廢青於中世紀魔法世界的生存法則: 45, 我講左幾多次法師千祈唔好開怪？

踏出門口之後，終於可以一睹大屋既全貌。

大屋以白石鎮裡面難得一見既紅色作主調，屋頂為深藍色瓦片所覆蓋。
http://m9.i.pbase.com/v3/42/521742/2/46464149.packer_house.jpg
但就咁睇似乎間屋係有三層，而我地間房只係第二層。

樓上仲有咩呢？
大屋外面仲有一塊碎石地，邊沿位置係綠油油係草地，最遠處就係花籬。

正面位置為一對鐵閘，我輕輕推開一邊，道閘比起想像中需花費更多力氣先開到，唔係因為我J得多身體弱，似乎係因為道閘已經好耐無用，保養得唔好。




鐵閘兩旁係一條石柱，再旁邊就係花籬，而石柱之上有一塊門牌……

「The Prince of Whitestone」點解又要用龍語寫呢？
等等……白石親王？

「我都奇怪點解呢啲地方會有間咁既大屋。」

係係係，事後孔明我都識啦。
按情理估計，掛得呢個牌都應該代表呢間屋係屬於白石親王，點解呢個咁重要既地方會丟空左咁耐，而且仲比左我地住？現階段情報太少，憑我再諗都唔會有答案。
太陽射落後頸有啲慶，但係配合山上面既強風同埋萬里無雲既天氣，再加上身處於如此有歐陸風情既社區裡面，我身心都格外舒暢，就好似去左渡假一樣。




講起上黎我都好似幾年無去旅行，對上一次係小六果陣去左長洲。

睇黎都應該搵啲機會去旅行，但係去次歐洲剩係機票都幾千蚊，就算我節衣縮食都成皮野走唔甩。
我望向走係前面既三葉，佢依舊仰首闊步，睇起上黎完全唔似係用核武既恐怖份子。

一諗起琴日果幕，我即刻搖頭，趕走於腦海中一瞬即逝既念頭。
行左差唔多十分鐘，終於從山上既離地貴族社區返回屬於大眾既低地，經過一條河流（原來叫做鐵馬河River Tamar），少女Mode全開既三葉係河邊耽誤左少少時間之後，我地終於走入群眾。

眼前已經係Wounded Wolves，但係今日無筋肉男侍應，無歐陸既休閒氣息，倒不如話連門口都無開。
以白色鐵枝組成既檯面之上今日並無擺放任何杯碟，取而代之既係刀劍同盔甲。





