廢青於中世紀魔法世界的生存法則: 17, 脾氣差而且無自覺既人(龍)真係好L麻煩……

與劫不同，森宿並無雙翼，取而代之既係更龐大既深綠色身軀及背上一層層既淡啡色厚鱗片。
「你真係完全無自覺……」三葉單手掩臉道。

「唔係丫，我都覺得佢無你口中講到咁差……」
「伏－－－－－－」「ＢＬＥＳＳ　ＯＦ　ＴＨＥ　ＡＲＫ」「兵－－－－－－」於迅雷不及掩耳之間，森宿伸出舌頭往我身上鞭打，而三葉見狀亦迅速施法，最後舌頭打於我面前既光牆之上。雖然舌頭無直接擊中我，但係舌頭打落光牆既衝擊力都令我被彈退兩步。
若果被直接擊中，又係即死。
「區區螻蟻豈敢插嘴？」森宿以其黃色既貓眼盯住我。
三葉此時嘆嘆氣對我道：「依家你明啦……」

對唔住呀，頭先係我怪錯左你！




「森宿你冷靜啲……」

「吾一直明鏡止水，又何需冷靜？」
果然同三葉所講既一樣，森宿係完全無自覺可言！
「無事不登三寶殿，三葉於此地出現，想必是有求於吾身。」

「無錯。」雖然三葉既魔法非常厲害，但係佢竟然可以用平起平座既語氣同條龍對話。
相反，同樣係人類既我，一開口就被人意圖秒殺，公平咩？屌你老母！

點解呢個世界咁多即死flag？比蟹蛛打中即死、比三葉擲石爆頭又即死、誤闖鼠熊兩族戰區又即死，依家連講錯野都即死？




太一你條躝癱出黎面對！
「係我地聚舊之前，先容我向我僕人介紹一下你。」

僕人？我幾時變左你僕人？
雖然係咁，我唔敢開口抱怨，以免森宿睇我唔順超開口又一鞭。

「無妨。」森宿用埋啲咁和諧既字眼，唔係頭先果一野的話，真係會比佢厄到。
三葉轉身向我道：「森宿，全名為森宿‧瑞亞嶽砶‧提默亞祖，由佢個名都見到，森宿乃嶽砶及瑞亞之子，又稱為森之意志。」

嶽砶同瑞亞兩個名稱都曾經係之前出現過，但係我都略略重提一下。




嶽砶，大地及重力之龍，為創世古龍提默及亞祖之次子。順帶一提，我此刻身處既星球亦因此取名為嶽砶。

至於瑞亞是生命及延續之龍，提默及亞祖之六女，已知提默及亞祖膝下唯一女兒。各位看倌仲記唔記得我劏豬之前要向瑞亞感恩？無錯，我口中既瑞亞就係森宿個老母，人類相信世上一切既食物都係瑞亞既恩惠。
亦即係，眼前既龍係創世古龍既孫，仲係兄妹亂倫既產物。

不過此刻係當時好危險，生命受到威脅既情況，變態如我都唔可以一滴、兩滴咁意淫……
至於森之意志本身，各位仲記唔記得老野係搭營之前同棵樹溝通過？當時雪菲兒既解釋係「佢只係同樹木溝通，尋求佢地既庇護」；仲有係劫秒殺完熊侏首領之後，老野向森林鞠躬，對象應該都係森宿。
「聽到吾身父母之名還不下跪？」森宿立即用其又大又銳利既眼神瞪住我。

