廢青於中世紀魔法世界的生存法則: 48, 絕望真相 - 英雄的本質
「就算我唔夠打，我都唔會乜都唔做！」其中一名傭兵大聲喊道，其他人均點頭同意。
「咁你會點？明知唔夠打都不惜一切咁嘗試？」
「唔係咁點呀？」此話由另一名士兵喊出。
睇黎佢地既集體意志都好明確，莫非係方舟教教條既影響？
「我好欣賞你地既勇氣。」三葉裝模作樣地拍掌，但係佢既語氣一點稱讚既感覺都無。
相反，更加似係嘲笑。
「好多名留青史既英雄都有呢種即使面對強敵都誓不低頭既氣魄。」雖然呢句三葉曲線將傭兵比喻成英雄，但係以我認識既三葉一定唔會將人地抬舉到咁既地步。
所謂攀得高時跌得痛，雨未下時先刮風，跟住落黎三葉就要令到班傭兵由高處墮下。
「等我同你地分析下英雄既本質。」
三葉自話自說咁走左去圓型既外圍又拎左張凳，然後坐低架起二郎腿，似乎佢有排講。不過小姐你著緊裙架，怕唔怕走光呀？
「搶答題，成為英雄既條件係乜？」
「勇敢！」「強壯！」「有智慧！」「果斷！」「有領袖魅力！」
有好多各式各樣既答案，唔知你地既答案又會係乜？
三葉掛起一個計劃Tony既奸笑，似乎一切都係佢預料之內。
「將軍，你由頭先開始就無出過聲，你有無興趣發表下意見？」
一個少女竟然可以力壓群雄，仲搶埋發言既主導權，實在係令我嘆為觀止，莫非係貴族血統賦予佢既魅力？
「我就免了……我已經活左大半世，我唔想到依家先被個後生女否定晒我一直所相信既信條……」將軍若有所思地頓一頓後再續道：「但係呢班人仲後生，你就將我唔識既野教比佢地。」
將軍無將答案講出口，但係佢一定估到正確答案既大概，而且唔願意承認正確答案先會講出呢番話。
但另一方面佢又認同三葉既正確答案，所以先將後半句講出黎。
「一定。」三葉既視線又放返係其他年輕傭兵之上，然後繼續演講：「好可惜，你地無人講到正確答案。」
「咁答案係乜野呀？」
班傭兵持續鼓燥，但少女依然慢條斯理咁按佢既步伐將討論推進：「唔好咁心急，呢到仲有一個人未發表意見。」
少女望向我，然後問：「你既答案係乜？」
英雄既本質係乜？我唔係好清楚。
但若果將英雄比喻為王道動漫作品入面既主角，咁答案只有一個。
「主角威能……」包括三葉在內既所有人都表示不惑，於是我立即補充：「呃………簡單黎講即係唔會死。」
「正確。」
「…………………」
鴉雀無聲。
士兵心裡面究竟諗緊乜？
一方面睇唔起呢個答案，但係一方面又犯駁唔到？
「英雄既天字第一號條件就係生存到，只有經歷過各種英雄事績然後又生存到既人，先有資格將自己既事績講比其他人聽，然後先會受到其他人既祟拜，而成為英雄。」三葉挑釁地恥笑一聲，再說：「畢竟屍體係講唔到野。」
睇班傭兵敢怒不敢言，痾唔出屎咁既表情咁就知道佢地仲未好滿意呢個答案，於是少女繼續。
「舉個例，只係舉個例呀。」就同鬼佬講野常用既"No offense”, “With due respect”一樣，呢種說話方式通常意味住下一句一定係極之offensive。
「假若你地既長老係十年前既龍禍入面就死左，佢仲有本事係到同大家講佢自己十年前既威水史？」好啦，呢單野係我透露比佢聽，但係估唔到佢拎出黎例子，就好似你同一個同事講上司既事非，然後佢周圍同人唱一樣。
但係顯然地，呢個比喻非常有效，原本一條又一條皺起既眉頭都消失不見。
「勇者其實就係最唔勇敢既人。」此話與冒險者唔可以冒險（出至在地下城尋求邂逅是不是搞錯了什麼？）可謂如出一轍。
