廢青於中世紀魔法世界的生存法則: 16, 正義感過盛同中二病未退燒只差一線

「我地依家去緊邊？」

「搵幫手。」難得三葉唔係答我隨便行。
即係咁，我就做緊生存測試既，明明返白石鎮先係我既目標，但係唔知點解三葉就夾硬拉埋我陪佢。
而更加唔知點解，明知對方威脅唔到自己生命既情況之下，我都係選擇左陪佢癲。
附近既樹木又漸漸變得更加濃密，我好肯定自己同白石鎮南轅北轍。
「先從原因講起，拳鼠對白石鎮非常有威脅。」三葉於毫無預兆既情況下開始解釋起黎：「若果任由拳鼠坐大，白石鎮東路會首先受到影響，屆時蒂芬妮亞既石頭供應就會短缺。以現時蒂芬妮亞既形勢及國力黎講，絕對承受唔起。」
係三葉口中好弱既蒂芬妮亞國力竟然在我現今身處既巴克撒大公國之上，點解所羅門國仲未宣戰染指整個大陸？
抑或三葉所知既同雪菲爾教我既有出入？
「過去十年，我係蒂芬妮亞逗留既時間最耐，亦有唔少友人。」





「你想做英雄咪自己去做囉，做乜拖埋我落水呢？」

「若果東路被拳鼠佔領，白石鎮會唔會袖手旁觀先？」

「應該唔會掛。我答岩左係咪有得走？」平時打機我都係鐘意衝主線唔理Side Quest果種人，等到爆晒機全身神裝之後再清都唔遲。
三葉嘆一嘆氣，然後回頭望我：「白石鎮出兵解決的話你都唔可以置身事外，要講原因的話，因為你返到白石鎮果一刻起都會變成士兵。」
森林裡吹起一陣風，樹葉因搖擺而造成沙沙聲。

「換而言之，你既選擇有三個。」三葉舉起右手食指中指無名指三隻手指，然後再用左食指點住右手食指續道：「一、我可以帶你返白石鎮，然後你以士兵身份參與對拳鼠既戰鬥。」




「呢個選擇好似唔錯，就揀呢……」三葉左手舉起魔杖堵住我個口唔比我繼續講。

「繼續聽。」

「係既小姐……」睇黎我條命生得唔好，注定要比女性剋，係現實世界比個妹勞役，黎到異世界都要比人食住。
「第二。」三葉放低魔杖，然後用左手食指指住右手中指續道：「你以一個平民既身份，陪我去搵幫手解決拳鼠。」
就算三葉無扶住，支魔杖都可以牢牢咁企穩。

平時我係屋企拖地果陣，偶然都會就咁將地拖放係地拖桶上面，但係有幾次都會成支地拖跌落地，仲整跌埋個地拖桶搞到成地都係水。
我諗埋晒啲無聊野，就代表我對三葉跟住兩個提議並無興趣。




「你話搵幫手，附近有比白石鎮更強力既……」

「有。」三葉未等我講完已經立即回答，後續道：「非常強力既幫手，而且無手尾，一勞永逸。」
個八婆雖然成日講埋啲令人難以置信既野，但係每次佢都可以將佢既狂言實現。

返村或者跟三葉搵幫手都只係兩個選擇……「咁第三個選擇係乜？」
「第三。」佢指住無名指續道：「同我離開白石鎮，唔好再返去。」

的確，若果我離開的話，白石鎮既事就唔再關我事。
但係要同條八婆一齊上路？

「你唔係話返去探親戚架咩？」

「我改變左主意。」小姐你轉得咁快我跟你唔到架喎！
「咁白石鎮點呀？咁你個親戚點呀？你蒂芬妮亞既朋友點呀？你唔係好有正義感架咩？」





「留返個爛攤子比佢自己解決返亦無不可，好喇，你快啲揀啦。」我真係凳你個親戚可憐！
「我要用50:50！」

「講乜呀你？」三葉一臉不惑。

「系統已經刪去左第三個選擇喇！」自演既野你識條春咩。
我同三葉其實都可以算係9up當呼吸既人，分別係三葉9up得黎係有理據，而我既9up係又無聊又無意義。
咦，我係咪唔小心發現左自己無朋友既原因。
「咁我用問現場觀眾啦。」

「你返到去，你就係一個士兵，軍令如山。佢地唔會當你係人，只會當你係戰爭既機器，有起事想走的話就係違反軍令。」由於香港無義務役，我從來唔知道做軍人要有咁既覺悟。
「若果你跟我去搵幫手，唔使自己郁手之餘，退一步黎講有咩事你都可以自己走佬返白石鎮。」

「你又好似幾有道理。」我向三葉舉起中指以代表我作出既選擇。




＊　＊　＊

良久後，於森林最深處。
四周既樹林非常茂密，樹冠完全將陽光阻擋。

除此之外，於地面上既植物及樹根亦都令到我寸步難行。
雖然三葉整段路程都行得遊刃有餘，但係係我拖累之下令到我地前進既速度大大減慢。
「到喇。」三葉忽然停低。

我望向前方，有一棵比起其他樹樹幹更粗，樹冠更高既巨樹，而巨樹底下有一塊巨石。

雖然巨石為偏平形狀，但亦有一名成年人之高，可以想像到整塊巨石有幾大。
總算係與一路行過黎唔同既景色，但係以我所見並無任何可以稱為「幫手」既事物。

此時三葉舉起魔杖，並且將魔杖上飄浮既寶玉拆落黎遞比我。




「拎實。」三葉吩咐。

佢竟然輕易地將粒價值連城既寶珠就咁比我，一定係有啲咩原因。
「陣間森宿出現之後，你當自己唔存在就得。」三葉搖動手中魔杖，發出清徹既搖鈴聲。

「森宿？即係我地個幫手？」我問。

「唔係。」咁我攀山涉水黎做乜野？「順便一提，森宿對陌生人脾氣唔係幾好。」此時三葉再次搖動魔杖，鈴聲再次響起。
「脾氣唔係幾好？佢脾氣有無技安咁差先？」

「我唔知技安係邊個，但係……」鈴聲三度響起，三葉續道：「但係唔好比藉口森宿殺你。」
喂！咁佢已經唔止係脾氣差咁簡單啦下話？

鈴聲響起三次之後，森林中忽然間吹起一陣清風，樹冠亦因而不斷搖擺。
樹冠上既陽光亦因此穿透一層層既樹葉，零星地照落森林既最底層。





而巨石之上亦被一條光柱照射，但此光柱非常穩定，不受樹葉搖擺影響。
「跪低。」三葉又再下令，考慮到佢口中森宿極差既脾氣之後，我二話不說立即跪低。

我隱若一隻龐然巨物於巨石之上盤坐，於陽光照射之下漸漸浮現。
巨物大概一直都坐係巨石之上一樣，只不過剛才隱形，於陽光照射下先為我肉眼所見。

「吾之脾性並不如你描述般差。」此時，巨物全身已為肉眼所見。

森宿，係一條龍。