廢青於中世紀魔法世界的生存法則: 75, 睇清楚條款先簽約可以避免好多麻煩

係森宿地頭到閒聊完再醫埋肚已經係朝早，我馬上騎車直奔回家，然後就躂落大床。

順帶一提，醫肚既方法係三葉提我用魔法創造左幾種生果出黎，點解你咁醒唔一早提我？
離既既時侯走到半路三葉自己跳左落車，我無問到佢原因，當佢臨走果陣同森宿要左粒森之實既時侯，答案已經非常明顯。
於我於大床上再開眼既時間係黃昏，好彩無訓過龍，唔係又要食生果。
中間刷牙洗臉沖涼換衫行路既瑣事我就唔再花篇幅講（已經講左好多），總而言之此刻已經係黃昏時間，而我正身處於大草地。

琴日都批死過呢班村姑大叔平日無乜娛樂，白石鎮管理層就同山本大介一樣，郁啲就搵籍口搞活動。
Incase你唔記得，今日活動既理由就係救回菲兒祝捷會暨蘭卡特歡送會，活動內容係派十粒魔法石，挑戰地城，而神up……
「你蹹乜呀？」





「周圍咁多人，氣氛咁好講多兩句都唔得咩？」
白石聖堂附近所有建築既燈光全部熄滅，但大草地既中央架起巨型營火，雖然照明略有不足但氣氛幾好；而係大草地既邊緣位置就有唔同既店鋪出黎擺檔，順帶一提因為WW既活躍表現，管理層特別比左個最好既位置將軍，此刻佢地既檔口已經開始有人龍。
而村入面既年輕死現充都一對一對咁走埋去營火前面跳舞。
「爆炸啦死現充！」作為一個毒撚，我做返一個毒撚會做既野，就係詛咒班死現充，我祝你地下年可以過父親節同母親節呀！
「彭－－－－－－－」

忽然營火大爆一聲，原本跳緊舞既男女都立即尖叫走避，而所有人既視線都被吸引過去，而仲有意識既守衛都進入戒備狀態。
然後一個身影由營火裡面爬出黎……
「我無事。」他如此說道。





「千祈唔好同人講我有個咁既呀哥……」三葉掩臉道。
都鐸既上身衣服又被燒成灰……

而如此赤裸上身既都鐸就走去菲兒旁邊邀請佢跳舞。
理論上呢個情節係好應該有童話故事Feel，但係我完全感覺唔到任何浪漫既元素，要吐槽既地方實在太多。
「覺唔覺營火果面好殘眼？」

回頭一望，三葉竟然走左去排檔攤……
毒撚命中注定係孤獨一人。




「嘉穎哥哥。」可以拯救毒撚既果然只有蘿莉。

我回頭一望，原來係謝絲妹妹。
假若你唔記得左謝絲係邊位的話，佢係菲兒既學生，亦都係將軍既寶貝女。

「謝絲妹妹，你係到做………」一隻鑊剷於我眼前飛過。
「邊個夠膽撩我個女？？」

將軍從攤位中使用縮土，轉眼間已經出現響我面前，而WW成條隊就將視線轉移於我身上。
我唔係拐走蘿莉既怪叔叔，千祈唔好誤會！
係將軍準備叉頸吊起我黎進行宮刑既時侯，我及時講左句：「係我呀！」

「仲以為邊個行跡咁可疑，原來係嘉穎。」
我只係好有禮貌咁同你個女講左八個字，乜動作都未做！





呢啲對個女過份保護同愛惜既老豆往往就係被處於青春期既女兒所討厭果一種。
你個女過多幾年就過期，好好享受埋呢一段日子啦，嘿……
「將軍，我有一個請求……」

「係喇，嘉穎……」
我因為雙方同時說話既突兀而停頓左一下，但係將軍既反應就激烈好多。

簡單黎講就係叉住我條頸。
「我唔會嫁個女比你！」

「放……放手先………」
「後生仔唔好意思，呵呵呵～」將軍意識到自己既失態之後立即放手。

每個男人都總有啲會打開佢地癡線開關既野，都鐸既開關係菲兒，將軍既開關係個女，而我既開關係乜野？蘭卡特既開關又係乜野？
「你有咩請求即管開聲，睇下我地幫唔幫到你。」救完菲兒之後，我同WW之間既好感度都上升左唔少。





「但係你敢打我個女主意的話，我一定唔會放過你。」但係條好感度計仲要有排儲先可以娶到將軍個女，雖然我totally no mood to 娶佢個女lor。
到我儲完條Bar果陣佢個女分分鐘已經長大成人，到時我都已經唔會再有興趣，佮！
謝絲妹妹被將軍拖住，一路聽緊我地之間既對話，我都幾肯定佢係聽唔明，若果佢聽得明一半的話一定唔會笑得咁從容……呢份父愛真係沉重，可謂父愛如山……
「經過前晚一役，我發覺靠自己既三腳貓功夫好難行走江湖，希望將軍大大你能高抬舉手教小弟一招半式旁身救下命……」

「得得得，後生仔你起身再講。」原來我講下講下不自覺跪左係到。
「你唔應承我我就唔起！」嘩，呢句假撚到仆街，咁都講得出既你！

「芝麻小事，包係我身上。」將軍用無拖住個女果隻手拍拍胸心，而我亦都企返起身。
「但係有一個條件……」

弊，中伏！