廢青於中世紀魔法世界的生存法則: 47, 世界和平只需蘿莉

於三葉宣告魔法名字既同一時間，我腳下既土地就開始晃動。
「嘩嘩嘩！！」唔好睇我可以輕描淡寫咁係到描述好似好輕鬆，我已經被強風加地震搞到就黎跌低！但係我以面對家庭暴力都視若無睹既強大精神力去應付，總算力保不失。
當我回神既時侯，將軍已經係我大約四米以下。

所有野都係我四米以下。
以我為中心半徑約30cm範圍內既土地全部因為三葉既魔法而被推高四米。

而四米就係平時去網球場見到既鐵絲網高度，我知齋講高登仔係唔會收貨架喇，睇圖啦！







「我開始明白你點解會咁有自信。」

將軍稱讚三葉既同時，一道緋紅色既光成為左將軍掌中武器既延伸。即使將軍站於石柱兩米之外，我依然感受到佢每一下揮刀都令到石柱晃動。
此時三葉臉上竟然有一絲興奮既表情。

「竟然用刀背就可以做到呢個地步……」
由於我坐左係石柱正上方，所以無可能知道條石柱比佢打成點。

「差唔多係時侯，獅吼！」




伴隨將軍既揮刀，一道熾熱既金光打橫地貫穿左整條石柱，稍微延遲之後更發出有如獅子咆哮既巨響。
「屌！」我將寶玉同杯具放於大脾之上，然後急忙地雙手護耳。

誰不知下一秒鐘我腳下既石柱忽然碎裂，重心轉移情況之下我終於都坐唔穩！
「阿－－－－」我不顧形象霸氣盡失地慘叫，雙手抱住寶玉，準備迎接跌落地面既衝擊！

至於套杯具，是旦啦，幾層太古城同一套杯具，邊樣重要啲係人都識揀！
「Ｔａｎｇｉｂｌｅ　Ａｉｒ！」

魔法一出，我下跌既速度立即減緩，到最跌落地下時既傷害已經同跌落床分別唔大。





至於套杯具，係我已經跌落地既時侯仲係地面上數cm好似掙扎緊一樣。
數秒之後，杯具既碰撞產生清脆既「丁」一聲，然後安然著地。

但陶瓷杯既杯耳已經脫落。
兩人一話不說，因為需要講既野已經用行動講晒。

與此同時，天使既聲音出現鳥。
「爸爸。你要去邊呀？」幼女既聲線迅速吸引我既注意力，我朝聲音傳來既方向望過去，我認得佢。
在場已經七國咁亂，你老豆岩岩先同人開完大片，隻蘿莉竟然一啲反應都無？

睇黎隻蘿已經被人調教過，睇怕將佢丟去餵蟲，佢既psycho-pass值都唔會郁。
「謝絲，做乜唔乖乖地留係屋企？」

呢隻蘿莉就係當日係白石幼稚園(即係圖書館)上堂果陣坐我隔離果隻萌蘿。




「嘉穎，你既顏色又變得好難睇……」

「嘻嘻………吓？……係咩？」三葉向我投以厭惡既眼神，但係我已經習慣左。
重申，我唔係蘿莉控，我只係都鐘意蘿莉。
「咦，嘉穎哥哥！」我既淫笑聲引起謝絲既注意。

諸君！！！
「喂！謝絲！」將軍抱起左本來想衝黎我身邊同我打招呼既小蘿莉，再續道：「我同哥哥傾緊計，你乖乖地唔好阻住得唔得？」無耐之前將軍仲係殺氣騰騰，此刻已經慈父模式全開。
「咦，菲兒老師呢？」

謝絲呢句就好似「咁三家姐呢？」一樣，為全場帶來沉默。
「錦星，送謝絲返去先。」將軍將謝絲放返係地上，然後用手輕撫佢額頭：「爸爸好快就返黎，你係屋企乖乖地同看護姨姨一齊看門口等我返黎好無？」
「點解你著住成套裝甲既？」

「…………」




「你係咪要去打仗呀？」

「…………」
「你會唔會好似以前咁唔返黎架？」小蘿莉開始聲淚俱下。

令到蘿莉流淚既人唔可以原諒！！！
「………錦星帶佢走。」

然後叫做錦星既下屬（唔係筋肉侍應）就抱起謝絲慢慢離去，隨住小蘿莉既喊聲越黎越細，大人間既對話又重新展開。
「失禮。」將軍率先道歉，傾傾下正經野果陣個女亂入仲搞左場大龍鳳，對於將軍呢種大男人黎講，關家姐之數不亞於剛才三葉一柒。

「一啲都唔失禮，我同你個女咁上下年紀果陣百厭好多。」三葉竟然幫將軍打圓場。
果然係邊個世界都好，蘿莉就係愛與和平既使者，謝絲一出場原本暴力非理性既對話就變到好似全國人民大會一樣全票通過咁。
「若果可以的話，我都想用多啲時間陪佢，然後睇住佢變到好似你咁，婷婷玉立。」





「心動不如行動，依家就除低套盔甲。」

「唔得。」將軍狠盯我一眼再道：「我要救菲兒返黎。就算我唔去，我班兄弟都會去，作為首領亦不得不去。」
「係進一步討論之前，先將說話講清楚。你地之所以當呢條廢柴係殺父仇人，係因為佢無好好咁保護好……個姑娘叫咩名？菲兒？」

將軍一個點頭同時回答左兩個問題。
「在座有邊位敢話自己即使面對住都……」三葉好似講錯野咁頓左一頓，阿左一聲，然後繼續：「……咳咳，面對住劫都可以保護到菲兒？有既請行出黎。」
有動作既人數：零。
「咁你地憑乜野討厭呢條廢……丫唔係，呢個人？」