廢青於中世紀魔法世界的生存法則: 26, 世界末日慘啲定電話無電慘啲？答案係一樣，因為電話無電就係世界末日

「睇黎我地已經遲左……」

係三葉既引領下我地返到琴日鼠熊兩族開戰既戰場。
於戰場之上，遍地都係熊侏既傷兵或者屍體，相比只下拳鼠既屍體只有數條。
「沿住啲屍體行，快！」

未幾，就見到拳鼠同熊侏正在交戰。
熊侏既數量比起琴日更加少，而且仲節節敗退，再係咁落去熊侏一定全滅。
「琴日既召喚術你再用多次！快！」





「我電話剩返唔多電，我唔知支持到幾耐……」

「乜野係電？」

「你當係魔力。」
平時我好討厭村裡面既人字裡行間塞設定仲唔解釋，但係原來自己都會犯同樣既錯。

解釋對自己黎講係理所當然既野其實又真係幾煩，呢個道理琴晚同森宿玩橙果陣明明我就應該知道。
「2-1-8-0-0-0-0-0！」





我再次輸入CALL我丫號碼，同樣既KFC外賣電單車再次於視線邊緣出現慢慢駛近。
電單車停於我旁邊之後，我立即就騎上車。

我仲未黎得切開口示意，三葉就已經坐左係我身後面。
然後三葉雙手穿過我腋下交疊係我腹前。

我好唔慣，坐係電單車上面已經唔慣，更加唔慣既係比囡囡攬住我條腰。
「快啦！」

「………哦……」




但係三葉本人完全唔覺得有任何問題。
我踩盡油門，引擎亦發出巨響，拳鼠聽到之後都受驚讓開，而熊侏忙於應付拳鼠根本無暇理會我地。

雖然生物會自動避開，但係死物就唔會放你在眼內，夠薑咪撞我囉，吹咩？
我依家超速駕駛，仲要載住條女而且條女係無戴頭盔既，若果係香港比人捉到我會比人扣幾多分？

答案係0分，因為我根本就無電單車牌，哈哈哈哈哈哈哈哈！
鼠熊既戰線已經被我地遠遠拋離係後面，而有不少數既熊侏繼續迎臉而黎，睇黎方向無錯。但係呢個方向既終點究竟有乜野呢？
忽然間，電話屏幕一著，純白色既畫面上面有個黑色既蘋果。

呢個畫面充份反映左簡單就是美，黑白既顏色配搭令到蘋果非常之突出。
除此之外，出現呢個畫面就意味住我電話無電。
屌！
就係下一刻，電單車忽然消失，根據牛頓第一定律……算啦，總之依家我就繼續以高速向前仆，食晒泥！
好彩我有個椰子殼保護住個頭，如果唔係我可能已經死左，呢到既死亡flag會唔會太多？





「死得未？未死得就拿拿聲起身繼續行。」
對於架車突然消失，三葉就好似早有準備一樣，係架車消失既一刻立即施展魔法令自己身上既沖力化解，並且輕描淡寫地著地，係爭在未擺返個pose等架電單車爆炸。
「你把口唔好咁臭得唔得？」

然後三葉對自己既手掌「呵」左一口氣再聞，然後話：「無野呀，幾清新。」
「…………」呢個癡線婆既反應令我摸不著頭腦，到底佢係玩野定真係唔明我講乜？為免做直必我都係決定終結呢個話題止蝕離場。
我企返起身之後快步追上三葉。
「你有無發覺自己既召喚術好廢？」

「我都覺，廢既係我既召喚術，唔係我。」

事實上我連自己既召喚術有咩原理，可以做到啲乜都唔係好知。
我只知道無電就仆硬街。
各位都應該好記得我曾經提過部電話係之前曾經係聖堂叉好電，到底係乜野一回事呢？係時侯入回帶mode。