廢青於中世紀魔法世界的生存法則: 74, 電話簿裡面總有幾個不明來歷既聯絡人
「怎麼了？最近變了夜行生物？」
「哈哈哈。」三葉用電子詞典既語氣讀出哈哈哈三字，然後續道：「呢條友訓醒教無野食先諗起你。」
我屌！八婆你靠害！
森宿望向我問道：「臭小子可有此事？」
原本已經跪緊既我立即回答：「梗係唔係啦！只係琴晚幸得森宿大大出手相助，今日先特意黎多謝你！」
「又關森宿事？」係喎，三葉未知道琴晚方丈既介入。
於事我又將事情簡單地講左一次，而森宿亦得悉我知道左三葉兄妹既身份。
「你既魔具竟然可以將現場既風景展現比森宿睇……」
「我仲意外過你。」至於原理我就懶得問，原因好簡單，森宿係龍。
龍、直覺、土地問題，有呢三者的話呢個世界唔再需要邏輯！
「既然影像能傳送，聲音應該也能傳送……」
森宿你簡直係邏輯大師！
雖然琴晚可以成功同森宿對話，但係比喻黎講就係森宿用閉路電視睇住我同聽到我講野，然後再用廣播器同我對話。
即係所有器材都係由森宿提供，完全唔關我電話事。
「睇黎只係差一個連結。」三葉道。
「有道理。」森宿回答。
係囉係囉，講得幾好呀。
得你兩個自己明既你地自己傾咪得囉！
「臭小子，魔具及森之鐲。」
我照方丈既意思分別用兩隻手舉起呢兩樣野。
「三葉，幫個忙。」
「嘉穎，龍玉。」龍玉？應該係講緊粒寶玉？
原來呢粒野叫做龍玉，下次拎黎整把雌火龍片手劍先！
丫係喎，原來我仲未有武器。
我將龍玉拋往三葉，佢舉起土豪杖之後龍玉就好似比磁力牽引住咁自己走去法杖頂端既位置。
然後金黃色既巨大魔法陣又架起，電話又森之鐲亦因此浮於半空中。
我屌，又黎？
「Ｄｅｓｔｉｎｙ Ｂｏｎｄ！」
但今次被綁上黃絲帶既並唔係我，而係我部電話同森之鐲。
呢招竟然用係死物上面都得……這是什麼巫術？
係黃絲帶消散之後，森宿於巨石上站立，然後舉起右掌，與此同時森之鐲及埃瘋被一團微綠色既能量包圍住。
咦？今次唔唸詩拿？
一輪特效之後，綠光消散，我走埋去拎返兩樣道具。
「睇下有乜變化。」三葉即刻落柯打。
我打開部電話，第一樣發現既就係頭先call電單車本應該消耗左既電力已經恢復晒。
除此之外就無乜特別，依然無signal、依然無wifi。
然後我抱住絕望既心情禁入電話簿，竟然有料到！
我第一眼就睇到老豆、老母同老妹呢三個聯絡人下面竟然有一個亂碼聯絡人！
無可能，我既電話簿無可能有屋企人以外既聯絡人！
「怎麼了？」森宿問道。
然後我就點選左呢個亂碼聯絡人，電話立即撥號……
你所打既電話號碼暫時未能接通………就有鬼。
「怎麼了？」森宿再問。
「怎麼了？」而電話聽筒另一邊亦都傳來森宿既聲音。
「得左……」我低聲自語。
「呵呵，不出吾所料。」照計我咁細聲佢無可能聽到，而佢依家聽到。
即係真係得左。
好喇，以後我可以打電話比森宿………但係咁又有乜用？
「小伙子，你記得昨夜我提及我曾聽說過這魔具嗎？」
「又好似有，你係你老……」我忽然醒起粒龍玉已經比三葉收返，於事用過第個字眼：「閣下的父親、尊敬的領導嶽砶大人口中聽講過？」
「矣～」三葉表示好奇，於事我又問佢：「你同你二哥熟唔熟？」
「我出世既時侯二哥已經係碎片，但……」
「哈哈，三葉於我眼中只是個乳臭未乾的小女孩。」森宿插嘴。
