廢青於中世紀魔法世界的生存法則: 4, 夜深時份於森林玩電話將會有恐怖既事情發生……

係頭先跌入個窿既時侯因為反正都上唔到網所以我熄左機，依家夜闌人靜既時侯我先拎返部電話出黎。
無signal，預左。
22:53。
我跌左入個窿之後已經過左差唔多十二個鐘。

理論上全程都無休息過既我係應該好勊。
但係太陽岩岩先落山，我估計依家大概只係當地時間既七點左右。
平時七點我分分鐘屋企都未返到，你叫我點訓？

所以我依家坐左係「營」既門口外面，一個人睇星星。




「嗥嗚～～～～」忽然傳來狼叫。
叢林既最深處裡面，有好多一點點既黃光。

睇起上黎就好似一對對既眼一樣。
忽然間有人搭我肩頭。

「嘩！！！！！」「嘩！！！！！」

我嚇左一嚇，而對方亦都被我嚇到。
「咳咳……」原來係老野，佢大聲叫完之後上氣唔接下氣。




「長老你搵我乜事？」我拍拍心口。

「咳咳……」老野身體唔好，條氣仲未抖順，剩係不斷做手勢。
佢首先指向叢林外面，然後再揮手撥向屋裡面。

「阿鬼你講中文啦一係。」
「出面好危險快d冷返入屋呀！」

就係下一秒，我既視線已經比一塊金屬阻檔左。
我退後幾步，先見到依塊唔係一塊普通既金屬，而係斧頭既側面。





頭先叢林入面既眼睛慢慢露出其真身，係一堆好似暴力熊既物體。
佢地唔高，應該連一米都無，但係數量好多。
「快逃！」老野大喝一聲，然後用右手輕撫旁邊既樹木。
忽然間前面幾棵樹既根都突左出黎，但係同頭先扎營既時侯唔同。

依家係成棵樹都根都拔晒出地面，好似隻腳咁支牚住棵樹。
如果你有玩魔獸，你應該唔會陌生，而隻棵樹就好似變左做動物咁。

巨樹擺動其樹幹，掃走一堆暴力熊。
「姑媽……」暴力熊發出可愛既慘叫。

令我不禁懷疑，依堆暴力熊係咪真係有害。
「嗖－－－－」一輪箭雨迎我而來，射箭既係遠處另一堆手執弓箭既暴力熊。





正以為我死梗既時侯，另一棵巨樹幫我檔下依一輪箭雨，但係始終檔唔晒，有幾支箭越過樹人既保護。
「你仲企係到做乜？快啲走！」雪菲兒係屋裡面向我伸手，我遞上手之後雪菲兒即刻將我拉入屋裡面。
「長老，小心！」老野忙於指揮樹人無暇回答雪菲兒。

入到屋裡面之後，另一面塊牆成塊跌低，牆外面既係漆黑一片既樹林。
「行！」雪菲兒拖住我隻手，往樹林出發，原來係營入面作燈飾用既鬼火亦都追隨住我地。
「邊到會安全？」我問。

「我唔知，但係樹林係佢地既地頭，係樹林同佢地開戰一定輸硬。」
「既然樹林係佢地地頭點解我地仲要係樹林入面扎營？」

「熊侏本身係性格溫馴既種族。」
我未聽過性格溫馴既人會用武器攻擊人。

「但係佢地對魔法有極大既反應，只要一感受到魔法源就會變得非常有侵略性……正如你頭先所見。」





魔法，成晚用過魔法既人得一個。
「明知係咁老野仲用魔法黎扎營？用正常既方法扎唔得咩？」

「長老頭先用既並唔係魔法，佢只係同樹木溝通，尋求佢地既庇護。」
「咁點解佢地會發晒癲？」

「我都唔知！」
雖然老野召喚樹人，檔住左好多暴力熊，但係我留意到四周既叢林，包括我地前面都有好多一對對既黃光凝視住我地。
RIP。

女都未食主角就要死，糞作，負皮，上一頁。
「汝輩可好？」

「長老！」




老野既聲音透過鬼火傳到我地耳邊。
「於樹精協助下，老身並無大礙，但未得樹林加護之汝輩，留處樹林非上策也！」

翻譯就係老野自己保住自己已經用盡吃奶之力，已經無餘力包護我地兩個細路。
忽然間前方草叢跳出一對暴力熊。
「ＦＩＲＥ　ＢＯＬＴ！」雪菲兒大喊一聲，鬼火立即化身為箭狀衝往兩隻檔路既暴力熊。

「轟……」「姑媽……」兩隻暴力熊應聲倒下。
但係頭先雪菲兒講過，暴力熊係對魔力有好大反應既種族，雪菲兒依家用完魔法，四周既暴力熊反應更加大。
「姑媽……姑媽……」暴力熊既叫聲已經越黎越多，越黎越接近。
下一秒，前方出現既已經唔係兩隻暴力熊，而係總共6隻，分別拎住關刀，長槍，流星鎚

依個時侯我可以做咩呢？
我拎左部電話出黎，即刻想上高登開POST求救……





求鬼咩！字都打唔切啦，何況網都上唔到！
可以點可以點可以點？
我亂咁係電話既桌面到揀唔同既功能，又播歌又開電筒，但係無樣似幫到手。
「死就死啦！」

我打開電話鍵盤功能，輸入999！
只要有任何一間網絡收到，警察都會知道，鄧梓峰你唔會厄我既！
「九……九……九」

忽然間我部電話發出強光，強大既白光令我要閉上雙眼。
有三隻黑色既狗係白光之中跳左出黎，撲向檔路既暴力熊。

暴力熊被黑狗輕鬆解決，然後黑狗仲為我地開路。
我仲未清楚眼前究竟發生緊乜事，而雪菲兒亦都一樣。
「點解你會識魔法？明明你身上面完全無魔法既氣息。」

因為本大爺係童貞魔法師，哈哈哈哈哈！
「咁學術既問題等地安全先再探討得唔得？」我用認真既語氣回答，若果你地唔知道我心裡面諗緊乜，你地都會比我欺騙到！
「嗥－－－－－－－－－－－－」

地面震動既感覺由腳底傳至我腦海，我感受到有龐然巨物正向緊我地移動。
「據樹精回報，附近有龍出末！」老伯多謝你咁有用既情報呀！

你方唔方便教埋我點樣屠龍呀？
「嗥－－－－－－－－－－－－－－」

巨物已經出現係我地面前檔路，我同雪菲兒見狀只有停低，正追擊我地既暴力熊已經將我地兩個重重包圍。
巨物背住月光，佢有肥大既身體同圓型既頭，仲頂住一對圓型既耳朵。

右手仲拎住一支好巨型既狼牙棒。
龍？？我認識既龍係咁樣樣架咩？
但係無可否認，「嗥－－」既叫聲係由佢發出。

「佢係附近熊侏既首領。」
「哦，即係佢唔係龍。」我恍然大悟。

如果係夜晚時間於森林中比一堆想殺你滅口既暴力熊追擊都未算衰的話，比隻加大碼既暴力熊檔路又如何？
如果上述情況都未算最惡劣　－　終極大佬，龍都仲未出現。
究竟我有無命一睹龍既身面目呢？