廢青於中世紀魔法世界的生存法則: 28, 鐵馬尋橋

然後果日我就係聖堂地下室進行左各種嘗試，輸入21800000可以call電單車都係果陣發現。
但由於可以落地下室叉電既機會實在唔多，所以無乜機會練好手車，如果唔係我就可以係白石鎮入面做外賣仔嘉穎，唔使被迫從軍。
「到喇。」三葉指住前方。

佢所指住既方向有一大堆列好隊既熊侏，佢地都統統抬住同一塊大木板，木板上面躺住既正正係熊侏首領。
「跟住落黎你要做既野好簡單。」三葉打開裂縫，並拎出兩樣野。

第一樣野係土豪魔杖，第二樣野係森之實。
大概因為召喚裂縫都係魔法，所以此刻所有負責護衛既熊侏都留意到我地。





換轉係平時佢地已經展開進攻，但係由於拳鼠步步進迫，所以佢地先無輕舉妄動。
講返三葉，雖然呢條癡線婆話我要做既野好簡單，但係佢既價值觀根本唔可以用常人既角度去理解，所以我可以肯撚柒定佢派比我既任務將會難到仆街！唔係既我切柒煲湯派街坊！
「就係將森之實餵比熊侏首領食，係咪好簡單呢？」

「簡單……簡單……你當我Lulu咩？咁撚簡單你唔撚自己去做？」睇到啦，高登魔咒都出動埋都改變唔到。
「都得既，咁引開所有熊侏注意既任務就拜託你。」

「對唔住我係Lulu，請包係我身上。」

「雖然唔知Lulu係乜，但係拜託你喇Lulu。粒玉借埋比你用下。」三葉仲將寶玉拆左出黎遞比我。




但係粒玉對於唔識用魔法既我黎講又有乜用？我仲要用一隻手拎住粒玉，咁咪仲論盡？
三葉舉起魔杖，開始詠唱。

佢會唱乜野魔法呢？明明依家我最應該擔心既事並唔係呢一樣。
事到如今都係時侯整理下今次熊鼠開戰既前文後理。
兩星期前我岩岩進入呢一個世界，當晚因為我誤用魔法所以招來熊群，連熊群首領都出現。

然後劫就以好似大師牌屌打銅五區一樣既實力差距迅速秒殺熊群首領，熊侏手下執返佢條屍就速速收皮，以免被劫Penta Kill。
之後兩星期發生既事，雖然我唔係親眼睇到，但作為磨擦力驚人既高登仔，要推理出黎其實唔難。
拳鼠呢種生物咁戰鬥格，一定係周圍撩交打。





而平時拳鼠一進入白石附近熊侏地盤既時侯，都有熊侏首領守住條中路。
但係依家熊侏首領比劫送左返溫泉，咁條中路搵邊個守住呢？

答案就係搵左堆minions去守喇，但係堆拳鼠根本唔將堆minions放係眼內，只係當佢地係錢咁farm。
拳鼠推完一波又一波，已經攻到黎大本，但係熊侏首領仲respawn緊。
而我地既任務就係加速熊侏首領既respawn timer，然後就食住花生睇首領著住隻homeguard鞋衝出黎penta kill返拳鼠。
「得喇得喇，你講咁多做乜呀，拿拿聲做野啦。」

「屌，原來又講左出口！」
此時三葉雙手握住插左係泥土既土豪杖，一道類似Bless of the Ark既魔法障壁以佢為中心展開，而守衛熊侏就用緊摺凳以外既各種武器意圖打穿塊牆。
大約八成既守衛都被三葉呢個法師Tank緊，而我呢個半桶水既戰士係時侯出招對付剩低兩成既士兵。
我以左手執寶玉，右手執匕首，頭戴椰殼既笨拙形象慢慢接近熊侏首領，而佢既手下見到我之後都立即望住我，架起戰鬥既姿態。
就等你見識下我係軍校入面學過啲乜野啦！！





「喝－－－－！」我衝往熊侏。
「吱吱吱－－－－」

於同一時間拳鼠群於三葉後方出現。
係熊侏於0.02秒之內作出判斷之後，就立即跑去拳鼠面前組成防衛線。



「點解連怪物都要無視我！我真係咁無威脅咁無存在感咩？？？」
「咪咁多廢話啦，拿拿臨餵隻熊侏首領！」

其實無晒守衛對我黎講更加方便，但係呢種莫名奇妙既負碌我唔係好慣。
我走到首領旁邊，佢既體形真係好巨大，大到我要由佢既手臂爬上佢心口先可以餵到佢。

佢上半身好多位置都敷住唔同既草藥，混埋一齊既味道真係唔好聞。




就算過左兩個星期，熊侏首領被劫燒傷既痕跡依然顯而易見……得罪權貴既下場就係咁慘。

「哇……落咁重手……」唔知幾時開始三葉就企左係我旁邊。
「咦，你唔係應付緊熊侏架咩？」

「一個只係放左防禦魔法既少女同一班殺人放火既拳鼠，熊腦都諗到要打邊個。」

多謝你呀三葉天使，你令到我心裡面好過好多！
「不過你個腦就未必諗到。」

八婆！！！！鐵馬尋橋啊.jpg