廢青於中世紀魔法世界的生存法則: 32, 果然我的青春戀愛喜劇搞錯了

「長老！冤枉呀！」我立即想跑到大門旁邊一哭二跪三上吊。

「坐低！」兩名士兵見狀立即將我推返埋位。
所有人進入房間之後都坐低左係長桌另一邊既椅子之上。

佢地既陣容可以話係非常鼎盛，最接近房門既左端位置係蘭卡特，然後係伯雷主教，中間既位置無人坐，右二係長老，而最右邊係一個我未見過既女人。
「呵……竟然係佢。有時命運呢樣野都幾令人討厭……」

三葉低聲道，房間之內除左外無人聽得到佢講乜。
三葉口中既佢到底係邊個呢？




長檯另一端率先開口既係最右邊果個女人。

「唔好意思，因為頭先一直係城西觀察『劫』，所以遲左。」
一聽到劫既名，三葉立即眉頭一皺，但係佢並無回話。

自從我黎左白石鎮之後，劫每日接近時間都會飛到城西樓閣之上盤據，直至七點左右先飛走。
第一次發生果陣所有士兵都如臨大敵，但係同樣既事情每日都發生，慢慢大家都習以為常。你都唔會因為電視六點半播新聞報道而感到意外啦？係咪先！
雖然係咁，劫出現既原因都帶來唔少謎團，所以就有一班學者每日都會離遠監察住佢，似乎眼前既女性就係學者既代表。
「伊曼女士，係外人面前你會唔會透露得太多？」坐於左端既蘭卡特馬上就表露自己既不滿。





「蘭卡特隊長，你睇佢地個樣似係壞人咩？」伊曼亦都寸步不讓，蘭卡特既性格係有幾難頂我好清楚。

「若果單靠外表就知對方信唔信得過的話，咁就唔需要嚴刑迫供。伊曼女士你係咪對得書本太多，所以唔清楚世間有幾險惡？」若果菲兒聽到佢既蘭卡特大哥竟然講出一番咁既說話，一定會喊到收唔到聲。
「咳咳。」長老乾咳一聲示意，坐於長桌兩端既人都因而閉嘴。

「首先，」發言既係伯雷主教。「嘉穎恭喜你通過生存測試。」
伯雷主教果然係個好人！就算全世界唔明白都唔緊要，你明白我就得喇！

「不過若果你今晚比唔到個解釋我地，所有野都無意思。」伯雷搖頭續道。
屌！就係因為三葉一句說話，全個白石鎮對我既外交關係就轉成敵對？有無咁兒嬉呀？





再者，因為佢話要見你地，你地就真係約埋一齊見個癡線婆？你地係咪太得閒呀？你地唔係要觀察劫架咩？有時間點解唔諗下點樣建設社會，超蒂趕所呢？
「主教大人！冤枉呀！我同呢個女人唔係好熟架咋！」出賣隊友係我專長，更何況三葉唔係我隊友。
「無錯，呢條友的確無對我做過啲乜，憑佢既能力想做都做唔到。」估唔到三葉馬上就咁坦白。

「拿，你地聽到啦，真相大白啦係咪？咁我就走先！」我企起身之後立即又被士兵推返坐位之上。
「要怪就怪你自己比人既印象唔好。」三葉道。

「我同意。」蘭卡特竟然點頭同意！隊長你係咪應該搞清楚立場先出聲呢？
「咁點解你不惜要毀嘉穎既清譽都要黎見我地呢？」伯雷問。

「若果一個後生女用好有禮貌既語氣同出面既守衛講，話要見晒呢個鎮既最高領導人，你估佢地會有咩反應？」

「廢話，當然係趕走。」蘭卡特立即回答。
「我估都係，所以我就用左個可以達到我目的既方法。」三葉伸出食指篤住我塊面：「畢竟呢條友係個異鄉人，受到特別既重視都係正常。」




此時長老忽然伸出手掌示意暫停。

「先迎神器。」老野一向裝模作樣既說話方式。
「將神器拎入黎！」蘭卡特聽到之後補一句，其他士兵先有反應。

其實老野你有無考慮過用返普通人聽得明既方法溝通？
「菲兒佢點呀？」就係士兵將神器搬入黎既空檔，我試下講啲野緩和下氣氛。

「不錯。」老野冷冷回答。

「同你黎到之前既生活方式一樣。」蘭卡特每句話都有惡意，我知道佢唔係壞人，不過佢呢種說話方式真係好乞人憎，但係點解佢會咁受器重？
與此同時，大門再次打開，兩個士兵一左一右咁捧住一舊巨型晶石，然後放於長桌正中間既位置。
「噗……神器……」三葉毫無徵兆地爆笑。

雖然我一早知道呢條友神神化化，但係你笑點會唔會太低？




坐於神器兩旁既長老同伯雷主教都企係身，將手掌放於神器之上，然後輸入魔力。
「少女，汝名為三葉？」

「無錯。」
神器發出藍光，伯雷與老野互相點頭。
「三葉，你介唔介意自我介紹下先？」伯雷主教馬上進入面試模式。

「我叫三葉，生於白石之地，十年前因事離家出走，於恩基大陸上四處流浪。三年前受邀於蒂芬妮亞深造魔法並且定居，直至最近覺得需要返黎同住係白石鎮附近既呀哥交待，順便拎埋巴克撒國民資格，所以先返黎。」
三葉講既同我所知道既並無唔同，而神器發出既依然係藍光。

睇黎係個神器係測謊器，同三葉用黎主持賭博果陣支魔杖既作用差唔多。
「咁點解你會同嘉穎一齊行動？」

「我係河邊休息既時侯感覺到有人偷窺緊我。」三葉再次用手指篤我既臉頰續道：「呢條友就係果個偷窺狂。」
仆街了，今次水洗都唔清。





「冤……冤枉呀……」
伯雷笑道：「佢無講大話。」

「天呀……呢個偷窺狂竟然同菲兒同住左兩個星期咁耐！」蘭卡特係四人入面最憤怒果個。

「唉呀，後生仔係咁架啦。」

「比人偷窺果個唔係你你緊係咁講啦！」蘭卡特拍桌反駁。
「肅靜。」老野一喝，又中止左呢場鬧劇。

「姑娘，從蒂芬妮亞前往白石鎮，沿東方大商路走即可，汝刻意前往離大商路有一段距離之河畔休息，可有動機？」都係老野心水最清。
「無乜動機，只係我比較隨心所欲，想去邊就去邊。」

「我可以証明佢無講大話。」我舉手說道。





「偷窺狂收聲。」三葉回話。

「長老，請容許我就地處死呢個妖女以証我清白。」
「呵呵，後生仔，由頭先藍燈無熄果一刻開始，你就已經無任何清白可言。」伊曼笑道。

無喇，難得頭先係大門果到咁受歡迎，呢一刻我既人生又要跌返落谷底。
雖然我已經係谷底生存左二十年，谷底呀谷底，你幾時先可以放過我？
「既然嘉穎於汝眼中是名偷窺狂，何解又與其同行？」

估唔到對我不離不棄既係老野！
「思春期既少女對對自己有興趣既異性好奇，有何不可？」依家你先黎扮少女實在太遲喇！

「唔………」此刻老野竟然有所猶豫，轉頭問旁邊既伊曼：「伊曼，可有此事？」
「真係青春，呵呵呵呵。」

果然我的青春戀愛喜劇搞錯了。