廢青於中世紀魔法世界的生存法則: 38, 故地重遊會唔會黎得太快？

同樣既房間、同樣既人、同樣既時間，唔同既只係情況。係琴日，我只係被當成偷窺者，但今日我就係令到白石鎮爭啲全滅既幫兇。
此刻大概係晚上七點幾，劫來襲之後已經過左幾個鐘頭，而我地係過去果幾個鐘就一直坐係到。好彩有呢幾個鐘頭比我冷靜同思考一下，否則我依然係恐慌之中。
但即使係咁，我依然心有餘悸……
相比起三葉既魔法，劫帶來既實際影響更加大，首先圖書館被摧毀，其次雪菲兒被劫拐走，至今生死未卜。
而造成呢一切既兇手正正坐係我旁邊，閉目養神。
與昨日游刃有餘既態度對比，今日既佢驟眼睇起上黎好平靜，但係認真睇的話好似有啲嬲嬲地。小姐你知唔知你搞左單乜野出黎？如果可以我真係唔想坐係佢隔離。

又話說，大家可能會諗點解呢個意圖係市中心引發炸彈襲擊既恐怖份子點解無比人鎖入牢入面然後再展開各種裡本先會出現既劇情呢？
重申，呢個唔係甜故。
雖然村入面既人並唔知道三葉仲收埋左寶玉呢招殺手鐧，但係係見識完剛才既魔法之後，大家都好清楚籠牢對呢個癡線婆係無用，你真係要矇住佢雙眼綁住佢手手腳腳先有機會制伏到佢。但若果真係要咁做又怕激嬲佢。





唔好唔記得，剛才既魔法三葉係無利用寶玉黎唱，若果佢發癲用寶玉的話後果不堪設想。
木門被大力推開，陣容同琴日一樣既四人怱怱走入房間。
「雜種！你睇下你搞左啲乜！」蘭卡特走到三葉面前，舉起手準備就揮拳落去。

就係雜種一詞出口既一刻，三葉原本就已經燥燥地既表情變得盛怒。
「停手！」我同老野同時叫出，但係都阻止唔到眼前發生既事。

我唔知長老想阻止邊個，但係我要阻止既唔係蘭卡特，而係三葉。
三葉召喚出魔杖口中一唸，蘭卡特就被彈開跌坐係地上，然後三葉再用魔杖指住蘭卡特既頭部。




其餘兩名擔任守衛既士兵見到自己既呀頭被如此對待，都立即想上前幫忙，但係士兵向前踏步既瞬間就立即被無形既力量推開。
「雜種，憑你就想出拳打我。」三葉冷冷道出，蘭卡特再次舉起既手不斷抖動然後一揮，然後大力摑左係自己塊面上面。
「雜種，你連被我親手掌摑既資格都無。」

三葉既眼神非常銳利，我已經搞唔清楚邊個先係壞人。
「雜種，我要為你自己講過既野後悔。」我好清楚三葉一講完呢句就會唱魔法，要救蘭卡特的話唔可以再等！

「停手。」我冒住生命危險去捉實三葉既手腕，三葉怒盯我一眼之後就甩開我，坐返係木椅上面。
我開始懷疑白石鎮管理層叫埋我黎既原因就係要我控制住三葉，等佢唔好發癲。





除左以上理由之外，我唔覺得自己有任何立場可以出席呢場聆訊。
伯雷、伊曼同長老三人都只係默默地坐係自己既木椅上面冷眼旁觀。

蘭卡特雖然先撩者賤，但係佢比人恰到咁你地竟然乜野都唔做？

「我就開門見山講。」伯雷又擔當起交涉既角色。

「嗯。」三葉雙手抱胸，雙腳交叉地坐係椅上，仰視住係地板上被魔法壓制住既蘭卡特。
「我地需要你既力量。」

難怪無人出手阻止三葉既暴行，呢個決定無可能係伯雷自己一個話到事，我相信佢係同長老及伊曼討論完之後先下到呢個結論。
而武鬥派，用手多過用腦既蘭卡特乜野都唔知就比人拎左黎祭旗，雖然有七成以上都係佢咎由自取。
「對於我揀左招有機會令到白石鎮全滅既魔法黎參加就職測試，你地唔打算怪責下我？仲等我諗左幾個理據準備辯駁添。」少女一開口又係一整個撩交打既姿態。
「三葉小姐。」伯雷又掛起佢既笑容，平時佢既笑容毫無破綻，但係此刻佢既假笑睇起上黎係幾咁牽強，但即使係咁佢都繼續講：「你事前已經有提醒過我地做好十二分既準備……但你既提點之下依然發生咁既事……責任係係我地呢一面。」
真係咁樣？雖然我對魔法唔熟悉，但係我相信三葉自己應該都好清楚無人會預計到佢會唱招核武級既魔法。




「而且劫既出現都係大家意料之外……到最後你既魔法都無造成太大既傷害……係咪？」伯雷好清楚自己此刻係講緊歪理，佢內心一定認為三葉點都要負返一定既責任，但係奈何自己有求於人，所以只可以放下顏面，扭曲事實咁迎合對方。
對於三葉既責任、動機同身份一概不問，白石鎮既管理層到底拮据到乜野地步？

今次實際上既損失只係一個村民同一個圖書館，有必要做到咁咩？
「有兩點我要澄清。」三葉舉起食指續道：「第一、撇除佢摧毀左你地一棟建築物呢一點，你地口中既劫事實上係救左你地成條村。」
我回想起今日下午發生既事，Ultranova既光球的確係係劫出現之後瞬速減弱。
「第二、我好清楚若果我使出呢招魔法會招惹到佢。」

係仲做緊生存測試果陣，三葉都好避忌用寶玉黎使用魔法，目的就係避免吸取到龍既仇恨值。
今次雖然佢無用到粒寶玉，但係點解佢明知會惹到條龍都要咁做？

而且佢自己唔提呢件事出黎的話，除左知道內情既我覺得有小小古怪之外，根本唔會有人知。
點解明知會再生事端你都要講出黎？三葉你個腦究竟諗緊乜？
「嘎……我唔得喇……」伯雷主教坐低，抹抹額頭上既大汗。





此時長老就企起身，由佢接力。
「首先，可否請你解除他身上的魔法？」老野指住地上既蘭卡特。

三葉無開口回答，但佢啪一啪手指之後蘭卡特臉上痛苦既表情就立即緩和。
「帶去休息。」長老下令，旁邊既士兵立即一左一右咁夾走蘭卡特。

此刻房間內就只得返五個人。
「事到如今我不得不說，小姐你的話令老身很震驚。」

老野係腰間拎左支煙斗出黎，然後用魔法令煙斗中既煙草燃燒，旁邊既伊曼就將身後既窗戶打開。
我都唔知道老野原來有食煙既習慣。

「失禮，此為老身之減壓良方……繼續。」
長老吸啜煙斗一口之後向窗外吞出白煙，然後話：「說實話，老身已經不清楚你是坦白還是目中無人，把這話說出是要我輩難做嗎？明明我輩已經避免提及你的過失。」
「若果要合作的話，都係一早將說話講清楚比較好。」





以為誠實就可以感動對方係情侶間常見既錯誤，你以為結婚之前同對方坦白自己曾經做過雞，新郎哥就會當乜事都冇發生過之餘仲好感激你既坦白？錯！
「有好處嗎？」

「無估錯的話，你地係想派我去對付都……劫？」

「如你所料。」

「的確無人係比我更好既人選。」