廢青於中世紀魔法世界的生存法則: 24, 「君子不奪人所好」……我已經失去左做君子既資格

「頭先個賭局既獎品呢？」
「嘛……」三葉望向森宿，續道：「如果你唔想交出黎，我唔會強迫你。」

咁即係點？如果輸果個係我你又會唔會阻止佢殺我？
當然，我只敢係心裡面不滿，畢竟我係呢到係無任何發言權。
「畢竟年輕人也是以性命相搏。」

森宿三腳站立，右掌舉起，口中默念。
「吾生於世六百餘年，盡見世間之惡，快樂之事、欣慰之事，事事未聞。」





隨著森宿吟唱咒文，可見既翠綠色能量漸漸往森宿掌前聚集。
「天下毀於一朝一夕，父之過子之恥，悲嘆之聲、苦痛之聲，聲聲入耳。」

我正奇怪緊點解首詩既開頭係六百年而唔係千八年，原來係講緊『龍降』既事。
做名人既子女從來都不好受，父母威威會比人拎黎比較，另一方面如果老豆老母臭連自己都要承受恥辱，你估做梁齊昕唔辛苦呀？
「微風輕拂大地回春，白石之地邂逅，一份誓言、一隻手鐲、以証山盟。」

上一句仲講緊遊戲改版級數大Event既時侯，下一句忽然魯芬急轉灣談情說愛，我跟唔切。
「時光飛逝十載寒冬，喜怒哀樂與共，妳的笑容、妳的淚水，未敢忘記。」





此時聚集既翠綠色能量發出強光，一陣清風以強光為中心散發開，樹葉亦因此而搖擺沙沙作響。
「你知唔知首詩講緊乜？」我低聲問旁邊既三葉，佢既眼神被森宿既魔法深深吸引住。

「當然知。」佢簡短地回答，似乎不想多言。
強光散去之後，一隻配色同森之實相當相似既手鐲憑空出現，睇黎就係說好的『森之鐲』。

森之鐲被一層好薄，好似番鹼泡既綠色氣場包圍住。
「拿去吧。」森宿龍指輕輕一彈，個泡泡輕輕飄至三葉面前。

三葉雙手張開，輕輕托起泡泡，懷疑地問：「真係可以拎走？」




「你再問我就要後悔了，趕快拿了就走。」

森宿似乎都係萬般既捨不得。
「參加賭博既係嘉穎，付上賭注既都係嘉穎，所以隻森之鐲應該歸佢，森宿你無意見？」

「那已經是你的東西，我不能有意見。」森宿再次盤坐。
三葉輕輕將泡泡推到我面前，我小心翼翼地接過氣泡。

「聽完你首詩之後，仲拎走你隻森之鐲，咁我咪變左奪人所好既衰人？。

「咁你要唔要丫？你唔要我比返森宿。」

「要！」
「啪－－－－－」森宿吐舌大力一鞭，我腳邊既地面被打碎，被舌頭推開既空氣令到泡泡輕輕向上飄了數十厘米，然後又回到我雙掌之中，氣泡亦因此而破裂，我手掌亦因此直接感受到森之鐲既觸感。
「請珍而重之的對待此手鐲，若有任何閃失，到天涯海角我也要把你找出來碎屍萬段。」





一個裝飾品姐，又唔係嫁女，使唔使咁呀？
「係！小人銘記於心！即使奉上心臟我都會保護好隻手鐲！」我右手握拳放於胸前，作出敬禮。

「你的顏色……嘛，算了。」爭啲唔記得森宿睇到我既psycho-pass值添！

「好，差唔多要起程，開路既工作就拜託你。」三葉回頭望森宿道。

森宿又是龍爪輕輕一揮，前方既叢林自動退開，讓出一條小路。
「我走喇，得閒會黎再探你。」

「打搞晒！」我向森宿點頭敬禮。
「嗯。」
「你都唔好再被過去束縛住，得閒就出去散下心啦。」





我唔知道三葉講呢句既動機，但係大概同頭先首詩有關。
「你以為把我留於此地的是過去嗎？那種東西等你兩個都告別童貞之後才討論吧。」

「ＭＩＣＲＯ－ＮＯＶＡ！」
三葉馬上拔出魔杖還擊，魔杖頂端既寶玉圍繞住殘餘既魔法氣息。

之前比成班怪獸追你唔肯用寶玉，依家比人撩兩句就用？咁我地琴日咁危險為左乜？
「哈哈哈哈哈哈哈………」

爆炸過後，巨石之上已不見森宿之身影，餘下既就只有佢既笑聲。