廢青於中世紀魔法世界的生存法則: 39, 有人話「女人係水造既生物」

兩個星期前老野仲係到沾沾自喜咁講自己同劫交過手，點解係咁重要既事件上又要假手於人？
「我清楚劫既習性，所以我知道佢會出現；我清楚劫既能力，所以我知道佢可以化解Ultranova既破壞力。」
三葉拳頭緊握，然後用沉重既語氣續道：「最重要既係，我有同劫戰鬥既理由。」
此時長老就好似諗到乜野一樣，立即就問：「你昨晚提過，你離家出走是十年前對吧。」

「無錯。」
長老又吐出白煙，後嘆氣道：「原來如此……」

「隨便你點解讀。」三葉無解釋、承認或否認。
十年前既事……莫非就係令到雪菲兒變成孤兒既果次龍禍？





但係之前聽三葉講，佢離家出走既理由並唔係因為咁。
點解三葉要呃我？

不過對個識左無耐既陌生人都唔需要講咁多同講真話，一諗到呢到我就稍稍抒懷。
我同三葉只係識左幾日，我倆之間既關係比起脆弱雞腿包更脆弱。
「你地有計劃未？」三葉幫手既事似乎已經塵埃落定，跟住落黎就係點樣救人。
「三葉妹妹，若果我地有任何頭緒的話，都可能唔需要對你低聲下氣到咁既地步。」

一直無出聲既伊曼終於開口。




（前）全村最強既魔法師同全村最博學既學者一齊都束手無策，依家既白石鎮就係咁既處境。
「其實我認為劫未必會再襲擊白石鎮，以你地既損傷程度黎睇根本無必要主動出擊搵佢。」

果然三葉都留意到白石鎮行動既不尋常之處，所以佢跟住落黎就會問……
「聽講佢捉走左個人，果個人乜野身份。」

「圖書館管理員，就係咁多。」
「或者我換個問法，若果被劫捉走既係呢條友，」佢又再用食指篤我既臉頰。「你地會唔會咁緊張？」
「…………」





「…………」

喂，你兩個出句聲啦，你叫我情何以堪？
「我諗會既……」多謝你呀伊曼大人！

「畢竟佢係個有研究價值既異鄉人。」原來我既核心價值就係研究價值，咁我既價值咪同核心價值呢個詞本身一樣咁虛無！？
「咁你地憑乜要我相信被捉走既人只係普通既圖書館管理員？」
三葉就好似一早預見對方既回答一樣，未等對方諗到籍口就已經將話接落去。
睇黎查問唔到真相的話三葉係唔會罷休。

「她是我兄長的孫女。」長老坦白，我都未聽講過原來有咁既設定。
「我仲未被你說服到。」

但係以長老既地位，佢無理由會徇私，為左救自己既堂孫女而要白石鎮既士兵冒生命危險入龍巢救人，就算佢真係有私心，旁邊既伯雷同伊曼都唔會支持佢。
「血統。老身年事已高，已經無力繁衍。而家兄一門除菲兒以外早於十年前被滅門。」





「……………………」
「而我族血統有保存之必要。」

老野同雪菲兒既血統莫非有血繼限界？
「……………………唉……」三葉沉默後長嘆，站起後於房間內來回踱步。

三葉第一次係我面前露出苦惱既表情。
「這能說服你嗎？」

「血統……你同果個女仔都係“芬席柯娜(Verdureaura)”？」

「無錯。」

「三葉妹妹你竟然連呢樣野都知道……你到底係咩來頭？」





「哈哈………」三葉既笑聲裡面完全無笑意。

「事情既大概我大致上明白，你地可唔可以比啲空間我同嘉穎傾下，五分鐘左右就得。」佢既聲音了無生氣。
長老伯雷及伊曼互相打眼色之後就離開房間，長老離席之前不忘將窗戶關上。

「伏。」木門關上既聲音。
「嘉穎。」三葉企係我面前，然後低聲向我講：「擰轉面。」

「乜料？想背刺我？」你想殺死我唔使搞咁多野啦，求其一招魔法都夠收我皮。
「擰轉面……快……」

「哦…」我本身就唔熟悉女性（因為接觸既機會少），但係三葉既不確定性已經唔係性別層面咁簡單，佢做既事成日令人摸不著頭腦，但係到最後又好似有跡可尋。
「你背脊出晒汗，好臭。」





「無人叫你伏上黎。」
三葉將自己既臉埋左係我後背。
「你信唔信命運？」呢個問題三葉第四次問我。

「我……」我說話仲未講完三葉已經繼續講落去。
「命運因果弄人，有時我都唔清楚自己係被命運所喜愛定係被命運所討厭……」

「呵？」似乎三葉並唔係同我講緊野，佢只係自言自語。
「而我過去種既因，竟然係同一刻結晒果……」

「我地世界有句名言，『呢個世界係無偶然，只有必然』。」
三葉無回答。
我心裡面雖然仲有好多疑問，三葉究竟種左乜野因？菲席柯拉又係乜野？而佢又係乜野來頭？

雖然我好想知道，但係我好明白此刻並唔係發問既時機。




上述既問題總有一日我會搵到答案。

而此刻，作為男性，我只需要沉默地讓出自己既背脊。
到最後，三葉畢竟只係個少女。