廢青於中世紀魔法世界的生存法則: 23, 越理所當然既野越難描述

我投降，輸一半OK？
現狀報告　－　滿地都係橙色，被人咬過一啖既生果，個別仲比人食左半個，但係無任何一個係完全食晒。
「還不行嗎？」

顯然係唔得，我放低手中既失敗品。
無錯，森宿係非常之厲害，佢可以根據我既描述好精確咁創造生果；換而言之，問題係出係我身上。
『橙』呢一種生果對我黎講實在太過理所當然，理所當然到一個我唔知點樣形容既地步；若果你玩超級無敵關大閘抽中橙，我勸你立即PASS。

「點解你地有橙色既構念，但係無橙既概念咁得意？」





「莫非你們的世界也有叫做『紅』、『綠』的生果嗎？」我就係咁樣被秒殺。
「點解要咁執著於係咪『橙』？呢舊生果都唔係咁差，係外皮難食左啲姐。」三葉背靠果樹坐於樹蔭之下，佢隨手執起一個失敗品咬左啖。

「首先，橙係一種要剥皮先食得既植物。」「你唔早講！」我頭部被飛橙擊中。
「其次……」「嗖－－－－－」三葉再次擲出既係石頭，但係同之前既石頭一樣，係我耳邊僅僅擦過。

「你繼續講。」三葉道，唔知點解呢句聽起上黎就好似「夠膽你就再講落去」一樣咁有威嚇性，所以我立即收左線。
「你還要試嗎？」連本身非常有興趣既森宿都失去左耐性。

今次令我深深明白到憑空創造物品係有幾困難，要比喻的話就好似係個自己未去過既大型儲物室入面，毫無線索地搵一樣都唔知存唔存在既野。




失敗次數越多並唔代表跟住落黎既成功概率會提高，打機果陣我最討厭咁樣既情況。

試下打Pokemon刷下神獸你就明。
除此之外，森宿既創造能力都令我驚訝，除左最基本既外型之外，連味道、口感、營養價值、生長方式等等都可以設定，以我理解（森宿係用呢個世界既方法黎解釋）佢甚至連基因排序、份子結構等等都可以調整。若果我係對橙甚有研究既植物學家，我既描述應該可以令森宿創造出還原度達95%既靚橙。
可惜我唔係。

「我投降。」我已經食左成晚失敗品食到飽；順便一提，我手上既失敗品咬落去既口感係同擦膠一樣。
此時提默已經漸漸升起，感覺大概係香港夏天四點左右咁

「好喇，餘興節目玩完，係時侯做正經野。」




「森之實，對吧？」森宿馬上就明白三葉既意思。

「無錯。」三葉亦都爽快確認。
「要多少？」以我聽返黎既資料推斷，森之實一定係一樣非常犀利既物件，而且森宿願意無限量供應。既然係咁仲唔拎盡佢？拎黎賣比npc賺錢都好……丫，一時唔記得左我唔係打緊機添。
「三個。」小杏好貪心！「反正唔係新鮮食就無效。」

後半句立即打消左我大量入手然後轉手賺幾十倍既念頭。
「接穩。」森宿龍爪輕輕一揮。

與之前森宿召喚植物不同，今次腳下既泥土並無任何異動。


接穩係咩意思呢？我抬頭往上望，應該就係跌緊落黎果三舊野？

我都幾肯定如果扑中我個頭的話，我一定當場頭破血流；係呢個世界地心吸力係由森宿老豆話晒事，根本唔需要由我黎重新發現。




忽然，三葉高舉右手大喝一聲。

「ＤＩＳＴＯＲＴＩＯＮ！」
下一秒佢右手手上已經係三個翠綠色既果實。

「有必要用這種魔法嗎？普普通通的用手接住不行嗎？」森宿盤坐於巨石上，龍頭低伏賴洋洋說道。
「不用白不用。」

今次我就同意三葉，打機果陣留戀技能冷卻，應用既時侯唔用技係新手常犯錯誤。
「嘛，隨你好了，反正我也大開眼界。」森宿閉上雙眼。
「喂，接實。」「唔？喔。」

三葉既投擲技術已經唔使再描述，我將手遞出便可輕鬆接住由佢掟出既森之實。
森之實外皮主色為翡翠綠，於頂端及底端都有不規則既金色花紋；外型與梨相似，但係更加細粒，同櫻桃相若，係一啖就食得晒既大細。
「趁熱食。」三葉說畢就將森之實鯨吞。





「根本就唔熱。」相反仲涼涼地，摸落去好舒服。

「你明咩意思咪得囉！」
我望住森之實，然後搖搖頭。

如果我憑外觀去估計佢既味道，入口既時侯一定又吃蹩。
「唔！」我將森之實咬碎之後，馬上就感受到甜味。

係雪梨果種清甜，森之實可以話係我黎到嶽砶之後，我最鐘意既食物。
我將果實吞落肚之後，馬上就感受到徹夜未眠既疲勞慢慢消失，除此之外仲變得相當有精神，呼吸都暢順左，考試都高分啲！
「多謝你既禮物先。」三葉向森宿致謝。

「舉手之勞不必掛齒。」
「係時侯上路。」三葉企起身伸伸懶腰。





提默都差唔多完全升起，四處傳來雀鳥啼叫聲。
等等！好似有啲野唔記得左！