廢青於中世紀魔法世界的生存法則: 33, 學生呻考試辛苦既時侯請記住準備試卷同改卷既同樣辛苦

「老身明白了。」老野以一句示意自己無野再問，將發言權交返比伯雷主教。
「事情既大概我都明白，你搞咁多野都係為左拎個鎮民資格，無錯？」

「順便了解下依家既白石鎮係由乜野人統治。」三葉呢個法師又瘋狂拉仇恨值。
「嘿，真囂張。」蘭卡特雙手抱胸說道。

當佢見到三葉既實力之後到底會有咩反應呢？我好期待呀！
「我相信你對巴克撒同白石鎮既國民資格都非常了解，咁請問你既志願係乜？」

聽到三葉咁講既之後仲可以笑笑口繼續傾落去，伯雷主教你既EQ唔係一般既高！




「魔法師。」三葉即答。

「不愧係由蒂芬妮亞回歸既國民。」

「嘛，本來我魔法造藝就已經相當高，同係唔係蒂芬妮亞返黎無乜關係。」
「……………」

三葉囂張到令所有人無語。

「明白，魔法考試，你需要幾多時間準備？」係十餘秒既沉默之後，伯雷主教再次發問。





「你地方便的話我即刻受試都無問題。」三葉胸有成竹地回答。
又係一段沉默。
「畢竟都已經八點幾，我相信兩位都已經體力透支，不如就係聽日下午舉行啦好無？」

「無問題。」
「等等，老身尚有一條問題。姑娘，」老野望住三葉。

「請問。」





「你是否半龍人？」問問題既語氣非常凝重。
「半……半龍人？」我問，然後竟然係由三葉自己解答我既疑問。

「半龍人即係人同龍所生既後代。」嘩！人獸交咁重口味！？
「一般黎講，有16份之1或以上既血統係龍的話，都會被當成半龍人。」

即係，你太爺果代只要有其中一位係龍的話，你就會被當成係半龍人。
「舉例，所羅門國既皇室透過內部親族通婚而維持高純度既血度，所以所羅門國立國一千八百多年，皇室大部份成員，尤其係嫡系，依然係血統維持係二份一左右既高純度龍人。」

個設定咁熟既？Game of Throne？
「半龍人比起大陸上其他物種，例如獸人、海人、矮人、妖精等等都有更強既身體能力同魔法潛質，可以話係傲視天下既高階物種。」我好似聽到各種打機常見既物種名稱……
「但係講到高純度既半龍人，全大陸應該係得返所羅門皇室國先有。而所羅門國可以話係恩基大陸上面最具襲略性既國家，會被人提防都唔出奇。」

「妹妹仔你對歷史都幾熟識喎，有無興趣黎做下學者？」伊曼對三葉似乎十分中意。
「多謝你既厚愛，但係暫時我興趣都係魔法師。」





「等你改變主意之後記得黎搵我。」白石鎮既就職並唔係固定，只要你有資格而且人手分配又許可，係可以自由轉職業換。
「所以，汝是否半龍人？」三葉講左一大輪設定都仲未答老野既問題，老野顯得不耐煩於事再次發問。

「唔係。」三葉果斷回答。
神器依然一片蔚藍。
「明白了。明日下午，於大草地進行考試吧。」老野一鎚定音。

「長老，比佢兩個留係村入面，會唔會有危險？」挑，我留左係到兩星期啦，咪一樣無事發生！
「一切如神器所示。以老身觀察，三葉只是語氣有點囂張，但沒有值得懷疑之處。」

「長老……」蘭卡特似乎唔係好滿意，平時佢咁仰慕長老，今次出言表示自己既懷疑其實都已經係好大既反應。
「我決定了，伯雷你有意見嗎？」

「我同意你既睇法。」





「那麼解散吧。」
「長老，我認為嘉穎太危險，唔可以比佢繼續留係圖書館！」

「蘭卡特，汝今天話太多了。」老野講完之後就離開房間，蘭卡特怒睥完我一眼之後亦都跟住走。
呵呵，有人比人鬧，抵死！
跟蘭卡特上左兩個星期堂，我真心明白佢係一個為左白石鎮好既正人君子，不過眼見佢仆街我都非常心涼。
「小妹妹，你有無可以安頓既地方？若果唔嫌棄的話就呢我到過一晚。」

正當我擔心緊三葉會唔會跟埋黎既時侯，伊曼出黎拯救世界。
「恭敬不如從命。」伊曼同三葉亦都跟住離開房間。

「聽日記得黎睇本小姐表演。」三葉離開前留低呢一句。
＊　＊　＊
「早晨。」我打開大門，菲兒如常準備早餐。





但係今日只有單人份量。
「咦？嘉穎你幾時返左黎架？」

「琴晚九點左右。」你地可能覺得好早，但係唔好唔記得嶽砶一日只有22個鐘。
琴日我返到圖書館既時侯時間已經唔早，所有燈亦都已經熄晒，所以我無通知到菲兒自己入房就份。

亦因為咁，我琴晚乜野都無食到，此刻我非常肚餓。
「我唔知你係到所以無整你果份添……」

我望住果兜cereal，食欲急劇下降。
「唔使喇，我今日要早出門口，兩三點左右應該就返。」

「今日我唔使上堂，下午要唔要去邊到行下？出去食返餐好既慶祝你過到生存測試？」
本身我想一口答應該，但係諗多諗之後我作出以下回答。





「今日大草地好似有活動，我想觀摩下。」
雖然作為純正既香港人我好鐘意食花生，但係一般黎講我唔會有為左食花生女主動約我都唔去……我諗。因為我從來未比女約過，所以以上純屬假設。
令我不惜推約既原因係，若果三葉發現我唔在場的話……後果不堪設想。
「哦，咁下星期再去，呢餐我一定請你。」

「咁我多謝定你先，陣間見。」
落到地下，黎到大草地前面，已經見到幾個身穿白衣既教徒進行準備工作。
「請問你地做緊乜？」我其實係明知故問。

但係我好好奇，點解區區一個就職測試要咁勞師動眾。
「聽主教講今日有個蒂芬妮亞歸國既少女要進行就職測試，少女既魔法既威力係未知之數……但係主教叫我地做最壞既打算。」

「真係咁驚既直接比佢通過測試咪得。」我地香港都有拔尖直接入大學啦，點解你地唔學下呢？
「規則係規則，唔可以有任何例外。更何況唔試的話點知少女既魔力去到咩階級？」

莫非呢個世界都有用到爛既分級概念？

「丫，你都幾熟魔法既野喎。」我問。

「我本身係想就職做魔法師，係過唔到測試先轉左去做聖職者。」
你地可能覺得呢句statement無乜野，但係用香港既語言翻譯就係「我本身係想做醫生，但係考唔到入醫學院所以先轉左去讀law。」，對於淪落到要去做生存測試既我黎講，呢句可以話係非常有挑釁性。
唔好唔記得聖職者係大公國都係精英行業。

「你介唔介意解釋下魔力階級係乜？」

「我好想解釋比你聽，但係我有好多工作要做……恕我失陪，願方舟之惠於你同在。」教徒重新投入工作之中。

「願方舟之惠與你同在。」我向教徒點頭致謝，然後出發前往大街。
大街人來人往，白石鎮作為石材轉口重鎮，今日依然非常繁榮。