「緊記！係每個英雄傳說背後都有更多因為想做英雄而失去性命既故事，但係你地從來都唔會留意，因為只有生存到落黎既人先可以講故事。」
其實同我地生活既社會好似，你成日見到媒體宣傳啲成功既領袖，然後佢地又大肆自我宣傳，但係偏偏又有好多人去學佢地果套處事方式同技巧。
到最後，佢地會自問 － 點解我學左佢地果套但係我又唔成功？可笑。
一個忙於模仿他人既自我，邊到得閒搵到屬於自己既成功？
「問題二，生存落黎既條件係乜？」
「…………」
上一條問題所有傭兵慘遭mindfucked，因此依家已經無人敢回答。
三葉苦笑，然後話：「睇黎無人想理我，嘉穎你黎答得唔得。」
佢呢一刻就好似大學既lecturer一樣，見有人答開問題就會繼續問佢。
你以為比人問果個好慘咩，其實個lecturer仲慘，聽書啦柒頭！
我無乜求生既經驗，更加從來無諗過做勇者，但以我平時打LoL既經驗，想要生存，最重要既係……
「記得買眼，記得睇小地圖，同埋記得唔好送死。」
「雖然唔係好明你頭兩樣講乜……但係最後果項正確。」葛來分多十分！
「你地以為傳說故事入面既勇者全部都係見到乜野怪物都去挑戰一餐，照單全收既人？錯！以蒂芬妮亞第三朝立國傳說為例，狄亞皇后係充分理解當時所羅門國科技既弱點、自己既長處同埋戰場既地理先可以創造出以少勝多既傳奇。
識得審時度勢，知難而退先可以生存；而只有生存既人先可以成為傳說。」
其賓我對三葉講既野並唔係100%同意。
佢講既野基本上就係教你要開Pussy Mode做人，但若果全個社會所有人都開Pussy Mode，咁個社會會點？而我二十幾年黎就一直係Pussy指數極高既社會到生存。
但係我唔敢同三葉講，尤其係呢一刻。
因為我知道佢幫我辯護緊。
「若果劫來襲當時，係圖書館附近既唔係呢條友而係你地，今次意外白石村既損失就唔止係一個圖書館管理員，而係一個管理員同一個士兵。而對你地既家人黎講，損失既就係一個家庭成員。」
三葉越講越起勁，又開始拉埋老野落水。
「你地以為你地既長老真係擊退劫同暝咁勁？佢只係趁兩條龍打得難分難解，兩敗俱傷果陣出黎執死雞。」
呢一句聽起上黎好負面，但係佢又立即補充：「但係呢個係佢當時最佳既選擇，換轉係我身處於同一處境，我都會咁做。」
「夠喇。」係三葉進一步塗毒班傭兵既思想之前，將軍終於出言阻止。
「對於你呢一堂課，我不置可否。」將軍面向佢既下屬，以訓話既方式道：「要唔要做勇者，係你地自己既選擇。」
社會就係咁奇妙，當所有人都係Risk taker，成個社會面對既風險就會好高，好容易就動蕩。
但另一方面，全個社會都係Pussy的話，成個社會就會停滯不前。
而方舟教既教義似乎係就想所有人都做Risk Taker，人人為我我為人人。
但係係我眼中，好似伯雷咁樣既人（no offense），終日只需要對人指指點點，自己就舒舒服服坐係大聖堂坐享其成，等其他人服務佢。
人人為我，我食花生。
而我呢？我要點樣選擇？
雖然我暫時仲係為人付出果一方，但係作為一個執輸行頭慘過敗家既香港人，總有一日我會成為食花生既一方。
「至於你想講既野，我地已經明白，我地唔會再敵視呢個後生仔。」
將軍既眼神變得從容。
「但係，菲兒我地點都會救返返黎。」
「正好，我都打算同你商量呢件事。」
三葉拍拍心口，再道：「就係琴晚，你地既長老同伯雷主教已經委託左我去救返管理員小姐。只要配合我的話，你就可以達成睇住兩個女大同埋救返管理員小姐兩個願望。」
救世主三葉降臨。