廢青於中世紀魔法世界的生存法則: 44, 將密碼設定得太簡單蝕底既只會係自己
「嚴格黎講唔係你，係你部電話用左魔法。記唔記得我之前同你講過有關魔法既野？」
「記得，魔法既名稱只係一個捷徑丫嘛……」你仲解釋左點樣可以bypass個唔可以直接殺我既限制，令我肉體瞬間爆開添！
三葉以意外既眼神望住我，然後再道：「區區一個嘉穎竟然記得我講過既野……」
「過獎，我仲記得你講過Fire Bolt既咒語只有六組詞語添………等等，你根本唔係稱讚緊我？」
少女無視我既吐槽：「竟然連Fire Bolt咒語只有六組詞語呢點你都記得……我好意外。」
「但係你頭先段咒文點聽都唔止六組詞語。」
「因為元素系既魔法都必需以Sprite hear my call作開頭，後半句先係真正既咒語。」
突如其來既網遊經典名詞 － 元素系魔法。
「舉例……準備好錄音未？」
「係既大大！」錄一次就用得，呢個魔法學習系統是咪太易玩了？
「Sprite hear my call. Solid wall is merely but an aligment of rocks, nothing can block our way, or the fire shall find its own path, through distruction.」
三葉詠唱完畢之後，一道強光瞬間劃過，剎那之間便擊中前方空地，並且留下繼續燃燒緊既火炎。
此魔法於速度及威力方面都明顯地比火球術更強，而相對地咒文達到24字之長，非常接近三葉非常用魔法25字既極限。
「呢招係Lava Dart？」
「非也，呢招係Magma Spear，比起Lava Dart更高一層。」三葉自滿道：「但係平時我都好少會用呢個魔法，因為同樣級數既魔法我有其他既選擇。」
「咁你又唔教我？」本身我仲以為自己執到寶，點知個八婆都係收埋左最好既野。
「你都試下，試完再講。」
「好！」即使知道三葉仲收埋左啲好野，但係見到咁強力既魔法我都已經蠢蠢欲動，
「Sprite hear my call. Solid wall is merely but an aligment of rocks, nothing can block our way, or the fire shall find its own path, through distruction.」
魔法陣隨住咒文詠唱慢慢於電話前方形成，當詠唱完成之後，強力既火箭便由魔法陣中射出。
我望返手中既電話，白色既畫面告示住我又用完晒啲電，除此之外我仲感受到部電話散發出異常既高溫，若果部電話係國產或者韓國產既，相信已經爆炸左。
丫唔係喎，其實唉瘋都係中國製。
「果然。」
「唔好賣關子啦好嘛，所有讀者都好心急想聽你解釋。」
「諗都諗到啦，強大既魔法除左詠唱需時更耐之外，魔力消耗都一樣會增加；我當你頭先係房裡面……」少女因為尷尬講唔落去，我的三葉不可能這麼可愛。
「係裡面欣賞圖片，然後呢？」我利用多年黎累積既恥力將說話自然地接落去，然後三葉就乾咳一聲，再繼續解說。
「咳咳……我當你欣賞圖片果陣……」佢不忘係適當既地方加重語氣並且以鄙視既眼光努瞪我：「花費左一定魔力，剛才你既魔具只承受到一記火球一記岩漿之矛既魔力消耗；一記岩漿之矛大概相等於火球術五倍既消耗，即係目前黎講你魔具所蘊藏既魔力只可以放到大約七次火球術。」
「咁即係多定少？」
「當然係少啦！火球術呢種級數既魔法我唱幾多都唔會覺得有壓力，其消耗之低先係受歡迎既主要原因。你既魔力之低連火球術都要就住黎用，就算我教你再強大既魔法你都應付唔到，分分鐘仲會令到你既魔具消耗過大直接報銷。知道未呀？」
「咁……咁我點算呀？」守左咁多年既童貞換返黎既就只有連火球術都要就住射既法力？
「你放心，你仲有森之鐲。」
此時此刻我已經用布緊緊包好森之鐲並且一直戴於右手手腕之上，一黎唔驚整花隻手鐲，二黎又可以持續拎住電話叉電。
「森之鐲會隨持有者使用更多魔法已提供額外既魔力儲存量，所以只要你勤於使用魔法，魔力儲存量一定會慢慢提高……雖然究竟要花幾多時間我就唔清楚。」
又可以回魔，又可以隨住我用魔法提高魔力上限……
「我已經預見到將森之鐲合成做大天使法杖既結局……」
「講乜呀你？」
＊ ＊ ＊
翌朝。
將我叫醒既係從窗外面直接顏射到我臉上既陽光。
仲有我部唉瘋發出既遊戲音效。
咦？點解我部唉瘋會響？
「早晨。」
我立即張開雙眼，望向房間，發現身上只穿住白恤衫既三葉坐左係木凳上把玩緊我既唉瘋。
「你……！」
吐槽點實在太多，我實在唔知應該由邊樣講起。
首先，點解佢會係我間房出現？你唔使訓架咩？
點解你剩係著住件白恤衫？著咁少布你唔怕凍親咩？
點解你會玩緊我部唉瘋？我明明係有SET密碼！
「你唔使咁緊張，我逐樣答你。」
我又發動左將諗緊既野講出口既壞習慣既被動技能。
「睡眠對我黎講只係興趣，假若有需要的話我可以完全唔訓。」
「睡眠不足係美容既大敵。」
「多事。」
為防止佢擅自進入我間房，睇黎我都有需要買返個鎖！
「至於我點解剩係著住上衣，係因為我係一個有教養既淑女，所以我唔會著污穢衫。」直到依家佢既眼神都係放左係我唉瘋上面
「有教養既淑女係唔會無得到人地既同意就擅自進入人地既房間。」
「你搞清楚。」三葉頓一頓，再續道：「我係未得到你既同意，而唔係無得到你既同意。」
說畢後三葉就起身前往木門方向敲一敲，再道：「我入黎喇。」但係佢未得到我任何既回應就坐返落木凳到。
「請問你依家先問究竟有乜意思？」
「男人老狗就唔好咁婆媽啦……我尊重你，要得到你既同意，所以咪問你囉。」
「但係我未答你你就自把自為咁坐左係到。」
「你會唔會反對？」
「…………」又好似真係唔會。
「咁咪得囉。」
明知道佢講既係歪理，但係我無法反駁。
「至於第三點，我都無留意到你個魔器有任何密碼，我只係隨便輸入左個四位數字就用得。」
「邊四個數字……」我明知故問。
「0000丫嘛。」點解佢會知道我既密碼架！？「同你既人生一樣，全部都係零。」
八婆！我陣間就轉做1111！
我一動火，體力就消耗；體力一消耗，我就肚餓。
由於我同三葉都唔識得煮飯，屋企又乜都未有，想朝頭早有野入口剩低既選擇係得返出去食一項。
諗深一層之前菲兒買Cereal都好似唔使煮，今日係咪應該買返啲呢？
但係我已經食到厭左……究竟呢到既飲食有無其他選擇？
我要食KFC呀……鄭嘉穎，異世界你送唔送呀？
係廚房進行簡單既梳洗之後就見到三葉已經坐左係木樓梯到等緊。
「我已經成十年唔係到，呢到有咩野食我都唔係好清楚，食肆既選擇就交比你。」
「其實我都唔係好得你好多。」計埋琴日走數果單野，我都剩係出街食過三次野。
但係我已經決定今日就做找數真男人，目的地Wounded Wolves。