而餐廳裡面亦都企左唔少著齊全身盔甲既軍人。
比食環署查牌？
「你肯定呢到係餐廳？」

「我都唔係好肯定……」
其中一名軍人留意到我同三葉企左係門口並開口。

「你。」由於隔左一層盔甲，所以我認唔到佢把聲，但聽佢對我既稱呼同埋佢既身型，似乎就係琴日既筋肉男侍應。
軍人走黎我面前，雙手抽起我衣領並將我成個人舉起。

嘩乜料！好辛苦！
「你仲有面企係到！」

「爭……爭你地一餐飯錢姐……使唔使咁……」




「飯錢？哈！」士兵將我摔到一邊，仲撞跌幾張檯同凳。

嘩，好痛！呢到啲人咁暴力咁唔理性既？
軍人並未就此停住，佢向我行前數步，你又想點呀？

我勉強企返起身，然後準備轉身走佬，但三葉搭住我肩頭示意，並且企左係我同軍人之間。
「打人之前係咪應該將說話講清楚？」

「妹妹仔你邊位？依家你係咪有意見？」
三葉指住我，然後淡定回答：「佢既監護人。」

監護人！？！？你無第二種字眼咩？搞到我好似邊左你條靚咁！
「嘎？」軍人用挑釁既口氣回話。

「所以我最討厭當兵既男人……個個都睇女人唔起……」然後三葉忽然「呀」一聲，再望住我補充：「當然，唔包括你。」




因為我先係比你睇唔起果個！
餐廳既其他員工都留意到剛才我被人扔落地而造成騷動，佢地都行左黎呢面，但並無人出手幫助。

直至依家三葉一個女仔介入左先有人出手。
「留返啲體力。」

將軍身穿全套輕甲，但係無戴上頭盔，所以佢未開聲之前已經可以確認佢既身份。

佢既輕甲以保護關節位置為主，與其他人全套重金屬盔甲相比，將軍既裝束可謂非常輕盈。
金屬既部份係深紅色，而盔甲下面既布衣係卡其色，可謂非常搶眼，一睇就知佢係大佬。
「睇你似乎係話得事既人，請問你可唔可以解釋下呢個男人有咩得罪左你地？」三葉面對群狼之首依然不修飾自己既語氣，佢仲串到拎返起一張被我撞跌左既凳，斯斯然咁坐左係上面。

「首先，佢爭左我地一餐飯錢。」將軍用沉實同認真既語氣回答，而且自己亦拉出一張凳，坐左係到。
依家既情況就好似兩個社團既龍頭大佬係到講數一樣，不過對面比我地疊馬幾倍。
「錢咋嘛？」三葉打左一個指響，魔法陣便於佢手掌上方出現，數枚硬幣由魔法陣中掉落至三葉掌中。




「呢到五銀，有多既當利息。」三葉攤開五枚銀貨，好似拎住副同花順咁啪一聲放左係鐵檯之上。
「唔好意思，佢爭我地一共六銀四十五銅。」

霸氣盡失，三葉亦臉如死灰。
三葉以只有我聽到既聲線暗道：「乜依家物價咁貴既？你又唔提我！」

「你都無問……」我係到生活左一個月都無，我撚知呢到以前既物價係點咩！
「咳咳。」三葉乾咳兩聲，然後再打左個指響，今次魔法陣直接係鐵檯上面出現，並且掉下兩枚銀貨，再續道：「唔使找。」
「點解你會有錢既？」頭先被三葉一柒分散左注意力，依家先留意到呢個問題。

「琴晚個芬席柯娜臨走之前已經將今次任務酬金同你既薪金交晒比我保管。順便一提，剛才既七銀我係係你份糧到扣。」
你拎我啲錢黎同人講唔好找咁霸氣！？
將軍對其手下使眼色，該名手下便手持布袋走到鐵檯前面收集銀貨，然後仲將找續放返係鐵檯上面。
三葉見狀後以非常高調既姿態拍手，並稱讚：「有氣度。」





「我地未去到連五十五銅都要乞既地步，琴日比佢賒帳係我地決定賣人情比佢，無論點都唔會佔你地便宜。」
我趁佢兩個9up既時侯立即將找返黎既五十五銅放返入自己口袋，自己既錢都係自己袋比較穩陣。
「係錢銀方面你地非常有氣度，但係點解你既下屬要乜都唔講就要使用暴力？點解你唔既下屬完全學唔到你高尚既氣節？可唔可以比杯茶我？」三葉既問題連珠炮發，講講下轉頭向將軍其中一名下屬講，對於呢種展開，將軍既下屬都呆左一呆，邊個估到一個小妹妹敢係呢種程況下點對方既下屬做野？

「對於我下屬既事，我表示抱歉。」將軍向三葉點一點頭，頓一頓，再續道：「但若果換轉係我，我都會做出同樣既事。」
「呵？就係為左區區幾個臭錢？唔該。」三葉就好似淑女咁，一手執碟，一執拎住茶杯，吸啜左一口熱茶。

「我好歹都係以傭兵既身份過左大半身，我會為區區七銀就郁手？」
此時將軍狠狠地瞪左我一眼，右手亦放於劍柄之上，與平時日常生活中我受到既厭惡眼光唔同，佢既眼神充滿住威脅及殺氣。
三葉亦感受到將軍既殺意，係幾乎同時，三葉就召喚出魔法陣。三葉更一改平時等魔杖緩緩掉出既習慣，佢將杯碟放係鐵檯然後將手伸入魔法陣裡面粗暴地將土豪魔杖直接抽出。

現場已經係一副劍拔弩張，隨時都會開打既狀態。