廢青於中世紀魔法世界的生存法則: 31, 對毒L黎講，比妙齡少女屈非禮真係無解

夕陽西落，我於白石鎮東方大商道之上迎來生存測試既第三個黃昏，亦都係生存測試既尾聲。
而我返到白石鎮之後，就會成為士兵既一份子。

其他動漫既主角入到異世界通常都係做國王呀……周圍去下旅行呀咁樣，點解黎到異世界都要返工放工？公平咩屌你老母！
除此之外，我睇既動漫入面，主角去到異世界通常都有艷遇，我呢？

依家我隔離得個八婆，靚係幾靚，但係同佢扯上關係一定無好結果！
「……………」

「……………」




為免一開口又比三葉叫我收聲，平時自己一個人果陣一定會自言自語既我都變得寧靜。
我同三葉之間既沉默已經維持左好耐，我亦都留意到三葉對我既態度有所改變。

係遇到森宿之前，三葉通常係做主動撩我傾計果個，但係依家佢就好似對我無晒好奇心一樣，唔會主動同我講野。
果然我係場賭博入面講既野影響好大？
再長既旅途都有終端，而我今次既短途旅行亦都唔例外。

係前方不遠處已經見到白石鎮既城牆。
「去到白石鎮之後你打算點？」我率先打開話匣子。





「嘛～我仲未有心理準備見我阿哥。」佢今次無立即叫我收聲，睇黎佢都覺得悶。
咁你打算去邊到落腳？

我當然唔會問出口，因為一開口的話佢就會順手推舟咁住係我到。
到目前為止我仲未係眼前少女身上任何一個我鐘意既地方，相反厭惡既地方就有一大堆，可以的話我都唔想再同佢扯上關係。
「首先就考左魔法師或者學者資格先，反正考完試之後就會分配到居住既地方同埋資源，生活方面不成問題。」

「若果你過唔到呢？」

「就算，」好重既語氣。「就算我淪落到要做生存測試，我都好有信心可以係第一日日落之前安全抵達白石鎮。」




點解聽起上黎有啲刺耳？不過呢條八婆既信心並唔係無根據，同佢一齊行動左幾日之後我都深深明白，除左魔法之外，佢仲有森宿同神運既加持。
轉眼間，我地已經到達城門之下。

「生存測試參加者，嘉穎報到。」我主動同值班既士兵報到。

「歡迎你！嘉穎！」士兵A主動與我握手，而另一士兵拍我膊頭，舉起姆指。
企係遠方既士兵都拍掌歡呼。

我呢世人從來都未受到咁既對待，我第一次覺得自己係受到歡迎既存在。

「嘛，姑且恭喜一下，呢三日承蒙你照顧。」旁邊既三葉都拍手祝賀。
「唔好咁講，我先係被照顧果個。」

「原來你都有自覺。」難得增加左小小既好感度又降回原點。
「嘉穎同志，今晚就先返去好好休息，其他野聽日去軍校會有人安排。」





「係！」
「至於呢位姑娘，咁生面口既？」

士兵用銳利既眼神打量三葉，但畢竟對方只係一個生得幾靚既妹妹仔，士兵不至於用差佬盤爛仔既語氣問。
我究竟應唔應該幫佢答呢？但係一個岩岩參加完生存測試既人對於三葉既身份可以有咩合理既解釋？
「對你呢個職級既人我無乜野好講，叫你地既長老見我。」

「……………………」三葉一句全車靜晒。
「嘉穎，你識唔識呢個豆釘？」士兵既態度立即轉變。

「我……哈哈……」如果呢個時侯話識，事情一定會變得好麻煩
「你對我做左“果種事”，唔會唔認數架可？」

完。




＊　＊　＊
本來我係應該係床上面同床單、枕頭大戰三百個回合直到天光。

但係依家一切都要落空。
發生左件咁既事之後，我同三葉被一大班士兵“護送”到白石聖堂，屋企張床明明就係咁近既地方，但係我去唔到。
此刻我同三葉坐於白石聖堂裡面既一個大房間裡面，大房間既另一端有一張打橫擺放既長檯，長檯距離我地比較遠果一邊放左一列共五張既長凳。
睇起上黎就好似審問房一樣，而我同三葉就係被審既一方。
除左我同三葉之外，現場仲有四名士兵看守住。

佢地都顯得好鬆懈，似乎唔將我同三葉放在眼內。
當然，我就好清楚佢地就算嚴密戒備都無用，因為三葉既戰鬥力係over 9000。
「你知唔知你比左好多麻煩我？」

「係咩，但係我就省卻左好多麻煩，依家條村入面最重要既人一次過黎見我唔使我將同一番說話講幾次。」
係我地既社會入面有好多類似“槍打出頭鳥”、“樹大招風”同“人怕出名豬怕肥”等等諺語，顯然三葉完全無咁既概念。係咁多種可以融入白石鎮社會既方法入面，佢揀左個最高調，亦都最惹仇恨值既方法。




我透過窗戶見到外面其他房屋既燈已經熄得七七八八，只剩餘個別街燈。

換而言之，此時已經係八點，而我地進入城門既時間係五點左右。
無錯，因為三葉講錯一句野，我就白白咁係到等左兩個幾三個鐘。

而呢兩個鐘，我對於隔離呢個女人係處於敢怒不敢言既狀態，真係好辛苦！
此時，長桌旁既大門打開。