廢青於中世紀魔法世界的生存法則: 18, 賭博唔輸既秘訣就係唔好用自己既野做賭注
「唔順超，不如過兩招？」呢句擺到明撩交打既說話係由三葉講。
「喂！」你條八婆係唔係嫌我未夠麻煩？
「哈哈哈哈哈哈哈哈！」森宿既笑聲可稱為恥笑。
「可笑！」我睇得出。「區區凡夫俗子可與吾對抗？你是小看吾身一千八年之閱歷及吾之父母所賦予的力量嗎？」
「不敢⋯⋯⋯」我低聲道，但係聲線完全被三葉蓋過。
「森宿，坐井觀天夜郎自大正是你死症！今日就由我既眷屬同你上一堂！」喂喂，點解會變做咁既展開？
要教訓森宿的話，點解你唔親自郁手？
頭先叫我唔好比機會森宿殺我既係三葉，但同時三番四次辣慶森宿既又係三葉！
媽，我好亂呀！
「呵呵，自恃身份特殊就有恃無恐？」
「我只係想提點下後輩。」提點我？多謝你先喎！
我明喇，其實條八婆一直都想我死，不過自己出唔到手先借力。
「姑且就陪你一玩。」此時四周吹起大風，飄浮住既螢火都因此而搖曳。
「唔止要玩，仲要賭。」三葉再次火上加油。
「呵？」森宿冷笑，然後續道：「此話怎說？」
「若果我既僕人嬴的話，你要奉上森之實……」
「你一開始的目標就是那個吧？區區森之實只要你開聲吾身多少都能給你。」
「且慢，我未講完，我當然知道森之實你唔放在眼內。」三葉舉起手掌示意森宿停止。
「呵？想從吾身身上要森之實以外的東西？那得看你能付出什麼賭注」
明明落去賭既係我，點解談判完全無我份？
「聽講屍體係唔錯既肥料。」咦，你講既屍體應該唔會係……
「這種東西你肯送，吾也不要。」呢個理由會唔會太Hurt我？
「咁你有咩想要自己開聲講。」
「吾身要你。」森宿望住三葉。
Tag：人獸。
原本自信滿滿既三葉聽完之後停一停，然後用認真既態度回答。
「此為僭越之舉，你好大膽。」
「玩不起的話就作罷，森之實吾可送你，今夜休息過後你們就走唄。」
森宿回復盤坐既姿勢。
三葉及森宿兩者之間既對話實在令我聽到一頭霧水，到底兩者既關係如何。
呢個係一個謎！
「好，我接受。」三葉驚人既回答。
大家可能覺得三葉會接受賭注係理所當然，如果唔係邊有花生食。
但係作為當事人黎講，三葉根本無必要下個咁既賭注，反正森之實佢點都會送比我地……雖然我唔知係乜黎。
「喂喂，你是認真的吧？可別反口。」雖然三葉應承，但係森宿都顯得猶豫。
「敗壞家聲之事我先唔會做。」三葉續道：「但係我希望你都付出同樣既覺悟。」
「當然。」森宿此時張開口，一團綠光由其口中吐出。
「這東西如何？」綠光散去後，現於我眼前既係一對翡翠手鐲，至少外表上係。
「總覺得自己蝕左比你……」三葉單手撫臉道。
「那遊戲內容由你們定吧，這樣算公平了吧？」
「好，就咁樣。」
「你真係對我咁有信心？」賭注係自己，但係去賭既玩家係個自己識左兩日都唔夠既人。
你會唔會將自己成副身家比個識左十五分鐘既呀嬸幫你祈福？我就唔會，但顯然三葉睇得少警訊。
「我頭先比你保管果樣野，你記得好好保管。」三葉於我耳邊細聲道，然後再放大聲量拍我膊頭：「你係我優秀既僕人，我對你好有信心！」
總覺得呢場賭博有伏，不過無論點樣中伏既都唔係我，再加上三葉自己都咁樣講咁我就唯有頂硬上。
「賭博的內容是？」
「我頭先講過，森宿你坐井觀天，夜郎自大。」
「先不論此陳述之真實性，你的確講過。」
「我依家就用一塊鏡比你照清楚自己，」三葉指住我：「佢就係你塊鏡。」
「於吾眼中他只是一陀屎。」
「隨你點講，賭博既內容係：雙方要對大家的身份、背景等等有關之事輪流作出陳述，若果錯誤三次的話就為之輸。舉例，只要我話我係女性，咁我既回合就結束，到對方陳述。當然相同既野唔可以重覆陳述，否則立即判一次失誤，除此之外15秒之內講唔出亦都當一次失誤。以上為遊戲第一階段既玩法。」第一階段？莫非仲有第二，第三階段？
「喂，我一……」「伏－－－－－」「ＢＬＥＳＳ ＯＦ ＴＨＥ ＡＲＫ」「兵－！」
「我一開口佢就鞭落黎，我玩碌撚咩？」死人係唔可以作出陳述，到時佢就自動勝利。
「的確，若果有暴力介入的話，咁遊戲規則本身就無晒意義，若果唔係我既介入，呢條渣渣已經死左三次。」我係戰五渣好對唔住。「所以任何暴力行為，均當一次錯誤。」
「點解唔即時取消佢資格？我鄉下興一有暴力行為就紅牌架喎！」
「森宿脾氣唔好，若果一犯錯就罰佢輸的話，就對佢太唔公平。」
「吾情操甚高，豈有脾氣暴燥之事？」你話點就點，我懶得吐槽。
「等等，我地點知對方既陳述係真定假？」
其實有關遊戲內容既問題我仲有好多，不過呢個最關鍵。
「由我來判斷，森宿你無意見？」
三葉將法杖插於地面，原本放寶玉既位置由金色既光球所取替。
「無妨。」森宿回答。
「雖然由我黎講好似唔係幾適合，你唔怕佢偏坦我咩？」我抬頭問森宿。
意外地森宿無用舌鞭回答，佢話：「她不會。」
「無錯，敗壞家聲既野，森宿好清楚我唔會做。」
「既然你無意見就得。」
「遊戲可以開始了吧？」森宿已經一躍躍欲試既樣子。
「等等，比我同我僕人講多兩句先。」
「隨便你。」
三葉於我耳邊低聲道：「森宿雖然唔算非常聰明，但係佢始終生存左千八年，知識方面你無可能超越到佢。所以想嬴，你就一定要利用自己既優勢。」
我既優勢？若果果樣野存在的話我就唔使生活得咁坎坷。
李白話過天生我才必有用，唔好意思呀李生，我既存在已經証明到你錯左。
「就算你向他指出我的弱點也不能改變戰局。」
「森宿你唔好妄自菲薄，你邊到有弱點可言丫。」
「的確。那麼遊戲開始吧。」
「遊戲開始之前使唔使向盟約起誓？」我問。
「我地世界無咁奇怪既設定，拿拿聲開始啦。先攻係森宿。」
遊戲開始！