廢青於中世紀魔法世界的生存法則: 40, 「大難不死必有後福」呢句說話係邊個講既？出黎！

「目標係將圖書館管理員救回，有無錯？」

「無錯。」
五分鐘過後，三葉用平淡既語氣叫我請外面既三人返入房繼續討論。

而三葉未等長老佢地坐低就立即向對方確認委託既內容。
「我諗你都有心理準備，要完全斷尾……」少女遲疑左一下，然後換個講法再繼續：「要殺左劫係無可能。而即使我救返管理員小姐返黎，劫都有機會再將佢捉走。到時你要點做？」
「我輩亦有考慮過此問題，你認為菲兒被捉走是巧合還是……」

就算救返雪菲兒返黎，只要劫有心的話，以佢既能力隨時都可以再入村要人。




到時可以點？唔通係白石鎮裡面同劫全面開戰？

一旦開戰的話，對白石鎮造成既傷害可能不亞於十年前既龍禍。
除左救人之外，救人之後既事都一樣要係呢一刻考慮清楚。
「唔係巧合。」三葉加強語氣再重覆一次：「唔係巧合。兩個星期前劫出現並且將熊侏首領打傷既事我都知道。」
點解佢會無啦啦提起呢件事？

長老聽完後瞄一瞄我，佢都大概估到係我講比三葉知。
「老實講，呢單野都比左唔少麻煩我地兩個，嘉穎係生存測試既時侯就因為劫打傷咕……」夠膽你就係全村高層面前響熊侏首領個朵，等佢地笑下你既改名品味！
「咳。」三葉假咳以作停頓，然後繼續「打傷左熊侏首領，拳鼠先會攻擊熊侏，而我地兩個就被捲入呢次事件入面……對於拳鼠造成既騷動我相信你老人家都略有所聞。」




「琴晚見你兩個之前我地就係忙緊呢單野。」伊曼回答。

唔怪得等左幾個鐘佢地先得閒見我地兩個。
「我地醫好左熊侏首領，而佢帶領熊侏擊退左拳鼠群。至於我地醫治熊侏首領既方法你唔需要知，我地亦都唔會講。」

「竟有此事，難怪拳鼠會敗走……你忽然提起此事是有何用意嗎？」
「澄清嘉穎為左解決拳鼠既問題先將劫出現過單野講比我知。」原來呢個癡線婆都有考慮過我既處境？
「順便顯露下我地兩個既手腕。」呢個先係真正既原因！
「你無需擔心我輩會誤會嘉穎，閣下的能力我亦非常有信心。回到正題吧。」長老回答，老老豆豆，依家所有人關心既都只係點救返菲兒，嘉穎？無人識你喎。





「我認為管理員小姐之所以被劫捉去，同佢身上既芬席柯娜血統無關。」
「咁點解佢要捉走菲兒？」伊曼問。

雖然未見過伊曼同菲兒之間既互動，但係佢兩個都係學者，兩者既關係應該唔錯。
「我雖然有初步構思，但係依家唔方便講出黎……等我確定左之後……應該話就算我確定左我都唔會講。」三葉又特登故弄玄虛？
「請問小姐你咁樣算係點？咁樣我地好難做喎。」頭先因為壓力太大而收左聲既伯雷主教都忍唔住開聲刷存在感。
「無可奉告。但我可以保證管理員小姐無危險。將事情交比我解決，事成之後管理員小姐就可以繼續無穿無爛，開開心心地生活。」
「…………」

伯雷心裡面一定係唔滿意架喇，但係主導權係三葉手上，只要三葉保證雪菲兒安全的話伯雷都唔敢有意見。
「我地村委派任務既時侯通常都係以三至四人一隊進行，包括一個學者、一個魔法師同兩個士兵。」伊曼道。
四人可以話係群體活動既標準，打麻雀要四個人、鋤大DEE要四個人、平時去餐廳又一定會有四人套餐，連火影忍者一個小隊都係四個人。
不過上述既活動我都係慣左一個人做。
「我唔需要其他學者既協助，你自己都講過學者既職務我係勝任有餘。」





意料之內既回應，三葉既性格同行動方式都注定左佢係獨行俠，有其他人同行除左可能會唔夾之餘仲可能會阻手阻腳，更甚者可能會被三葉既癡線決定搞到有生命危險。
我就係最佳例子，森宿果單野我本應係死鬼左。

但係係咁既情況下又可以保住我條命仔，呢個就係三葉最不可思議既地方。
「當然，我都同意再安排學者加入對你黎講可能只係畫蛇添足。」

「你知就好，我地依家唔係去遠足，而係去討伐一條龍。我無餘力照顧好你既下屬。」
三葉又返回囂張模式，頭先伏係我背脊果個究竟係咪同一個人黎？
「你放心，我認為需要安排既係士兵……以你對村既重要性同埋任務既難度，我地會安排兩名村裡面最優秀既士兵陪同你進行任務。」

「你口中既最優秀士兵應該唔會講緊頭先隻雜種？」

「佢係其中一個。」

「我拒絕。」




伊曼嘆一嘆氣，後道：「我都知蘭卡特個人係好乞人憎，我都唔怕係到講　－　我都好討厭佢。」老野雙手抱胸閉目養神，而伯雷只係尷尬咁笑。
估唔到伊曼竟然敢係老野同主教面前講得咁直接。
「但係無可否認，佢係村裡面最可靠既軍人。」

「我對你兩個之間既私人恩怨無興趣，總之我拒絕。比起能力，性格同我夾唔夾以及我信唔信得過更加重要。」
大獲，我已經聞到浸燶味！
「我要嘉穎就得，唔考慮其他人。」

「………………」
「情理之外，意料之內。」老野暗道。

「唉……既然三葉妹妹都咁講……」
「喂！你地會唔會放棄得太快？」我立即企起身抗議。

點解咁危險既任務一定要搵個乜柒都唔識既人去呀？你地又做乜咁輕易同意呀？雪菲兒條命唔係好重要架咩？




「有咩辦法，佢本人都咁講，你都見啦，我地呢刻根本無任何議價能力。」

「咁你地有無理過我既感受？」我盡力爭取返自己既權益，因為我都幾肯定我自己都唔幫自己的話，就無人會幫我，所謂自己權益自己救。
「菲兒既性命同你既感受……」伯雷主教又用佢果種招牌笑容輕鬆咁講。

我舉起手掌以示停止：「得喇，明喇，不要再說了。你真係講出口的話我驚自己會忍唔住喊。」

「你明白就最好。」伯雷主教以一個微笑結束對話。
老老豆豆，一個年輕貌美對社會有貢獻既囡囡同埋一個終極廢青，比我都會揀前者，連我父母都揀左前者。
此刻，連世界上最後一個支持我既人（即係我自己）都轉投敵陣。

你可以安心上路喇嘉穎！
「咁我就代表白石鎮正式委託三葉及嘉穎兩位進行救回菲兒既任務。你需要既協助我地都會盡量提供。」
「首先我要一個可以落腳既地方，其他野之後再傾。」





三葉說畢時不忘怒盯伊曼一眼。