廢青於中世紀魔法世界的生存法則: 29, 熊人反擊戰
「乜你好鐘意企係人地個肚上面傾計？快啲餵佢啦！」
我趴係首領個胸上面，盡量避開佢傷口接近佢口部既位置，然後趁佢開口呼氣既時侯將森之實扔左入去。
三葉拖住我隻手跳返落地面，後指住首領個頭道：「你睇下。」
首領既傷口以睇得見既速度癒合，話咁快已經好返晒。
乜我食左個咁不得了既道具！點解我任督二脈仲未打通既？
「好彩都……」三葉頓一頓，然後咳一聲再道：「好彩劫只係對佢噴火同埋用物理攻擊。」
「吓？咁都仲唔夠？」
「當然，隻熊侏都要有啲本事先頂得住劫既火炎同埋物理攻擊。但係若果劫認真的話，食幾多森之實都救唔返。」
「照你咁講你都唔肯定隻熊侏係救得返，咁你又去搵森宿拎森之實？」
「若果隻熊侏首領無得救的話，熊侏一定會直接放棄呢個地盤，但係佢地無咁做。」
首領已經坐起上，將身上面既補統統都撥開，仲爭啲撥中我！
「熊侏一直拖延時間，終於等到呢一刻。」
「嗥－－－－－－－」熊侏首領企起身，發出與其外表不相稱既狼叫聲，然後直接將身旁既樹木連根拔起當做武器。
然後首領以當日追擊我同菲兒既高速迅速跑到前線，然後用樹幹一掃，將拳鼠全部掃走。
雖然佢慘被劫秒殺147比0，但係係拳鼠面前佢都係非常之強大。
當日首領都曾經為我帶黎絕望感。
「熊侏就係一個咁既族群，族裡面既最強者負責帶領全個種族，若果首領狀態好的話，其他族員都有保障。」
「但係一人隊伍係任何競技上面都好難走得遠……」足球、籃球、電競、Gunpla等等……例子太多。
「無錯，今次既事件就充份將呢個制度既壞處反映左。而蒂芬妮亞既處境就好似熊侏咁……」
三葉無啦啦將話題扯左去政治到。
「而所羅門國就好似拳鼠一樣，各方面都係平均地強，執政既所羅門血族更加係精英中既精英。」
「哦……」我對各國國情唔係好熟悉，所以完全插唔到嘴。
「呢刻既蒂芬妮亞，就好似無左首領一樣，隨時被滅國都唔奇怪。」
矣矣？即使係咁大公國既國力都比蒂芬妮亞落後？我不得不再次因此而感到詫異。
「當然，知道蒂芬妮亞實際情況既人唔多，如果唔係所羅門國一早宣左戰。」
迷底立即解開。
係我地談笑之間，拳鼠已經灰飛煙滅，被首領打到夾住條尾走。
所有熊侏見狀都係到手舞足蹈，圍住首領起哄。
呢一刻我竟然有熊侏呢種生物其實都幾可愛既錯覺！
係短暫既慶祝之後，熊侏群終於再次意識到我同三葉既存在。
頭先三葉既仇恨值究竟仲有無剩呢？
熊侏首領緩緩移到我倆面前。
唔通呢隻熊頭豬腦既怪物認得到我？成兩個星期都仲記得你會唔會太記仇？
「佢係咪想打？」我低聲問三葉。
「如果係又點？再打傷佢？好似劫咁樣？咁我地咪白做？」我立即被連珠炮發。
「咁點？走佬？」若果係要走人的話，頭先佢地慶祝果陣本應係最佳既時機。
「溝通。」係，要溝通，仲要和諧同包容添。
咁容易就搞得掂既世界就無戰爭啦！
三葉舉高手掌，對首領道：「我倆無意與你開戰。」
首領歪歪頭，於事我話：「好似聽唔明喎……」
「咁我用另一種方法。」三葉咳一咳後道：「I have no intention to fight against your race.」
首領聽到之後竟然立即有反應。
「P……Peace.」
原來隻熊人係海外品種！驚天大秘密！
下一刻佢講Together………Strong我都唔會再意外。
首領於三葉面前跪低，垂低既頭正好被三葉伸出既手觸到。
「其實熊侏都有人性，乜都唔講就郁手既同野獸有咩分別？」三葉道。
「但係當初呢群怪物都係乜都唔講就郁手。」
「咁佢地係野獸，你係咪要用自己同野獸比較？」
「……………歪理。」但係我又反駁唔到佢。
「隨便你點講，但係作為高等物種就應該有高等物種既器量，亦都要有高等物種既素質。明白自身同其他物種既差距而表現出應有既行為舉止之餘，亦都需要包容低等物種不文明既作為。」作為一般人，我難以理解三葉既貴族既思考方式。對我呢種典型香港人黎講，發現有任何人做錯野第一時間就要唔理三七廿一批鬥左先。
打機都識啦，行軍打仗既時侯霸佔高地係好重要；而係網上罵戰既時侯，稱為「道德」既高地更加係兵家必爭之地。
「等等……我開始頭暈，你可唔可以直接入結論。」
「講都唔講就將咕孖打成咁……真係蠻不講理！」三葉表現得非常氣憤。
「等等，邊個係咕孖，唔好無啦啦又介紹新人物得唔得？我跟唔切。」
「佢咪係咕孖囉。」三葉指住熊侏首領，後續道：「我岩岩改既。」
「……………」
我先唔吐槽三葉幼稚園級數既改名口味，點解你要無啦啦幫人改個名先。
就算要改，都應該係叫做技安呀，弗力貝爾，又或者Grylls之類既男性化名稱。
改個咁cute既名我接受唔到lor。
「咕孖，你鐘唔鐘意呢個名呀？」
「嗥－－－－」然後首領又真係應佢，你唔係唔識聽中文架咩？
其實餵隻熊食森之實既係我，點解我既功勞比個癲婆出黎講句英文就搶晒？公平咩？
下一秒三葉竟然仲爬埋上首領既肩頭上面。
「好，起程。」
「仲有邊到可以去？」
「你咪理咁多。」