廢青於中世紀魔法世界的生存法則: 3, 露營時與樹木談心似乎係異世界既新趨勢
「今日到此為止，我輩於此地扎營休息吧。」
「好勊呀～」雪菲兒伸伸懶腰，胸前頂起既兩團根本係引人犯罪。
雖然我心裡面咁諗，但係作為一個資深既高登仔，講就兇狠做就碌撚既原則相信大家都好清楚。
「我想問下，要去到你地既………白石鎮？？到底要行幾耐？」
小弟我唔係好慣行路，屋企落老麥已經係我既極限，落地鐵站咁遠我要坐的士先得。
「哦，依層你唔使擔心，唔係好遠架咋。」雪菲兒回答。
作為一個都市人，我平時放工行15分鐘既路我都會選擇坐丁丁，而我好肯定我今日行左既路係夠我行入新界。
「行多兩日就會到。」「兩日？？廣州都到啦係咪呀？你又話唔遠既？」
「係就係唔遠，但係因為樹林太茂密，我地要繞路先返到去。」鄉下地方唔係城市人咁輕易就生存到。
好彩我落街買老麥只係輕裝上陣唔使著suit，如果唔係就大獲。
話說，我同雪菲兒傾左幾句老野都仲未出聲，究竟係到做緊乜？
回頭望佢，佢竟然用額頭貼住一棵樹，對棵樹低聲細語。
「佢係咪癡線架？」
若果癡線既標準係我，其實佢都唔係好癡線。
你試過同攬枕講野未？你試過同幅海報打茄輪未？如果未既你就無資格自稱癡線！
「癡線？癡線即係咩意思？」雪菲兒用好好奇既眼光望住我。
又到笑談廣東話既時間。
「哦……癡線即係清楚自己做緊乜既意思。」
無錯，每次我同欖枕詳談既時侯我都有個好明確既理想，就係搵出可以讓人類跳入螢幕既方法。
「原來係咁，你講野既方法真係有趣。」雪菲兒又笑左一下，好pure好ture。
嘿嘿，我諗既野仲有趣，你想唔想知呀？
「你聽唔到佢頭先話扎營咩？」雪菲兒續道。
你話佢結紥我反而會信，但係作為禮貌小先鋒，我係唔會咁講出口。
「係呀，但係我地兩手fingfing又無材料既？你唔係諗住依家先種棵樹出黎下話？」
「乜扎營唔係咁架咩？你係咪癡線架？」
「哈哈⋯係呀我係癡線架。」根本無話我係唔係癡線，因為我就係癡線既標準，我就係癡線！。
下一秒老野大喝一聲，大力一拍頭先果棵佢溝左好耐既樹。
唔受溝啫，唔使用劍既，用LV袋咪得囉。
忽然間我腳邊既泥土有野伸出黎，係唔係喪屍？我個Channel呢？
但係覺得唔舒服既只有我一個，老野同雪菲兒都顯得非常自在。
一大團既鬼火一點一點咁聚集係我面前，原來好暗既四周亦都因此而照亮左。
因此，我睇到頭先破土而出既並非喪屍，而係樹木既根莖。
順便一提我平時睇開既動畫入面，通常破土而出既係陰莖。
根莖形成牆壁，頭頂既支葉亦不斷延伸成為上蓋，數秒之後四周異變停止，扎營大工告成。
以「營」黎形容依舊野實在不公，若果香港人係咁樣扎營既，地產商就統治唔到香港。
到時統治香港既就係我依類童貞魔法師，哈哈哈哈哈！！
「大和老師！你好犀利呀！」我不禁拍掌稱讚。
「雕蟲小技，何需掛齒？」嘴裡說不身體卻很誠實，囂你咪認囉。
我地食左簡單既乾糧，係分配食物既時候，老野剩係分左佢同雪菲兒兩份，完全當我無到。
而雪菲兒將一半分左比我，老野見狀又將自己一半既乾糧分比雪菲兒。
「莫非長老你係傲嬌？」
「傲嬌即...？」長老有所疑惑。
「即係學識淵博咁解。」我當然唔會講個真正意思比佢聽。
「嘛，老夫不算十分傲嬌，只算一般傲嬌。」我好努力忍住先無嘔出黎。
聽到我「讚」佢，老野開始滔滔不絕咁講佢自己既威水史。
「嘛……全靠老身，白石鎮方能於十年前之『龍禍』中倖存。」老野手執佢抽好長既鬍鬚沾沾自喜道。
「龍禍？」我低聲問雪菲爾，下依有依類專有名詞可唔可以搵人解釋左先？
