廢青於中世紀魔法世界的生存法則: 36, 10A狀元的考試方式

「出面搞得比我想像中更大陣仗……」返到圖書館之後，我見到雪菲兒企係窗邊觀察住草地上面發生既事。

「聽講係魔法師既就職測試，竟然要做到咁既地步……」連土生土長既菲兒都覺得非常意外。

「一般黎講魔法師既就職測試係點樣進行？」

「通常都係係聖堂裡面進行，由鎮內以長老為首既魔法師見証。參加者將會使出一招自己最拿手既魔法，然後由其他魔法師給予評分。」同奧運既跳水同體操項目既方法幾類似。
但係聽起上黎好似咁兒嬉？三葉解釋過既魔法師強度至少有三個基準，放一招就比分好似唔可以充分反映到魔法師既能力。
「係呢，你有無魔法師資格？」





我都見過菲兒用過幾次魔法，所以有的話我都唔意外。
「無，我所識既魔法實在太少，而且我擅長既魔法不利於就職測試……所以最後就做左學者。」菲兒離問窗邊，返回中央既大檯繼續閱讀，檯上面有好多本打開左既書。

「做學者都唔差。」我唔係安慰佢，呢番話係事實。
「多謝你，我對自己可以以學者身份作出貢獻感到非常滿足。」菲兒露出微笑。

係香港地，想搵一份自己鐘意既工並唔係咁易，所以我好羨慕菲兒。
我透過窗戶見到三葉同伊曼已經到場，我係咪應該落去打個招呼呢？
「菲，你落唔落去湊下熱鬧？」





「雖然好有興趣，但係我平時要上堂，可以閱讀既時間非常有限……」
畢竟菲兒係學者，唔係教師，係教導小朋友之餘，增進自己既智識都係佢既職責。

「好，我轉頭就返。」

「慢行。」
落到地面之後，我無直接行去大草地。我由後門行去後面一條街，然後再兜路返返大草地。

我唔想比條癡線婆知我住邊到。
「你兩個好似相處得幾好。」我走到去三葉同伊曼旁邊打招呼。





「應承去呢個女人屋企過夜應該係我一生之中最大既錯誤……」少女搖頭嘆息。
三葉以紅白色為主調既衣服已經換成一套黑色連身裙，裙腳有白色花邊，而本身露出既雙腳今日就被黑絲覆蓋住。
「琴晚傾左成晚之後我就更加肯定三葉妹妹決定要做魔法師實在太可惜。」

「呢個女人好煩。」三葉頓一頓之後再加重語氣強調：「非常煩。」

二人對對方既評價非常極端。
伊曼既表現令我諗起一個詞語。

「痴女。」 我又唔小心將諗緊既野講左出口。
「痴女？咩痴女？」伊曼聽到之後反問。

「呃……呃……即係一個對目標不放棄，鍥而不捨既女性。」
「呵？」三葉向我投以不懷好意既眼光，相信佢已經估到呢個並唔係真正既解釋。




「咁對目標不放棄既男性係咪痴男？」伊曼反問。

「錯喇，係叫痴漢。」
「原來係咁，之前聽長老講過你家鄉有好多獨特既方言，估唔到係真既。」

「交流下姐都係，我又學下你地既詞彙，你又學下我既方言咁囉。」
呢個就係我向呢個世界報復既第一步！
「我將呢到交返比你兩位青春既少男少女，我呢啲老人家去搵返長老報到下先。拜拜喇三葉妹妹～」伊曼說道。

「哦，慢行。」我道。伊曼暫時比我既印像都幾正面，而且佢作為鎮入面既學者代表，應該掌握住好多對我有用既情報，有巴結既價值。
但係三葉並無任何反應，睇黎佢都頗為厭惡伊曼呢個女人。
佢自稱係老人家，但係從外表觀察佢最多都只係三十歲鬆啲，勉強夠資格被稱為中女，但係距離嬸嬸婆婆尚有一段漫長既路要行。
「乜你咁無禮貌既，人地同你講拜拜你都唔理佢既。」

其實問黎都多餘，琴晚發生既事已經充份反映三葉呢個人根本無禮貌呢個概念。




「少年……呢個世界實在有太多你唔知道既事。」

「聽你既語氣我似乎唔知好過知，做乜？佢強ga……」「啪－－」

三葉呢一巴毫不留情。
「好，係時侯鬆鬆筋骨，幫我拎住。」

類似亞視台徽既簡單魔法陣再次出現，土豪法杖又憑空出現，佢將法杖頂端既寶玉拆左落黎遞比我。
三葉既一巴依然好痛，我一邊摸住臉一邊問：

「就職測試咁重要你都唔出盡全力？」
「我想測試下自己真正既實力。」

自信同自大只差一線，我認為三葉僅僅無踏過果條線。
「哦，咁祝你武運亨昌。」




三葉拎住法杖走出大草地，而我作為毒撚比較怕曬，所以走左去帳蓬旁邊，亦都係伊曼同長老身處既附近。
「伊曼，此姑娘素質如何？」

「作為學者，佢要合格綽綽有餘。我未見過佢同齡既後生仔女可以有佢一半咁博學……當然我係例外。」
我企既位置岩岩好聽到兩個人傾計既聲音，長老同伊曼並無刻意低聲討論，似乎唔怕其他人聽到。
三葉於草地中向擔任工作人員既教徒招手，一輪交談之後教徒怱怱走開，未久三葉便往無人之處擊出一記火球術。
火球前進一段距離之後就好似打中無型既牆一樣，擊中既地方垂直散發出一陣陣可見既漣漪。

睇黎班聖徒今朝準備咁耐就係為左設置防護罩，始終大草地位於白石鎮中心，旁邊又係白石聖堂，戴返個頭盔都好合理。
「作為魔法師呢？」長老又問。

「魔法係你既領域，我無謂獻醜。」伊曼對長老都非常有禮貌，但係同蘭卡特既態度唔同，伊曼係比較不亢不卑。
「也罷，反正答案即將揭曉。」

長老走出空地，伊曼並未有跟隨，所有人見到長老既動作都知道測試即將開始。




「三葉，據方舟教之教條，若要受他人之惠，必先為他人付出；是次測試目的正要考驗你有否以魔法師身份為我輩貢獻之資格，明白？」
「清楚。」意外地唔算非常囂張既回答。
「你可有成為大魔導師之志？」

「請容許我以魔法回答。」三葉連“請”呢種字眼都用埋，唔知係咪因為係公眾場合，所以比返幾分薄面老野。
「希望各位可以做好防護工作，等我可以毫無顧忌咁使出我最強既魔法。」話口未完三葉又囂張。

在場所有魔法師都以老野是瞻，三葉呢句毫無疑問係向所有負責防護工程既魔法師下戰書。
「……無妨，願你能奉上在我們防衛之下仍毫不遜色之魔法。」

「承你貴言。」三葉既笑容依然充滿自信。
「三葉妹妹真係好特別……」伊曼都拎出魔杖準備，後道：「我就係鐘意佢呢種地方。」

老野行返入帳篷裡面之後，旁邊既教徒立即大喊：「開始！」