廢青於中世紀魔法世界的生存法則: 35, 差人同爛仔都只係打份工

我黎到呢個世界之後一次要用錢既機會都未遇過，之前兩次出去食野一次係老野找數，一次係蘭卡特找數。
我應該點做呢？直接調轉頭就走？

灶頭位於茶座最裡面既位置，除左將軍之外仲有數名猛男侍應係到，我走得出去既機會係零。
「做乜呀？無錢呀？嘿？」

本來我想誠實同佢講無帶錢，但係比佢兇一兇，呢個念頭即刻打消。
「細路我未見過你，新黎？」頭先既男侍應走黎我旁邊，我連退路都比人截埋！

「係呀係呀……」




「通過左就職測試？」侍應問。

「岩岩好琴日通過左生存測試，所以今日打算黎食返餐好……」但係無錢找數絕對唔係計劃之內！
「咁你係唔係無錢比？」我被將軍同侍應一左一右盤住，就好似被逼埋牆角既債仔一樣。

「對唔住呀大佬，你比啲時間我丫。」
「你孬挑鬼命，一副蔣命格，你萬一喪命我豈不是要去地府收數？」侍應率先做黑臉。

嘩，一餐早餐啫，我又唔係問你借錢炒孖展，唔使咒我死下話？
「後生仔，教精你啦，作為一個軍人，上陣之前檢查好自己既裝備係基本，而出街食野之前睇下銀包有無錢更加係基本中既基本。」而將軍就做白臉，黑白臉一唱一和係騙徒常用既手法。





「係既係既……將軍大人所言甚是……」而係一旁附和，就算明知自己中左伏都敢怒不敢言既就係毒男既做法，最多事後上高登開post呻。年年警訊都教你唔好上California當，但係個個月高登都有post，你自己唔怕有金錢損失同埋比高登仔369都考慮下阿寶既感受啦。
對唔住阿寶，又要麻煩你出動，唔好意思！
「你住邊？」黑臉開始進攻。

呢條問題唔答得，答完的話一定會比人淋紅油貼街招！
「呃……」

「答我！」侍應大聲一喝，全間餐廳都望過黎呢面。
好，依家全世界都知道我食左霸王餐。




一方面男侍應已經撕爛塊面破口大罵，而另一方面將軍只係默默地磨刀。

我吞吞口水，聽日Wounded Wolves既餐單會唔會變成毒撚刺生呢？
老實講，將軍呢種白色恐怖比起男侍應唱黑臉更加有效。
「唔怕同你講，呢到所有人包括我，以前都好似你一樣係士兵，直至我膝蓋中了一箭……」連看更都做唔返咁嚴重，將軍你中果野唔係叫箭係叫子彈！
「想當年我仲係士兵果陣，嚴刑迫供係我既拿手好戲……拔牙、水車、烤打、炮烙、暴曬……真係諗起都興奮。」將軍冷冷向我一瞄，後道：「你想唔想試下？」
我要忍住！忍住呼之欲出既膀胱！
「我暫時寄住係圖書館，短期內可能會被分派住所然後搬走！」

「咦，住圖書館？你識雪菲兒？」將軍立將用返平常既語氣說道。
「係呀係呀……呢兩個星期都係佢照顧我……」

「哦，原來係咁。咳咳。」點解我一噠菲兒個朵佢既態度就轉得咁快？
我好似見到曙光！
「唉……算，一個月內找返條數就放過你。」將軍道。





「係，無問題！」女神菲兒我感激你！
「千祈唔好製造任何麻煩，如果唔係全個白石鎮都唔會放過你。」

「係係，當然啦！」
雪菲兒係白石鎮既地位，至今依然係個迷。
＊　＊　＊
離開Wounded Wolves之後，我再次上路前往軍校。
軍校位於白石鎮西門（聖徒門）門內側。

聖徒門可以話係白石鎮四道大門之中最宏偉既一道門，但係諷刺地，劫係兩個星期之前就開始有於聖徒門樓閣上面睇日落既習慣。
「新兵嘉穎前來報到。」

「喔……你係第三位。」負責新兵登記既係外表睇起上黎差唔多退休既老兵。
「咦，係我之前已經有兩個人完成登記？」即係今次生存測試到目前為止計埋我已經有三個人成功過關。





「無錯，佢兩位今日已經開始當值。」今日面試成功第二日就要返工，應該話你效率高定係話你唔夠人用？
跟住落黎，有唔同既人帶我係軍校裡面到處參觀。
軍校有兩層高，以白色為主。

中間既正門門前有幾條高柱，然後走廊由左右兩旁延伸。
由高空望落去，整個軍校大概係口字型，口字型中間既空地就係操場。

以白石鎮既規模黎講，呢座軍校可以話係唔失禮人，白石鎮又唔係國家既首都，唔可以期望有巴黎榮軍院咁有型既軍事建築。
雖然話係軍校，但係一般白石鎮士兵既行政工作都係係到處理。反而真係當軍校用既教學設施非常有限，過去兩個星期除左上堂用既課室之外，我用過既設施就只有操場，而所謂既操場其實都只係一塊鋪滿碎石既平地，無籃球架無觀眾席，仲落後過監獄。
我係軍校裡面四處奔波，拎制服啦，拎武器啦，打招呼啦，拎更表啦等等。

等到我搞晒所有野既時侯，已經係下午三點，返到圖書館已經差唔多三點半。
此時大草地之上，準備功夫已經做得七七八八，地上有好多預先畫好既魔法陣，除此之外仲搭左一個帳蓬，帳蓬下面有一張長檯同五張凳，同琴晚一模一樣。
點解我既就職測試待遇差咁遠？公平咩？