廢青於中世紀魔法世界的生存法則: 76, 恃住有少少醉意而亂咁講野既人正仆街
「各位，今夜乃慶祝菲兒平安回歸及歡送蘭卡特之慶………」
「咪講咁多喇，飲杯！」「好！」
唔知邊位青年學者竟然咁大膽截停老野，一睇就知佢未飲先醉。
但係老野一開聲講的話又會係長篇大論，所以包括伊曼在內既其餘學者都馬上以好回應。
「嘉穎弟弟，做乜唔飲？」此刻我正正係埋左呢班學者堆，同動漫界學者一般既sterotype相反，呢班學者又無戴眼鏡、又無書卷氣，而且仲無酒不歡……
同香港既一般大學生真係類似。
「我唔係好慣飲酒……」我係一個滴酒不沾既毒撚，估唔到去左第二個世界都要面對呢種個個都飲但係我唔飲既尷尬………
咦唔係喎，係香港我根本唔會有個個都飲而我唔飲既尷尬。
因為根本無會同我一齊出去飲酒既人。
「飲飲下就慣，黎！」伊曼將一杯酒遞比我。
「飲！飲！飲！飲！」而佢班下屬立即就和應……上樑不正下樑歪。
就係群眾壓力既影響之下，我飲左一少杯，然後所有大學生就拍晒手叫好。
「好！飲多杯！」
「唔好喇……我陣間要渣車……」我舉手阻止。
「各位，不如等我地既英雄出黎講兩句好無？」
「好！」啪啪啪啪啪。
係其他人眼中我地係擊退左一條龍既英雄。
而實際上就真係得啖笑，身邊既學者都想推我出去，但係係我被出賣之前，三葉已率先被WW班人出賣。
原來佢埋左WW堆，我仲以為佢走左添。
「唉…」三葉先係一聲代表放棄掙扎既嘆氣，完全無英雄既氣牆，連佢平時都不如。
佢呢兩日的確係有啲怪怪地，上次本身話有野想傾最後都無左件事。
「既然大家咁想聽我講野我就講兩句敷衍下大家。」喂！雖然大家都知呢個場合多數都係交行貨了事就算，但你唔使講到出面下話？
「首先，呢條村變成點我根本唔在意。」
「…………」全場靜晒。
「若果唔係有酬勞的話我根本唔會做。」
呢句係大話，人類社會既財產對佢黎講只係幻影。
以佢咁高位既存在，佢行動既動機一定唔會係咁簡單。
但係其他人並唔會明白，此刻係一般村民眼中三葉只係一個傭兵。
「你地覺得我好現實？斤斤計較？」
村民開始議論氣氛，和諧既節日氣氛亦都急速轉變。
「『受人恩惠者亦必需施惠』你地既信仰好似係咁？」
三葉開始觸及非常危險既話題……
「睇黎三葉小姐已經飲醉，等佢清醒既時侯再……」伯雷主教立即出黎打圓場。
「我無醉！」三葉大喝。
肯定醉左。
雖然平時佢都係癡癡線線，但係癡線得黎佢會保住果種貴族氣質。
都鐸你個妹準備出醜喇，仲唔帶走佢？
「呢種信念聽起上黎好似好無私，實際上所有施惠既人都期望有回報，你地只係用宗教包裝左！」
同上次係WW一樣，大部份人都一時被三葉既說話搞到好迷惘，從表情睇得出好多人聽完之後都好唔高興，但係無人願意企出黎同佢理論。
可能係因為潛意識中覺得少女並不無道理。
而我係香港呢個咁現實既社會長大，一早就清楚世上係無免費既午餐，即使係被歌頌為無私既父愛同母愛背後都係有代價，其名為孝順。
至少我屋企係咁。
對於三葉所講既野我並唔反對，我真正關注既係點解佢要係呢個時間呢個地點係咁多人面前講返咁既說話。
不過醉左既人係無邏輯可言。
「各位年青人，我勸你地拋開呢個束縛，趁仲後生自私一下做自己想做既野！」
好撚肉麻。類似既野我已經聽到厭。
唔係我地唔想做，只係我搵唔到自己想做既事，就算搵到都唔知可以點做。
「白石鎮既野你識條春咩！你黎左一個星期咋！」
「唔好以為自己立左次功就乜都講得，你估你爭啲炸左條村單野會無人記得？」
都唔使等伯雷自己出聲，已經有一班狂熱教徒衝出黎指住三葉個鼻黎鬧。
呢個情況似曾相識，上次既結果係令到一眾熱血青年啞口無言。
但今次似乎無咁簡單，三葉並唔清醒。
「哈哈！白石鎮既野我識條春？真正乜春都唔知既係你地！」
喂喂，都鐸你真係唔出手？
我視線不斷於人群中游走，想睇下佢去左邊到……原來坐左係一個小火堆旁邊同菲兒咬耳仔，睇個勢係完全無理過佢個妹。
你兩個咁疏遠既？
係我注意力被分散既短短數十秒，現場已經便成三葉以一敵眾既對罵情況；
上次佢係以理服人，但眼前所見佢只係靠大聲……
「開口埋口都係教義，你知唔知你地地既教宗係公……嗚嗚……」
「唔好開口埋口都話人地係公廁得唔得呀你，積下口德……」
既然佢呀哥唔理，唯有我硬住頭皮上去理。
我一手從後撓住佢條腰，而另一手掩住佢把口，然後大聲說道：「我諗佢有啲醉喇，唔好意思，唔好意思……」
點解我要幫佢道歉？
點解我要拎起呢個責任？
班鼓燥既熱血青年見狀亦無再追罵，但係現場遺下既氣氛非常微妙，總之原本既節日氣氛已經無晒。
就好似一對新人結婚既時侯，女方既老母大鬧婚宴嫌禮金唔夠，就算個老母比人夾走左，現場既氣氛都會非常尷尬。
「估唔到三葉小姐咁投入，咁快就飲到醉晒……」伯雷又適當地打圓場。
換轉係其他人講頭果番說話，伯雷或者老長一早就會下令抬走佢；但係此刻佢兩個仲係有求於三葉，所以先不致於咁樣。
「咁好既氣氛唔好比佢停……」唔好意思，已經停左。「不如我地請另一位英雄同埋菲兒出黎講兩句好唔好？」
見過鬼你仲唔怕黑？