廢青於中世紀魔法世界的生存法則: 27, 用線叉電係異世界已經過時

時間係我黎到白石鎮既第二日，就係我同班正太蘿莉上完常識堂，學左呢到既時間單位之後。
所有正太蘿莉都懷住愉快既心情落堂。

正太同蘿莉臨走果陣除左同雪菲兒道別之外，亦都有同我講再見。
好可愛！正太好可愛，蘿莉好可愛！明明細個果陣咁可愛，點解長大左會變成咁醜陋既生物？
我透過窗戶望向大草地，好多正太蘿莉係到追逐嬉戲，搞到我都想參加埋一份。

此時雪菲兒走黎我身邊：「唔好意思，教導孩童都係我工作之一。」
「唔緊要，我頭先都學左好多野呀，雪菲兒老師。」





「被大過我既人稱呼我做老師，總係覺得唔好意思……嘻……」
「咳咳。」開門同咳嗽既聲音由我間房門傳出，原來係老野。

雖然我只係係間房訓左一晚，但係對於其他人問都無問過我就訓我張床，我個人黎講係幾反感。
但係係圖書館入面，話事既係雪菲兒，而訓我張床既係係白石鎮地位好高既長老，我只可以將依口氣吞落肚。
「長老，你覺得好啲未？」

「老身一副硬骨頭，不需太多休息。」
「等我估下先，長老你想搵我？」我唔等老野開口講就率先問。





「當然，不然老夫於此處等待有何意義？」
我地之間再無多餘既說話。
長老立即就帶同我及雪菲兒圖書館行去白石聖堂，雖然距離唔算好遠，但係短時間內來回多次比我既感覺好多餘，點解唔一開始就係聖堂搞掂晒先放我返黎？
但係今次我地無係正門進入聖堂既拜禮堂位置，反而係另一端既鐘樓位置進入。

進入鐘樓梯廊既位置，一邊係往上旋轉既樓梯，另一邊係往下既樓梯。
我同雪菲兒跟隨住老野繼續往下前進，只係一層之隔，四周已經昏暗得伸手不見五指。牆上既火把係咁既情況下無乜照明效果之餘反而仲有啲恐怖，幸好菲兒召喚鬼火以作照明之用，我先不致於嚇到瀨屎丟人現眼。
「估唔到咁宏偉既建築物下面有個咁既地方……」

睇起上黎就好似收埋囚犯既地牢一樣，但係走廊兩旁並無監倉，所以我先放鬆小小。




「知道地下室存在之人不多。若非必要老夫也不想帶同你。」

換而言之我係到死左都無人知，不過我琴日先黎到依個世界，本身就唔多人知我存在。
但老野帶埋雪菲兒黎，應該唔會係想對我不利。
走廊既末端有對頗為巨大既鐵門，而且鐵門上面有好多花紋裝飾。

一個唔多人知道存在既地方，整到咁靚到底為乜？
門後既事物一定唔簡單。
「今日之事，絕不能對人提起。」老野神情非常凝重。

「嗯……」雪菲兒認真回答。
「知否？」老野向我確認，語氣非常重。

「知道，知道！」反正除左雪菲兒我都無其他傾計既對象。
係同我地確認之後，老野推開大門。





大門剛開，門縫之中已經透出強烈藍光。
老野無將鐵門全開，只係開出一道足以讓人通過之鐵門便趕緊關上。

點解老野要偷偷摸摸？佢明明係村入面既長老？
門裡面係一個樓底兩層高既地下室，我地身處既位置係地下一層既平台，旁邊一條前往地下二層既樓梯。

地下室入面完全無火把，但係根本唔需要。
因為地下室正中間放置左一塊極之巨型既礦石，不斷放出強烈既藍光。

礦石呈不規形狀，但係勉強可以形容為菱型。
「菲，你應明白此乃何物。」

「我知道。」雪菲兒臉上既係驚訝既表情。
「至於你，待你有命從生存測試回歸老夫再解釋。」





「嘉穎要參加生存測試？」似乎雪菲兒並唔知情，我點頭回應。
「長老你帶我黎有咩目的？」

「將裝置放在石台之上。」
佢講既裝置就係我既電話。

而係地下二層菱型礦石既基座前面有一個由石造成既立方體，長闊大概25cm，高度及腰。相信呢個就係佢口中既石台。
我從樓梯走落地下二層，將電話放於石台之上。

係電話接觸到石台既同時，從礦石散發出黎既藍光漸漸延伸至電話之上，並將其包圍。
十餘秒之後，藍光漸漸消散，而我亦上前拎起部電話。

電話仲有微暖既感覺，講真我都有驚過會唔會爆炸。
大拿拿六千幾銀一部，如果爆左點算？





我同好多幸福既小朋友唔一樣，手提電話呢種奢侈品屋企係唔會提供（雖然我細妹三個月換一次電話），我係透過欺詐（主要用扮工藝術黎欺騙我既僱主）辛辛苦苦先儲錢買到部電話。直至到我將自己既電話號碼講比我父母之前，佢地都唔知我原來有部電話。
當然啦，可能講完佢地都唔知，因為屋企從來都無打過比我。
我按實電鍵制，數秒之後蘋果圖案就浮現。

100%電源。
原來唉瘋六都有無線叉電功能，執笠啦三叔！

「請隨意使用魔法。」
「就算你叫我隨便用魔法……我都唔知有咩技可以用。」

「琴晚你咪用過召喚術囉。」菲兒提醒我。
「係喎……打三條九召喚三隻警犬黎用下都好。」

我於電話中輸入九九九，電話迅速接通。




唔係掛，駁通左？會唔會比人話我浪費警力架？

然後電話上面浮出一個黑色既魔法陣，三隻黑犬從魔法從中躍出。

三隻狗出黎之後打橫一列咁坐係我面前，最左邊果隻仲用後腳黎R耳仔。
視線放返落自己部電話上面，畫面依然顯示為通話中。
「喂？」我對部電話講。

電話既聽筒只傳來沙沙聲，好彩無報案中心既Madam警告我叫我咪玩電話。
「汪！」但係三隻狗同時對我一吠。

「下個指令吧。」老野你已經對我下左個指令。
「唔………hand hand？」我又對住部電話講。

而三隻狗立即同時舉起右手。
………………
「嘩，好可愛呀！」

菲兒立即走去黑犬旁邊，一左一右咁抱住兩隻狗。
Tag:人獸……嘻嘻……
「魔力的消耗如何？」

老野提一提我我先醒起個咁重要既問題。
一望螢幕右上角既電量計，嘩已經用左30%！
我召喚三隻狗經過半分鐘到無已經用左咁多電，即係啲電係幾乎以一秒鐘1%既速度消耗緊！

為左保留珍貴既電，我立即禁cut線，然後被抱於菲兒懷中既兩隻黑狗同最後一隻葡萄的小狗同時化為黑煙消失。
菲兒起臉頰，對我表示不滿。

唔好意思，呢個耗電速度對於無得隨時叉電既人黎講實在太奢侈。
「填充魔法後再試吧……我輩還可以在這裡多留一會……」