廢青於中世紀魔法世界的生存法則: 25, 可以用平常既語氣講啲獵奇話題既人學名係變態，而我地既團隊正正有兩個變態

回程既路可以話係天國級，唔使兜路，唔使琴高琴低，輕鬆到我想高歌一曲。

「在森林和原野是多麼的笑意………」
「你可唔可以靜一靜？」

「親愛的朋友呀你在想什麼？」依家森宿唔係到，得返我同三葉兩個，而大家都好清楚三葉又殺我唔到既，換而言之唔使比面佢。
「我諗緊點樣可以令到你收聲。」

「咁你諗到之前我唱多陣先。小明上廣州……」
「其實我已經有初步構思，你要唔要聽下？」





「好呀。」
「Fire Bolt」

與擲石一樣，若果目標係我的話，三葉施放既魔法係唔會命中。
訓練有素既我對此處之泰然，我問:「你咁快就無貨？」
「首先，到目前為止我對你做出任何致死既攻擊都會全部偏離目標。」

「我知，所以我先咁囂張。」
「但係……」





「嗞……啪」樹木倒塌既聲音。
我抬頭一望，燃燒既樹幹正向我呢面跌過黎！

「Fire Bolt」
三葉再來一發，將樹幹擊走。
「由魔法對環境造成既影響，一樣可以致你於死地。」

我吞吞口水。
「舉例黎講，我將大範圍既地面變成熔岩的話一樣可以殺死你。放心啦，係你身體接觸到熔岩果一刻，你身體入面既水份就會因為高溫而迅速蒸發，一秒都唔使就可以令你成個人爆開，過程又快又無痛……嘿嘿……」三葉瞇起雙眼向我投來不懷好意既眼光。




虧你個癡線婆可以講埋啲咁獵奇既野而臉不改容！

「對唔住，係我錯，我以後唔敢，請你高抬貴手原諒我。」我立即作出土下座真誠地道歉。

經過我0.5秒既詳細考慮之後，我覺得剩係口頭上既道歉係唔夠。
「喂……你做乜除衫？」

此時我已經將上身衣服脫下，露出骨杉杉既胸部，然後再次真誠地土下座。

「對唔住呀三葉大人，剛才小人我一時太興奮，所以有小小囂張。希望你大人有大量有怪莫怪，原諒下小弟。」

「你咪道左歉囉，做乜要除衫再道多次？」我抬頭望向三葉，但係三葉既視線刻意避開我。
我除上身衫都已經咁，假若我除埋褲露埋械佢會點？呢條八婆似乎比我想像中純情。

呢一點或者可以好好加以利用……嘿嘿嘿嘿……




「是咁的，道歉時要露出胸部係我家鄉既常識。」

「我以為你既性格咁畸型只係個別例子，原來你家鄉所有人都咁變態……」
死八婆！我唔準你咁講我啲高登弟兄！！！！
「係呀係呀，世界上存在住好似我家鄉咁既地方真係不幸！哈哈哈哈……」

古乳有暈忍一時風平浪靜，退一步海闊天空，作為港豬面對三葉呢種高牆，我只需要高舉屎忽。
「原諒我……」「得喇得喇你好煩呀，起身啦！」「……這一生不羈放縱愛自由。」

提起海闊天空無理由唔大合唱然後和平散去，你話係咪先？

「你既顏色黑到都唔知你真心定假意……」三葉一臉厭惡既表情，然後續道：「不過算啦。」
我企返起身拍走膝上既乾泥，後問：「話時話，點解你地既魔法會用英文？明明日常既溝通係用………廣東話？」我其實有呢個問題好耐，
「你知唔知道魔法既起源？」





「等我估下先，龍？」

「無錯。」

我係呢個世界撈左兩個星期，已經好清楚呢到既法則，總之有咩解釋唔到入龍數就OK！
「而我地使用魔法果陣都需要吟唱咒文，咒文既長度通常與強度成正比……畢竟咒文又長，威力又低既魔法一般係唔會有人用。」

我回想起當初被熊侏首領襲擊果陣，菲兒連續唱左好多下Fire Bolt，但係緊急時侯救左我既係Lava Dart，背後一定係有戰術考量。
「最簡單既魔法，例如Fire Bolt，只要夠熟練的話都可以透過閱讀魔法名稱而聯想起咒文，節而省略將咒文吟唱既步驟……雖然Fire Bolt既咒文都只係得六組詞語。」

聽起上黎同電腦既Location有些少類似，例如係A:\Program File\Riot Game\League of Legends\Log\Joystick入面都可以搵到好多三個英文字母同三個阿拉伯數字組合成既魔法。
然後當我覺得逐層開好煩既時侯，我就會直接放個捷徑-Joystick係桌面，每當夜闌人靜既時侯我只要對住螢幕大嗌「Joystick！」就可以成功召喚上述魔法。
「但係比較複雜既魔法，例如Micro-Nova，成段咒文有百幾組詞語，閱讀魔法名稱都難以聯想整段咒文，唔係唔得……但真係好難。」

「咁點解你用粒寶玉就可以省略成段咒文？」





「嘛～有機會再同你解釋。」

「扯……」我最憎人賣關子。
「總而言之，一個人魔法勁唔勁，取決於幾樣野。一、魔法既威力，同樣既魔法由唔同既人使用都會有唔同既威力；二、吟唱省略既極限，順帶一提，我常用魔法以外既極限大概係二十五組詞語，即係二十五組詞語以上既魔法我就一定要成段咒文唱出黎；三、使用魔法既種類，即係你記到幾多種咒文。」

對於平時無乜打機既人可能比較難理解，但係本人有豐富既網遊經驗，對我黎講其實唔難。
「但係你講左咁多都仲未解釋到點解魔法既咒文係英文。」

「因為魔法既咒文係龍既語言……係咪即係你口中既英文？係方舟教成立之前出版既魔法典籍多數都係用龍語書寫，直到700年前大公國既魔法教材先開始用人語取替。」原來呢個世界都有母語教學定英語教學既議題，不過對我黎講唔係用普教就得。
「順帶一提，蒂芬妮亞既魔法係以龍語黎傳授。」我已經見到大公國國力落後既原因！

「Oh, really?」我仲以為用英文唱魔法只係單純地想扮有型。
「不過依家唔係輕鬆解釋魔法既時侯。」你都已經講左好多。





「點解既？」

「我唱左Fire Bolt咁耐附近仲未有熊侏出現。」