廢青於中世紀魔法世界的生存法則: 46, 高手過招既時侯互相稱讚係潛規則
「講得好地地做乜郁手郁腳？」三葉既語氣已經變得好重，與差人盤犯既語氣相似。
「小妹妹，你非常有膽色。」
「過獎。」三葉肯定無謙虛既意思，佢咁回答一定只係出於咁樣講比較有型。
「你唔係第一個咁講既人。」你睇，我無講錯佢。
「希望我唔係最後一個。」
又一輪沉默，明明搞事既係我，但係同將軍嗌曬交既係三葉，呢條八婆既英雄主義到底為佢生左幾多事？
三葉將土豪魔杖直接擱左係自己坐椅旁邊，然後繼續舉杯用茶。
「若果我無估錯，你地成班人係準備去討伐『劫』？」三葉說畢後又飲左啖茶，你係咪咁口渴呀？
「小妹妹你咁冰雪聰明你又估唔估到點解我地要去討伐劫？」將軍已經間接承認。
「因為去救人？」
「無錯。」
「邊個指使你地？」
雪菲兒係白石鎮既地位三葉可能唔太清楚……其實我都唔係好清楚，只知道佢人面好廣，仲好受歡迎，直頭係Ms. 白石（為免誤會，我係指好似香港小姐咁）咁樣，美貌與智慧並重，胸前雙乳同樣好重。
係三葉既腦海裡面，佢諗既大概係 － 點解白石鎮委派左我去討伐劫之外仲要再搵人去？係咪唔信任我既能力？等我燒撚左你班仆街含家剷條村先 － 好啦，最後果句係我FF既。
「昔日既我或者仲會為左幾個臭錢賭上自己既性命。但如今我已經有個放唔低既包袱。」
「幾雄糾糾既男人都好，有兒女之後都會變得婆婆媽媽……同某條終日宅係森林深處既龍一樣……」可憐既森宿躺著也中槍。
「好似你呢種毛都未生齊既小妹妹根本唔明，等你有家室之後我地先再討論。」
「同一番話我已經聽過，你想唔想知當時我用左咩黎回應佢？」
ＭＩＣＲＯ－ＮＯＶＡ……
「將軍，不如你直接講下我有咩得罪左你？」我立即將話題拉開，以免三葉真係走火。
殊不知將軍就率先走火，佢拔出藏於腰間既武器，大力一劈，成張鐵檯就被一分為二。
我強忍住肛門裡面準備破閘而出既糞便，然後不斷說服自己無野既無野既無野既我先企得穩。
而另一邊廂三葉仲係到氣定神閒咁飲茶。
「好武功，但係整爛晒啲野你第時點做生意？」佢好似嫌將軍未夠嬲咁樣，仲要火上加油。
「開餐廳只係興趣，武人先係我正職。」
「一個早餐夠膽收咁貴，你既廚藝一定好好，唔知你既武藝又點。」
女人仔始終會對果小小錢耿耿於懷，比錢果個都未投訴你出乜野聲啫！
「試下咪知。」
此話一出，在場既其他傭兵就立即將所有檯凳搬開（除左三葉坐緊果張凳同已經被劈爛果張檯）。
Wonded Wolves裡面以我們三人為中心僻開一個圓圈，外面被鐵檯鐵凳及傭兵包圍住。
無人叫囂，無人想幫拖，所有人都只係好理所當然咁靜待所有野發生，就好似佢地已經見慣呢種場面一樣。
「想點比法？」三葉將杯碟遞比我，究竟想點？將我當係工人咁使？
我係有自尊架！
「拎住啦！」「係……係……」
我從三葉手中接過杯具。
其實呢場交會唔會打得有啲無謂？我都係想知點解自己咁乞將軍憎啫。
佢地兩個甚至連對方既底細都唔清楚，我覺得成件事都只係被三葉用嘴炮加鹽加醋然後就不明不白咁打起上黎。
「刀劍無眼，但係我會盡量不傷你。」將軍說畢後將自己既武器反住黎拎，似乎佢唔打算用刀刃。
「我同意。」然後三葉將粒寶玉拆左落黎又遞比我保管，今次我乜都無講就接住左。
係咪代表我已經成為左一隻唔識反抗既港豬？
丫唔係，我一向都係只係識埋怨唔識反抗既港豬。
「坐開啲，你好阻訂。」三葉企起身，指住張凳說道。
「係既……係既……」由於所有傭兵都似乎唔係好鐘意我，所以我將張凳拉離圓型中心既位置，於三葉稍後既地方左手抱住寶玉，右手拎住一套杯具咁坐好。
「後生仔，人你就無本事保護，一套杯具又唔知點呢？」
「佢初黎報道，你仲有少少武人既風骨就唔好恰佢，等我黎做你對手。」三葉將土豪杖擱於膊頭之上，頭先靠飲茶建立起既淑女形象瞬間因為呢個動作而幻滅。
「好有自信……但係……」一息之間，原來於我至少四米以外既將軍瞬間繞過三葉，於我正前方出現！
「縮土！」將軍大喝技能既名稱，先唔講點解技能名稱唔係英文，佢已經進入左大聲講野口水會噴到我塊面既範圍。
「阿，原來係咁。」三葉依然胸有成竹既語氣，睇黎佢已經有對策。
「Ｂｌｅｓｓ ｏｆ ｔｈｅ Ａｒｋ！」「兵－－－－」
連森宿呢條輩份頗高既龍用舌鞭都打唔穿既防護罩，又豈會因為將軍用逆刃斬而破裂？
「厲害，竟然於咁短時間內就可以將防護魔法設置得咁好。」將軍依然背對三葉，佢目光依然放係我身上。
「過獎，我係用左小小手段先做得到，於交流中用呢種魔法實在有欠公平，再用就當我輸。」
「不必……」將軍武器一揮，大喝：「狼嚎！」
一道強風以佢揮刀既軌跡為中心散開，方舟守護(Bless of the Ark)既護罩竟然檔唔住呢道強風，直接向我吹襲。呢道風唔單止吹亂我個頭，我甚至連人帶檯被吹郁，差啲就向後跌。
「知道我所用既魔法特性之餘仲可以針對弱點進攻……係有啲本事。」開打之後兩個反而更加禮讓，成件事係咪錯晒？
「哼……用俯視既態度？狼嚎！」係上一道風未吹完既時侯將軍再次出招，我已經感受到重心既移動，再係咁落去我一定連人帶凳跌低。
但係我依家兩隻手都拎住野咁輪盡，係強風之下連企起身都難，更加唔好話拎電話出黎出招抵抗。
「Ｇｕａｒｄｉａｎ Ｐｉｌｌａｒ！」
於三葉宣告魔法名字既同一時間，我腳下既土地就開始晃動。