎到嶽砶無耐，係世界觀尚未建立就遇見呢個癡線婆，否則我都會受到同等既精神傷害。
「Dragon Slayer平時一般接既任務都只係討伐或者驅逐亞龍(Wyrm)，一般DS團員對真龍(Dragon)既經驗屈指可數，更何況係劫呢種咁高階既真龍。」
「請問……」
「你同……」我與將軍同時發問，然後將軍示意我問先。
「請問亞龍同真龍又有咩分別？」
「亞龍只有兩隻腳，係由瑞亞創造出黎既物種又或者係被無比敵傳送而來既物種；真龍有四隻腳，係呢個世界既原居民。雖然亞龍之中都有強者，但係一般黎講真龍都係比亞龍高幾個層次。」
諗返轉頭，我暫時見過既兩條龍（劫同森宿）都有四隻腳。
「將軍你係咪有野問？」
「你話過你自己唔係DS。」「無錯。」
「咁你同DS有咩關係？點解你會識沙加斯？」
「其實我就咁隨口講佢地都唔會知我係咪真係識沙加斯……雖然我真係同佢有啲交情。」
「喂喂，個沙加斯係乜水？好巴閉架？」我低聲問洛修。
「DS係全大陸頭十大既工會，而沙加斯係DS蒂芬妮亞分部既話事人。」
哦，咁即係同啲國際大企業既地區行政總裁差唔多姐……
屌！咁咪即係好大粒？
此時騎兵牽"馬"過來，再道：「我地討論完之後認為小姐你說話不無道理，幾位請移玉步到鹿車之上等待，等任務完成之後我地便會放行。」
你地會唔會太合作？你地就唔識得懷疑下其他人？呢個睇起上黎又清純又有教養既貴族少女點諗都有疑點！
「好，我就等你地既好消息！」三葉仲要扮個天真既笑容出黎。