廢青於中世紀魔法世界的生存法則: 43, 想做魔法師？唔使等廿五歲既！

「將影像儲存然後再檢視係其中一個基本功能……你可唔可以解除左個魔法先？」

稍作思考之後，少女再打一個指響，班肥婆終於從我身上離去。
「如果你敢對我……」

「邊個得閒搞你呀？」我從佢手中搶過電話。
不出我所料，巨乳純情少女慘被內射既一幕，難怪三葉睇到興恰恰。

我立即禁HOME制返回主選單，然後再揀相機。
「笑。」





「矣？」我唐突既要求令到少女不知所措。
呢個表情比起佢既微笑更稀有，於是我不加思索就按下快門。

「你對我用左乜野魔法？Ｗｅｉｇｈｔ……」
「冷靜！」不孝有三，無圖為大，我立即將影完既成品比佢睇。

「……………」少女眉頭緊皺，似乎相當不悅。
「『影相』就係部電話其中一個功能，係我家鄉好似你呢個年紀既少女影相仲重要過食飯。」





「吓……」一講到香港既話題，三葉既智商就好似除左二咁樣。
「佢地可以唔食飯，但係唔可以唔影相；就算佢地真係食飯，食之前都要影相。」

「聽你咁講又真係影相重要過食飯……咁影相本身有咩作用？」
「拍下難忘一刻……？」我將類似相機廣告既slogan講左出口。

「你可唔可以講返人話（中文）？」
「將眼前既光景保存落黎？」經過森宿一役之後我已經深深明白要解釋最單純既野分分鐘仲難解釋過點解麥當勞唔賣牛河。

「你一開始咁講我咪明。」三葉眉頭依然緊鎖，但係仲未叫我刪相。




理由好簡單，佢根本無刪相拆菲林既概念。
「唔好意思，我鄉下慣左咁樣，食個麵都頓悟人生道理，大個便都要看破空塵。」

「好反智，將道理成日掛係嘴邊既行為本身已經將道理整到俗晒。」

「你同TVB啲腦殘編劇導演反映下囉。」
我準備展視下一個功能，而三葉小妹妹就好合時地講左一句……

「TVB又係乜野黎，你唔好隨便加入我唔識既新名詞得唔得？」

「你唔好隨便加入我唔識既新名詞得唔得？」同樣係少女既聲音，但係三葉明明無將同一番話重覆兩次。
「此為『錄音』，簡單黎講就係將聲音保存起黎，然後再播放。」

少女既心情此時同時被好奇同不爽兩種節然不同既感覺佔領住，一方面佢對我講既野非常有趣興，另一方面又覺得我好似開緊佢玩笑咁，過唔到自己自尊果關。
「出去。」三葉以不悅既語氣道。





「嘎？」呢到我間房黎架喎！

「我話出去。」
究竟港女無理取鬧啲定三葉無理取鬧啲？可以將呢個問題寄上矛盾等大島優子解答下我。
係三葉強推（推出房呀，好心你幾廿歲人就咪咁多性幻想啦）之下，我就比佢推左出房………

仲推埋落樓梯，再推左出屋外面。
此刻我衣衫單薄，大屋又位處於白石既高地位置風勢相當清勁，即使依家係初夏周圍其實都幾凍下。
三葉打一打指響，數個光球便於我倆四周出現，原本漆黑一片既屋外頓時變得光亮，仲有啲聖誕氣氛添！
「準備錄音。」三葉同時舉起土豪杖。

「吓？」
雖然唔知道個癡線婆諗緊乜，但係既然佢咁要求我唯有照做。





「Ｆｉｒｅ　Ｂｏｌｔ」
火球既火光於黑路中劃出一條光痕，於著地後散開，四周再次回歸寧靜，但空氣中依稀地仲有一陣火藥既苦味。
「播返出黎。」三葉道。

阿，原來個八婆係想咁。
我按一按play，然後剛才錄低既一句「Ｆｉｒｅ　Ｂｏｌｔ」立即被播出。
「………………」

「………………」
但係乜野都無發生。

果然男仔要做魔法師，守住童貞到廿五歲先係唯一方法。
「唉……」我不禁嘆一嘆氣。

「準備。」豈料三葉並無放棄。





「矣？」
「Sprite hear my call. Please set my enemy on fire.」

與剛才同樣既火球再次由土豪魔杖噴出，同樣既視覺效果完結之後，三葉立即就命令。

「播。」
都係唔得架啦，徒氣。

「Sprite hear my call. Please set my enemy on fire.」
「……………」

「……………」
都係無反應。
「你認真啲望住前面返地，將佢想像成自己既仇人一樣……」





浮於我腦海中既影像竟然係蘭卡特……我不禁眉頭一皺。
「播！」

「Sprite hear my call. Please set my enemy on fire.」

「洪－－－－」火球劃過空氣既聲音。
「Bingo！」少女興奮地握拳做出與經典meme success baby同樣既動作。


「除左咒文之外，Intention都好重要，若果你無想攻擊既目標或對象，就算咒文無錯魔法都唔會法動。」

「咦……我頭先放左下魔法？」我仲有幾年先廿五歲喎！