廢青於中世紀魔法世界的生存法則: 53. 好玩既Online Game總係離唔開充滿火藥味既工會(牙骹)戰

斥侯於小巷中向三葉匯報消息之後，我地馬上就離開尷尬之地，轉眼間已經出發前往劫既所在之處。
白石鎮西北偏北8里，北方大商路。

於此處眺望，尚未到達水平線既盡頭之內已經可見大公國既國境線。
無數光球飄浮於國境線之上，即使此刻係黑夜都可以一眼就知道大公國同龍降盤地之間既界線係邊。
不經不覺間一行四人已經站於國境線之上。
「過左呢條線，大公國既法律就無效，準備好？」將軍問道。

「被懸紅既係你兩個，你地擔心自己就可以。」三葉回答。
的確，我身無分文就算打劫都唔會揀我，我驚閪咩。





我驚！我驚WW兩位師兄比人斬果陣刀劍無眼會傷埋我！
但係我地既陣容又有將軍又有三葉，仲有個實力未知既洛修，除非對方帶二十人黎開拖，否則我對自己既人身安全都好有信心。
「咁就上路。」

將軍死亡FLAG已插。
我好似電波少年一樣跳過國境線，幼稚既舉動換黎既係三葉既白眼。

國境線以外既氣氛並無大變，依然係漆黑一片，四野無人。
「漫漫長路，三位介唔介意解釋下點解WW既各位巴打點解一離開大公國就會比人襲擊？」





「巴打……？」眾人疑惑。
「Brother，龍語既兄弟咁解。」

三人均恍然大悟地哦一聲回應。
「睇唔出你都識啲龍語。」將軍算唔算係讚緊我？

「碎料，你地知唔知乜野係seed？」
將軍及洛修均搖搖頭，顯然知道答案既貴族少女懶得回應。
「Seed你地都唔識，正一不孝子。」





二人互相對望，此時三葉終於加把口：「佢兩個既顏色變得好迷惘，你快啲開估算啦。」
「Seed，即係種子。」

「點解唔識種子就係不孝？」將軍問。

「我地讀得書少，唔識龍語，你係咪有意見？」洛修既反應比較大。
「嘿嘿嘿……講你地都唔明。」

「啪－－－」換來既係三葉一巴，WW兩名猛男眼見三葉對我話刮話刮顯得目定口呆。
「唔好再聽呢條友講埋晒啲廢話，不如講下比較有營養既題目……」

「你想要咩營養？蛋白質？」「啪－－－－」又一巴。
「不如由『工會』講起，有無意見？」





我輕撫面頰兩旁被掌摑完既位置：「好呀。」
「工會最廣義既定義就係於『三國工會名冊』上已登記既團體。而WW都係於名冊上已登記既團體，換而之我地WW都係工會。」

「三國工會名冊又係乜春？魏蜀吳？又一隻以三國做背景既Online Game？」

「你可唔可以唔好擲亂歌柄？」三葉拉扯我左耳，我塊面上面可以比人攻擊既地方都應該已經被佢攻擊過。
「三國就係所羅門國、蒂芬妮亞同……」

「巴克撒大公國，葛萊芬多十分！」

「錯！」

「錯！」

「錯！」




三人同時叫出，然後洛修再公佈正確答案：「答案係海奧。」

「海奧又係邊到黎？點解我從來都無聽過有呢個國家？」
「其實恩基大陸上面既國家唔止三大國，不過通常歸屬於三大國既附屬國家都會被歸納於三大國之內……而海奧就係同龍坑盤地山獄鎮一樣，無歸屬於三大勢力既獨立勢力。」
「其實將軍同洛修都係海奧人。」三葉補充。
「請係五句之內解釋海奧係乜野。」

「一、海奧位於恩基大陸北方既登陸灣，被所羅門國同蒂芬妮亞夾住既小國家。」

「哈……一個夾於兩強之間既小國點解仲可以生存到？」作為摩擦力特強既高登仔，我立即就留意到佢既G點。
「你咪咁心急。二、海奧係受到渡澄保佑既國家　－　或者咁講，海奧就係渡澄既國家……」

Incase你歷史考開零分，記聲優名叻過記歷史人物名的話，咁我就提提你：渡澄係提默亞祖第三子，號稱天與海之龍。

「……邊個國家敢打海奧，就會受到懲罰。而渡澄作為掌管氣侯既龍，無人會想得罪佢。」




「有破綻！」鄭華生又出現。

「你好煩呀！」

「既然海奧有渡澄照咁巴閉，點解佢又甘於做個小國呢？」
「三、海奧係一個非常排外既國家，佢地既種族係以海人為主。」

「咦，你頭先話呢到大部份人都係海人，但係驟眼睇佢同一般人無乜分別……」
就咁睇，WW既員工，包括將軍同洛修，同埋頭先個斥侯都係亞洲人既臉孔，同本地普偏白人臉孔的確係有啲唔同。

但係我係到生活左一段時間，開始麻木，若果唔係三葉提起我都未必留意到。
「將軍，麻煩你。」

短時間之內三葉已經當對方係自己手下一樣。
將軍二話不說就將腕甲脫出，然後露出自己同亞洲人無異既黃皮膚。




此時我又伸出自己既手腕，再問道：「有分別咩？我有毛佢無？」

然後將軍用力握拳，一層暗藍色既鱗片就好似百葉窗關上一樣，由皮膚下面漸漸滲出。

除左手腕之外，將軍大半個臉頰都被同樣深藍色既鱗片所覆蓋。

「如果你唔係咁多手毛的話，我都會誤以為你係海人。」
睇黎我頭先9UP出黎既分別真係分辨海人同亞洲人既最佳方法。
「總而言之，海奧就係屬於海人既國家，對於其他種族既領土佢地無意侵犯。講完。」

「多過五句喎師姊。」

「啪－－－」換來既係三葉既第三巴。
「個場交返比你。」佢就好似講多句都嫌多咁樣將個波交返比洛修。

「等等，咁到底WW點解會被其他工會既人襲擊？」
「曾經，」回答問題既係將軍：「我地WW係一個只要有錢就乜都肯做既工會。除左討伐怪物之外，殺人既懸紅我地都會接。」
「咦……」雪菲兒一直貫輸比我既世界觀唔似會有呢啲事發生，由於生存太困難，所以所有人都必需要合作先可以活命……
然後我又諗起各種美劇同動漫，Lost、Walking Dead、進擊的巨人……就算環境再惡劣人類都總有方法可以自相殘殺。
只不過係呢個世界自相殘殺既並唔止人類呢個種族，仲有海人以外其他我仲未見過既種族。
「久而久之，終於輪到我地WW變成被懸紅既工會，呢個亦都係我地逃亡到大公國既原因　－　因為大公國並唔係行工會制度，工會間既殺戮並不容許。」
「工會制度？」我又聽到個新既名詞，每當我識得既野更多，就會意識到自己唔識既野更加多。
「我好想再繼續解釋比你聽。」洛修說：「但係似乎要等下次。」

除左我之外既三人都非常警戒。
「有客到。」