廢青於中世紀魔法世界的生存法則: 49, 地方大既唔好處就係搵野都特別麻煩

除左剛才石柱突起既位置之外，WW裡頭已經恢復原狀。
「西部大陸鴕胸肉配野鞠。」將軍直接將菜色放於我及三葉面前。

「灶頭咁熱你仲著住成套盔甲？」我問。

「依家啲後生仔小小野就呻辛……」

「得喇得喇，我錯，我唔問喇。」
我同三葉兩個人只係點左一份菜，因為份量真係好大，就好似當晒所有客都係地盤佬咁樣。





「我唔客氣喇。」

「感謝瑞亞之惠……」有其他外人係到，我唯有將啲禮貌做足，而三葉既「我唔客氣喇」真係講得出做得到，一啲都唔客氣。
進食時間，將軍亦坐於同一張檯睇住我地享用由佢烹調既早餐。

「其實我好好奇，兩位係咩關係？」

「同事。」

「拍檔？」




明明講緊同一樣野，但係我既回答並無蘊藏任何感情。
「我食飽喇。」三葉雙掌合十，碟上面既食物已經全清。

好快！
「就係個廢柴仲食緊野既時侯等我同你解釋下現狀。首先，我就係琴日係廣場就職測試果個魔法師。」三葉已經假設對方係知道成件事既來龍去脈。
不過呢單野咁大單，而且將軍仲識得怪責我，我相信佢都清楚劫入侵圖書館既經過，唔需要再額外花篇幅解釋。
「就係頭先同你交手既時侯我就有呢種感覺，適齡參加就職測試而且又有呢種魔法造藝既，唔會有第二個。」

「我姑且當你係稱讚緊我。」





「我的確係稱讚緊你。」
就係高帽大平賣既時侯，我又食左塊大陸鴕胸肉，如果塊肉唔係咁韌的話，拎去炸都應該幾正。陣間係到開間KFC，自己渣埋電單車送外賣，再連鎖經營開係全國……嘩，達已發。
「其次，白石鎮其實曾經想派佢地既士兵黎幫我手，但係我拒絕左。」

「唔？」將軍覺得好奇，再追問：「何解？」

「夾唔埋。」

將軍遲疑地問：「蘭卡特？」

「無錯。」
將軍先冷笑一聲，然後再豪邁地大笑：「難怪。」

似乎蘭卡特個朵一早已經臭晒。





「作為一個武人，以佢既年紀的確仲有大把世界。」

將軍幫自己倒左杯熱茶，然後再細嚐一口，暗道一聲：「好茶！」
置入式廣告真係無處不在……
「但係作為一個人，佢仲有好多野要學。順帶一提，我都算係佢半個師父。」

「咁你唔教下佢啲禮數？」

「就係我想既時侯佢已經唔再係我徒弟……出身唔錯，天資又好，仲生得幾好睇……佢會目中無人都好合理。」
「佢生得好睇？」

三葉似乎唔係好同意，但係佢轉頭望望我，我口入面又擔住一舊肉咁樣望返佢。

「唔……姑且承認佢係幾好睇。」





點解你望完我就改變左自己既觀點？係咪可以解釋下？？
「希望你手下留情，以後多多包涵，唔好太為難佢。」將軍稍微低一低頭。

一個四張幾五張野既大男人竟然因為人地既事向個少女低頭。
「恕我做唔到。」三葉都飲左啖茶，再話：「因為就係琴日我已經重重打擊左佢一文不值既自尊。」
將軍先係顯得擔心地頓一頓，然後又好似已經釋懷咁再話：「係咩……」

「我對呢個人實在無乜興趣，入返正題啦我地。」

將軍點頭回應，而同一時間我仲未食完，究竟三葉點先可以係咁短時間內食左半個餐。
「同劫戰鬥既重任，會由我地兩個黎擔任返。」我地兩個？計埋我？

「我無意冒犯你，但係……」又係呢個句型！「得罪講句，派你地去同劫正面開戰，只會增加無謂既死傷。」
將軍深呼吸後再講一句：「我明白，咁有咩係我地幫到手？」





「有，非常重要既職責。」
三葉打左個指響，然後召喚左土豪魔杖。

「若果我想的話，我可以立即就知道劫既位置。」
但係佢無咁做。

「但係你無咁做。」將軍將我心裡面諗緊既野講左出黎……但係咁明顯既引子，阿豬阿狗都睇得出。
原因我大概估到，但係我交返比三葉自己解釋。

「因為若果我用果種方法的話，劫就會立即知道我既位置，並且知道我搵緊佢。我地用雙腳行，而佢用雙翼飛，我地無可能追到佢。」
果然係同粒寶玉有關。

一講到呢到，將軍就已經明白三葉需要幫手既係乜。
「我地既任務就係搵劫出黎？」





「無錯。你地人數多，而且有默契、訓練有素；除去唔可以同劫正面交鋒一點，你地係非常大既助力。若果你地唔主動發動攻擊，以劫既習性應該都唔會傷害你既下屬。」
「聽你講你似乎好熟悉劫。」

「算係同佢有啲恩怨。」
將軍諗一諗之後再低聲問：「你係DS？」

「唔係。」三葉乾脆地回答，再下指示：「安排人手方面你先係專家，我交返比你自己決定，先將搜索範圍定係城牆外二十里範圍內。西北方額外多派人手。」
之前聽菲兒教過呢個世界既其他單位，三葉口中既五里應該係講緊英里，半徑二十英里範圍即係大約1250平方英里，順帶一提香港土地面積係大約420平方英里，即係佢地搜索既面積有五個香港咁大。
將軍聽畢後立即企起身，然後轉頭面向佢既手下開始部署。

同一時間我終於食完個早餐。
將軍將一幅地圖鋪係另一張檯既檯面，我同三葉走近去睇，就係幾乎同一時間，我頭先用完既餐具已經有人收起左，極有效率。
「二十里……即係要係大公國國境以外搜索……」


佢用手指係地圖上畫左個圓圈，圓圈以白石鎮為中心，而圓圈既北面有一塊相當大既面積係係大公國國境線以外。
「即係點？會好麻煩？」我問。

「唔………」將軍及三葉均發出代表思考既聲音。
「WW既安全活動範圍係大公國國內，一離開國境線就有可能被其他人襲擊。」

「咦……點解會得出個咁既結論？我係咪漏左啲咩唔知？」

「有機會我再同你解釋。」