廢青於中世紀魔法世界的生存法則: 30, 旅程完結時既黃昏令人特別想歸家
「呢到就得喇。」
三葉用中文對首領下指示，我已經懶得吐槽點解佢會識聽。
咕孖（即係隻熊侏首領呀）聽到指示後即刻伏低，然後三葉就跳左落地下。
除左咕孖以外既熊侏係頭先樹林入面已經解散左，慘遭三葉勞役既就只有呢隻熊侏首領。
沿途行過黎三葉同首領都係細聲講大聲笑。
一人一熊點樣細聲講大聲笑？其實都係得三葉單方面講，咕孖都係偶然用英文單字答下三葉。
「森林既和平就靠你黎守護喇，知無？」三葉輕撫咕孖額頭，簡單道別之後巨熊就返回森林之中。
此時我同三葉身處於一片田海之中。
有田即係有人耕種，有人耕種即係有路，有路就即係距離大商路甚至白石鎮已經不遠。
除左剛才樹林既方向之外，四處地勢空曠，吹拂住既春風非常清新，田海貌似稻穗既農作物被風吹至沙沙作響。
「望住呢個景色個人即刻放鬆晒。」三葉道。
「係幾舒服既。」平時係香港都係吸開路邊既廢氣，黎到呢到我都忍唔住吸多幾啖清新既空氣。
係呢個時侯，我好想高歌一曲。
tou kude tou kude yureteru i naho no umi
「とお～くで とお～くで 揺れてる い～なほ の～うみ」
此時三葉向我一盯，我先忽然記起同佢曾經因為唱歌而討論過各種獵奇既話題。
「對唔住，我收聲。」我唔想跌入熔岩成個人爆開。
「唔係丫，幾好聽呀，繼續唱。」佢望返前面既路。
「難得你鐘意聽，但係跟住果句我已經唔識唱。」
「無鬼用。」
「……………」
如果我部電話有電，或者我就可以播比佢聽下。
「啦～～啦喇 啦～～喇啦」要唱日文對我呢隻低階毒撚黎講都係有啲困難，但係剩係哼的話我都仲識。
「首歌講乜？」三葉又問。
「你唔會想知。」Clannad有成兩季，如果要清楚首歌既意境的話我豈不是要將52集既劇情講返晒出黎？
「唔講咪罷。」佢係咪有啲不滿？
「………係講愛情……同親情既故事。」呢個就係Clannad既TL: DR version。「大概。」
「丫！」佢忽然大叫一聲，立即破壞左原本好好既氣氛「你唔講起呢兩樣野我都醒唔起，拎你隻森之鐲出黎丫。」
係三葉既命令之下，我小心翼翼咁係懷中拎左隻手鐲出黎。
之前森宿咁樣恐嚇我，我唔敢亂咁舞隻手鐲，陣間花左的話森宿肯定會幫我分屍。
三葉好謹慎咁接過森之鐲，平時佢處理自己粒寶玉果陣反而唔會咁緊張。
「係時侯講下呢隻鐲既事。」
點解講講下Clannad會聯想到隻手鐲咁得意呢？
「根據我既經驗，」主要係十數年睇動畫同打機既經驗「呢隻手鐲應該係啲咩神兵利器？」
「唔係，你諗多左喇。」
「扯，此Post已完。」
「唔好誤會，隻手鐲唔係武器，但係佢係非常強大既魔具。」
「魔具？」我對陽具比較熟悉，你想唔想了解下呢……嘻嘻……
「哇……做乜你滲出既顏色忽然變到咁嘔心？」
唔記得左條癡線婆可以睇到我既psycho-pass值添，相信佢既Dominator已經解除左鎖定……
「魔具、唔……舉例，我魔杖上面果粒就係魔具，係比較特殊既魔具。」
成層太古城咁貴既魔具，真係奢侈。
萬幾蚊買架二手車又係代步，千幾萬買架跑車陷陷聲又係代步，點解要使多咁多冤枉錢？
土豪既野你識條春咩，有錢就有資格任性。
有關既議題子華大神已經討論過，我係呢到覆述的話佢就可能要收我版權費，所以省略，你未睇過的話請自行上youtube睇……咦，我地頭先係咪提過版權？
「哦………咦？咦？等等，你唔好趁我唔覺意果陣又亂咁塞設定得唔得？」
「魔具普遍就係增強使用者魔力既裝備，」三葉又發揮佢目中無人既看家本領，完全無視我既吐槽，自己繼續解釋「不過對於唔識魔法既你應該好難理解……」
「你放心，我係準魔法師。」仲有五年我就考到魔法師牌。
「等等，你既語氣令人好噁心……為左減少同你既對話我就長話短說。」
「係……」「收聲！」咩……
「將你既裝置放係森之鐲旁邊。」佢應該講緊我部電話。
三葉將森之鐲平放係手心之上，而我就拎住唉瘋，手心朝下咁伸埋去佢手既旁邊，就好似Nokia個經典拖手Logo咁。
「…………」
「…………」
一輪尷尬既寧靜。
「得……」「收聲。」未呀？
「你試下啟動個裝置。」
我試下開機，開得郁就預左，但通常無電既情況下強行開機馬上就會熄返。
搶眼既黑蘋果再次浮現於螢幕，Load完之後我馬上就望向右上角。
1%
但更加重要既係旁邊既閃電符號。
「森之鐲既厲害之處就係佢體積雖然細，但可以供應無限量既魔力，細水長流。」
我睇得出呢條水真係好細下。
「當然，要同白石聖堂地下室『果舊野』比較係無可能，但係對於你呢個身上完全無魔力，連補充魔法都做唔到既異鄉人黎講已經係非常有用。」
傻啦，補魔力既方法有好多種既，係睇下你肯唔肯幫我啫……嘿嘿。
咦等等！
「你點知道聖堂地下……」「收聲！」室既事架？
「諗野果陣不自覺將腦裡面既野講埋出黎既壞習慣你有無考慮過改左佢？」
屌！原來係咁！
「收聲呀！」
話咁快，部電話既電又玩完，然後又熄左機。
「比返你。」三葉將袋尿（森之鐲）遞返比我「唔好係其他人面前拎出黎。」
聽完之後我就將森之鐲同電話袋埋一齊入褲袋。
舊野會自動幫附近既電池充電，好可能會散發幅射，放係果個位有無問題架，會唔會影響生育能力架……你地可能會擔心。
但係對於一個無機會生育既人黎講，呢個擔心係多餘，哈哈哈，我真係無懈可擊！
我更加擔心既係我部電話會唔會刮花隻手鐲。
「至於隻手鐲背後既故事呢……」
原來仲有下文？
「我第日先同你講，今日同你講咁多野我已經覺得好精神透支。」三葉用手指按壓自己既太陽穴。
講到呢到，廣闊既田海終於見到盡頭，前方已經係一條平坦既大路。