廢青於中世紀魔法世界的生存法則: 34, 出街之前記得睇下有無袋齊電話鎖匙同銀包先

琴日體力消耗得咁犀利，一於食返份有肉既早餐！

我對鎮裡面既餐廳唔係十分熟悉，畢竟我只係黎左兩個星期，而且外出用膳既次數更加有限，所以我只係隨便揀左間多人得黎又有位既露天茶座以減低自己中伏既機會。
「歡迎光臨！」正於灶頭烹調食物既大廚率先打招呼。

「喔！」茶座內其他員工亦響應，我從聲音中感受到佢地既正能量，同香港食肆公式化既二一三一四完全係兩回事，係呢到我真正感受到自己係受歡迎既。
茶座既設計相當簡單，有十數張以白色鐵枝扭曲而成既圓檯及背椅。最裡面係類似小販車既灶頭，當然，係衛生好多同埋整潔好多既版本。
茶座另一個令人注目既地方係所有侍應都係男人，年齡由二十幾歲到四十幾歲都有。

仆街，唔通我入錯左GAY CAFE？




正係我仲猶疑緊要唔要拍檯就走既時侯，其中一名男侍應走黎我旁邊。

「後生仔，想食啲乜？」
我拎起餐牌，餐牌係薄薄既一張紙，係類似環保紙既觸感，餐牌既頂端寫住兩個英文（係呢到即係龍語）詞語。
「Wounded Wolves……」
作為一間開係廣場中間，氣氛非常寫意既露天茶座，呢個名實在係有啲格格不入。

如果由我改名的話，我應該會將間茶座改名做Daydream Cafe，又或者Rabbit House。
「係我地餐廳既名，即係受傷既狼群咁解，你係咪有意見？」





到底以人類語言作為法定語言及教學語言既大公國人民對龍語既認識有幾深呢？會唔會多過將you know, i mean成日掛係嘴唇邊既偽ABC？
「原來呢到都有狼……」

「白石附近係無狼，不過將軍好鐘意呢種生物，你係咪有意見？」

似乎你地個老細都幾中二。
「唔好意思，我今日比較肚餓，請問有無肉食既推介。」

「晨早流流就食肉，依家既後生仔真係奢侈。」你係咪有意見？
「西部大陸鴕胸肉配野鞠，本店用料由所羅門國直接入口，大公國內獨一無二，你唔需要有其他意見。」





侍應既語氣非常豪邁，同佢既外表十分相稱。就算佢剃左鬚，鬚根依然清晰可見，再加上佢黯黑既皮膚仲有頸上面既疤痕，同佢身穿既侍應服可以話係兩個極端。
地盤佬係五星級酒店著全套禮服做侍應，大概係咁上下感覺。
「哦……哦。」由於個侍應強硬又急促既語氣，我好快就被佢push到make左個decision。

你睇下我幾似ABC？
「將軍，大陸鴕胸肉配野鞠一份。」

係香港生活左廿年，本身我已經對咩直接入口呀，直送呀已經無晒信心，不過若果對象係白石鎮既商人，我願意比次機會佢。
「應！」佢兩個無用傳紙仔既方法，只係單靠係茶座裡面互相呼喝黎傳遞消息。
男侍應離開，而我就放鬆心情觀察四周。

一般黎講我會玩下電話聽下歌，但係依家我寧願觀察下四周。
有時我睇電話並唔係因為電話好睇，而係我想逃避現實，而眼前既現實並唔需要我去逃避。





我真係多愁善感，點解我會無女朋友？
「聽講巴克撒大公即將駕崩。」市民A睇起上黎大概二十歲尾左右。

「大公都已經七十幾歲……都差唔多係時侯。」市民B大概係四十歲。
兩日衣著都比較光鮮，似乎係商人。
公然討論國家領導人係咪就黎死，係古代既中國係斬頭既大罪，而係現今既北韓亦都差唔多。

但係呢到對於國王既生死似乎非常開放，應該同中世紀既封建歐洲類似。
「咁邊個會做下任大公？」

「計順位就應該係白石親王……」

「唔好玩啦，都咁多年啦！睇黎都係聖廷堡親王同康瓦爾親王之爭……」
巴克撒大公國既皇室爵位同英國皇室類似，都係以地方名命名。





因為白石鎮係大公加冕之地，所以被任命為白石親王等同於做太子。
至於聖廷堡係大公國第二大城市兼教廷所在地而康瓦爾則係大公國首都兼最大城市，所以以呢兩個地方為名銜既親王應該都相當把炮。利申，我並唔知佢地講緊既係乜野人物。
「希望唔係聖廷堡親王接任……」

「康瓦爾親王咁後生點同隻老狐狸鬥？」

「唉……大公國無喇……希望白石親王會返黎打救我地……」
我完全聽唔明，但似乎聖廷堡親王就係惡人既角色。
「自便。」男侍應將一大牒食物放於我面前。

我未親眼見過大陸鴕，但係單憑眼前呢塊肉我就知道大陸鴕既尺吋比起鴕鳥更加巨型。
好彩我今日只係報到，只要係上午去到軍校就得，如果唔係既我遲硬到。
而野鞠其實就係我地平時食開既cereal，不過佢地無整成糊狀，今日既野鞠係以類似餅乾既形式上碟。
咁咪即係唔沖奶就咁食既cereal……算啦，起碼有啖肉食下。





唔好假設舊肉乜味……唔好假設舊肉乜味……唔好假設舊肉乜味……唔好假設舊肉乜味……
我不斷比心理暗示自己以防中伏，然後用刀叉將其中一塊肉切割出黎放入口。
「……………………唔……」

好無驚喜，不過係一件好事。
食落去味道同普通雞肉有八成相似，不過肉質比較結實，咬既時侯都要比多啲力水。

呢到咁大塊肉，食曬之後我牙骹應該無力。
「下個月國立祭，重病臥床既大公應該唔會出席架喇……」

「換而言之邊個同教皇一齊進行儀式，邊個就會接任。」
兩名商人繼續講緊大公繼任人既話題。
「若果真係聖廷堡親王接任的話……你會唔會走？」

「走？」市民A道：「當年係蒂芬妮亞移民過黎就係貪大公國生活安穩。依家我成副家當都係晒大公國呀又有老婆仔女，可以走去邊？」





「唉……只希望唔係聖廷堡親王繼任……」
係呢個宗教權力大過皇室既國家，邊個繼任做大公真係咁重要咩？

我對大公國既政制仲未係好熟悉，都係唔好評論太多。
一輪功夫之後，終於食完，而侍應亦都過黎收拾。
「食完？你有無意見？」

「幾好食……幾好食……」

「埋單去灶頭果面。」
黎到大將面前，由於食早餐既人朝已經散去，大將已經忙於清潔灶頭。

我拎出銀包，然後拎左將紅衫魚出黎，呢餐應該一百蚊有得找。
「多謝你六銀四十五銅。」

「呃………………」
今次仆街了。