「但係論輩份我係你姑姑。」少女以輩份作理據還擊。
「年齡差太遠，很難有這種感覺。對吧，三葉姑姑？」
「等等……可唔可以唔好加呢個稱謂？」
「怎麼了姑姑？」
「停……」
「姑姑，可唔可以入返正題？」我問。
「In the origin of the universe……」
「投降！投降！」
對咩種族既女性黎講，年齡都係好候感。
「印像中家父曾經提過類似的魔具，不過那至少是千六年前的事。」
「類似既魔具？有幾類似？」
「詳細外觀我不清楚，畢竟我沒有看過實物，但大少、顏色及形狀也是與嘉穎的魔具相似。」
「唔會係另一部電話掛………」
森宿及三葉立即意識到呢句話背後既意義，而互相望左一眼。
「小伙子，你知道把你帶進這個世界的是什麼東西吧？」
「幻獸無比敵？」被遺忘既關鍵字再次出現。
「無錯，但對無比敵你又有多少了解？」
無比敵係一隻識飛既白色鯨魚，可以引導異世界既生物黎到嶽砶之上……
但係除此之外我一無所知，故事發展到呢到，多數都只係提到佢個名，同埋佢來去無踪呢個習性……
「喂，小龍女，你知唔知？」
聽到新稱呼之後，三葉如臨大敵一樣：「莫非你係叫緊我？」
「仲有邊個可以係小龍女？」
「莫名奇妙既稱謂……」三葉似乎對呢個稱呼無咁反感……當然若果佢睇過神雕俠侶的話就唔會咁。
「以我既角度黎睇，無比敵就好似係我既……叔叔、姨姨？」
「即係無比敵係創世古龍既兄弟姊妹？」
「非也非也，無比敵並非龍族；不過早於古龍創世時無比敵已經存在。」結果係由森宿搶答返。
然後小龍女同方丈輪流地用世界觀黎轟炸我，為免大家造成資訊疲勞，結合所有有關無比敵之資料TL: DR版本如下：
一、以整個世界黎考慮的話，異鄉人並不罕見（資料來源：伯雷）；
二、被傳送黎既物種唔一定係人類（資料來源：伯雷）；
三、被傳送黎既人類唔一定識講中文（資料來源：伯雷）；
四、無比敵非龍族；
五、無比敵屬於龍族之外之力量體系，即使提默亞祖直系子女亦對無比敵存有敬意；
而六可以話係最重要一項………
「你有無諗過二哥口中既魔具係來自你所屬既世界？」
「……………」我無諗過，但依家三葉一講不無道理。
「來自同一個世界既異鄉人可有先例？」我問。
「不可能吧。」森宿率先回答。
「概率上係無可能，我曾經聽講過異世界數量之多有如天上之星。」
「或者係有如森宿既兄弟姊妹數量？」
「啪－－－－－－－－－－」
森宿既大舌頭重擊我旁邊既地面。
「抱歉，一時控制不了自己的情緒。」
起碼佢識講對唔住，已經有進步！
「若果你唔想成個森林變成火海的話，勸你唔好亂黎。」
「控制情緒還真不容易。」森宿竟然直接就承認自己EQ低？明明上次唔係咁！
「EQ低既並唔係得你一個……」只要一牽涉到菲兒，都鐸既EQ數值前面就會立即加個負號。
係話題扯開之前三葉立即將話題帶回：「雖然概率上黎講係好難，實際上並唔係無可能。」
「無限隻馬騮、無限時間、莎士比亞？」若果你唔知我講乜的話請自己Google。
「你講乜？」Google啦八婆！
六、雖然概率極低，但異世界連接嶽砶既次數似乎無限制。
「有關魔具又好、無比敵又好，不是有個人會最清楚嗎？」
「阿。」小龍女好似忽然醒起啲野一樣。
「呢個人係咪即係可能知道點帶我返香港果位？」
「正是。」