「簡單黎講就係龍所造成既災害。」其實單睇字面都大概估到，不過我為左肯定先問。
但係更加重要既事「龍？」
身為一個後生仔，無論日本動漫，又或者去到歐美劇集，龍都唔係一個陌生既存在。
首先有龍珠入面要用七粒正皮先召喚到既神龍，歐美權力遊戲入面亦都不缺龍既存在。
就算講返中國都有東海龍王，龍王三太子等等既角色。
但係我一次都未見過實物既龍。
依家你同我講其實龍真係存在既話，我不如相信埋世界上面有聖誕老人好過，不過個人黎講我更想要一個會係聖誕夜果陣偷偷地闖入你屋企，然後仲唔小心跌暈左既金髮少女。
若果你知道我講緊乜野的話，我地會係好朋友，好兄弟！
「點樣形容好呢，龍係一種識飛既生物，有對好大既翅膀，有四隻腳，有條好長既尾……」
點樣形容好呢？港女係一種識火星文既生物，有對好平既乳房，有大眼仔，有條好長既腿……
「等等。」其實對一條龍係點既樣我都知道大概。
「其實我故鄉都有好多關於龍既傳說，但係……傳說就只係傳說，龍依樣野根本無存在過。」無錯，龍就好似又大波又長腿又索又pink既囡囡一樣，只係傳說入面出現。
就算有都輪唔到我溝。
同一時間老野依然滔滔不絕咁講緊自己既威水史，但係無人得閒理佢。
「龍既傳說我地都有好多，但係龍係實實在在既存在。」
咁又係，鯨魚都識飛，點解我要咁糾結龍存唔存在依一點。
「雖然我唔算好傲嬌，但係我都會將我所知道既傳說講比你聽，如果你有興趣的話。」
「即管聽下。」平時都無乜機會同囡囡傾計，依家難得有囡囡主動撩我講野，無理由拒絕。
「傳說中，世界係由兩條古龍所創造，『提默』同『亞祖』。」
Teemo同呀Joe，ok。
「依一對古龍開始繁衍，而佢地既子女又繼續繁衍，自此世界就變成龍既世界。」
Tag：亂倫
「即係，龍係你地既眼中係神一樣既存在？」
「神？乜野係神？」我頗為意外，佢地竟然無神既概念。
我頓時語塞，解釋癡線或者解釋傲嬌都無為我帶黎奇怪既感覺。
但係「神」一個咁基本既概念都要解釋？就好似要我同幼稚園既正太蘿莉解釋乜野係太陽，乜野係月亮一樣。
「神……即係創造萬物，無所不知，無所不能，至高無上既存在？？」講到最尾我自己都有所懷疑。
唔係因為「神可唔可以創造一舊自己舉唔起既石頭」之類既邏輯悖論而懷疑，而係同龍一樣，我亦無見過神，但係相比之下我竟然傾向相信神既存在。
利申，非耶撚，小弟為無神論者。
但矛盾既地方係，小弟雖然係無神論者但竟然相信冥冥中有「主宰」既存在。
除此之外，我仲好清楚「主宰」極之討厭我。
「的而且確，提默同亞祖創造左世界，而且傳說亦都記載左好多關於佢既事績。」單係咁已經足以被稱為神，反正神依個字眼已經比我地用到爛。
「但係至高無上？我地又未必有咁既睇法。係我地既眼中，龍係創造左世界，而我地亦都生存係龍所創造既世界。我地一直同龍共存，雖然偶有磨擦，但係一般都唔會干預對方，至少我地人類無力干預龍族。」雪菲兒回答。
「磨擦？」係高登神探學院訓練左咁耐，小弟磨擦力可以，即刻就留意到磨擦依個字眼一定唔係好野。
「雖然話係磨擦，但係我諗你都好清楚人類根本唔可以威脅到龍。」雪菲兒尷尬地笑，後道：「磨擦係美化左既字眼，更多人用既形容詞係龍禍。」
原來係咁。
「即係你有個偶然飲醉左會打你鬧你既老豆，但係另一方面佢由出錢養你比屋你住，你雖然唔想比佢恰，但另一方面確確實實受緊佢恩惠唔想佢死……咁樣樣？」我問。
雪菲爾稍稍愕然左一下，然後回答：「真係失禮既比喻。」
「但係又無可挑剔。」佢望向遠方，語重深長咁講。
忽然燈光轉暗，老野已經坐左係床上面。
「天色已晚老夫先行就寢。」睇黎佢已經講完自己既威水史。