「係係係！」我立即五體投地，做出土下座。
原來係有生命危險既情況下，我真係可以乜野尊嚴都唔要！
「森宿你唔好再玩佢啦，若果你玩死佢的話我會好困擾。」

「三葉開口求情的話，也罷。」森宿轉回平靜既視線望住三葉，再開口道：「至於你的請求……」
「十年無見，傾陣計先都無壞。」





你唔趕時間我趕呀大佬，太陽就落山，生存測試就快過左兩日喇！
但係三葉十年前仲係小妹妹已經見過森宿？

各位，一切既迷題已經解開！
我好肯定森宿係個變態蘿莉控！
「十年於吾身眼中並非長時間。」但係十年足以令蘿莉過賞味期限同變壞！

「但係呢十年我已經周遊左恩基大陸一次，外面既野你唔想知咩？」
森宿明顯有所動搖，然後回答：「姑且一聽。」

此外，森宿輕輕舉起其龍爪，然後無數樹根便由我旁邊破土而出，不久之後便形成一間屋，與當日老野扎營如出一轍。
「時間不早，三葉今夜就於此地休息吧。」森宿眼尾都唔望下我，完全感受到佢果種唔放我在眼內既態度，應該同我唔理地上螞蟻既態度差唔多。

「咁我恭敬不如從命。」三葉輕鬆回答。




＊　＊　＊
我坐於屋內靜心休息，始終今早既遭遇同之後於密林中前進都消耗唔少體力。

而我電話既電量亦都只剩餘30%左右。
不過附近有兩位咁厲害既大人物係到，相信都唔需要用到剩餘既電量。
不得不說樹屋隔音非常之好，我只可以隱若咁聽到佢地兩個傾緊計，但係完全聽唔到佢地講既內容，聽得最清楚既只有森宿豪邁既笑聲。
又隔左一段時間，亞祖（月亮）已經高掛於半空之中。

房間既門被三葉打開，開口既第一句係：「你肚餓未？」
「我以為你已經遺忘左我。」

「其實係森宿問起我使唔使餵我個僕人，我先記得你仲係到。」

「你！」先唔講森宿用餵呢種字眼，三葉條八婆竟然連我既存在都唔記得左！
「咁你餓唔餓？」





「餓！」
出返去屋外，果然已經天黑。

但係以巨石為中心，四周都有好多懸浮係半空既光球，離遠睇就好似螢火蟲一樣。
森宿依然盤坐於巨石之上，從高處俯視我。

草地上一如以往只有雜草，無任何可以稱為食物既野。
「想食乜？」三葉問。

「就你地啦……嘻嘻……」平時有人咁問我的話（雖然連屋企人都唔會關心我），我一定會9up一輪先回答。一見到森宿既眼神，我即刻又做返隻搖尾乞憐既狗。
小弟我唔求山珍海味，但係依到荒山野嶺，可以食啲乜？唔好話茶記外賣啦，Pizza Hut麥麥送都唔做你生意啦！
「佢話就我地喎。」三葉轉頭向森宿轉述。

「吾身聽到。」森宿龍爪又再揮動，前方土地又有樹木以異常既速度長出。




而樹木上面既果實亦都已經迅速長成可以食用既大細。

「自便。」
「森宿係掌管植物既龍，只要你想像到既植物佢都可以迅速生到棵出黎。」三葉向我解釋。

「當中包括肉食性植物，你有興趣嗎？」森宿笑容不懷好意。
「不必！不必！」

「嘉穎你有咩植物想食都可以叫森宿即刻種出黎試下。」
「係咪真係得架……」森宿唔似會聽我支笛。

「隨便你。」盤坐於巨石上之綠龍賴洋洋地回答。
「咁……蘋……」「伏－－－－－」「ＢＬＥＳＳ　ＯＦ　ＴＨＥ　ＡＲＫ」「兵－！」

屌！
「你還真敢命令吾身。」盤坐既森宿此刻四足站於巨石之上，原本身軀比劫更巨形既森宿此刻顯得更加龐大。

舌鞭既衝擊令我跌坐於泥土之上，此時三葉開口：「喂，森宿，你係咪要同我過唔去。」

「別誤會，你可是我的上賓。」森宿回應三葉時非常有禮：「但吾身實在看他不順眼。」

無錯，森宿口中既「他」就係我。
老老豆豆，我係森宿面前只係講過兩句話，但係兩句都激嬲到佢，到底係佢太易嬲抑或我嘴炮太強大？我真係唔知。