千禧港女神探（一）春風化雨殺人事件: 第卅七話　原形畢露

第卅七話　原形畢露

葉雨晴說：「呢個問題已經解決，高Sir請你拎出來。」

高子峰掀起長褲的褲管，在長襪的小腿內側中取出「天下第一劍」，交給葉雨晴。

葉雨晴說：「呢把就係同兇器一樣，六寸長嘅『天下第一劍』。

你就係呢個方法，將把預先搽咗毒液嘅劍順利咁帶返學。」





謝隆恩說：「咪玩啦！擺把咁長嘅劍係長襪入面，會好難行，點會無人睇得出？」

葉雨晴說：「無錯，換轉係其他人，行路一定會好礙眼，但係你一向都係論論盡盡，

仲有你條褲咁闊，根本無人會懷疑你長襪入面會有把劍，你正係將自己嘅弱勢變成優勢。」

謝隆恩說：「就算妳講得通，都只係妳嘅推理，有實質證據咩？把劍上面有我嘅指紋咩？」

葉雨晴說：「你行動咁小心，拎起把劍嗰陣，一定會用紙巾包住，唔會留低指紋。」





謝隆恩說：「香港講法律，法律講證據，無證據就算妳推理正確都無用。」

葉雨晴說：「可惜，唔理做事幾小心嘅人，都總會犯錯，你無留低指紋，唔代表無留低證據。」

謝隆恩說：「咁究竟係乜嘢證據？妳即管拎出來睇吓！」

葉雨晴說：「你放把劍落長襪入面成個上晝，腳一定會出汗，劍鞘上面有你嘅汗，

而好不幸，你仲有一條腳毛黐住劍鞘，汗同腳毛都有你嘅DNA。」





趙芷芳聽見「腳毛」時，有點疑惑，葉雨晴向她點頭示意，她馬上會意過來。

趙芷芳說：「只要化驗報告一出，你就無得抵賴。你都係自首，我可以幫你向法官求情。」

謝隆恩說：「咩話？汗⋯⋯腳毛⋯⋯估唔到⋯⋯我仲以為⋯⋯只有指紋⋯⋯」

謝隆恩剛才的自信開始動搖，知道自己百密一疏，難以自圓其說。

文麗卿說：「我依家嘅素顏俾大家睇曬，你滿意啦！嗰次實驗室意外我好抱歉⋯⋯」

謝隆恩說：「嗰次唔係意外，我之前一早都同妳講咗化學實驗室儀器太舊，

係時間要換新嘅儀器，而妳一味同我講學校無budget，要等下一年先至有得換。」

文麗卿說：「無錯，我承認係我疏忽，你向我一個人報仇就夠，點解要害咁多人？」





謝隆恩說：「因為其他人對Tina嘅傷害，遠遠比毀容更深，有四條仆街輪姦咗佢。」

文麗卿說：「你話Tina俾四個人輪姦？咁難怪佢會自殺！究竟件事係點㗎？」

去年，大家還是4A班的時候，一眾男同學已經將葉雨虹奉為學霸女神。

麥劍蘭即使再勤奮，亦只是全班第二，再加上肥胖及滿臉暗瘡，男同學根本不當她是女同學。

然而，有一人沒有被她的外表嚇怕，反而欣賞她的勤奮與毅力，在逆境中自強。

此人就是同樣肥胖，同樣滿臉暗瘡的謝隆恩，他覺得自己跟麥劍蘭很匹配。

謝隆恩時不時都借故接近麥劍蘭，企圖拉近兩人的距離，而每次都得到相同的結果。





麥劍蘭說：「彈開啦！死肥仔！」

即使麥劍蘭不是男同學心目中的白雪公主，她也跟其他少女一樣，期望愛護自己的是白馬王子。

對於外表不濟，成績又比自己差的謝隆恩，當然是不屑一顧。

在4A班中，比較接近白馬王子的只有三人，就是古偉達、黃傳聲和黎國光。

眾所周知，古偉達好勇鬥狠，仇家眾多，而黎國光一早已經對葉雨虹傾心。

餘下的就只有高大英俊，風趣幽默，而且有點家底的黃傳聲，麥劍蘭逐漸對他芳心暗許。

就在下學期，某天午飯時間，謝隆恩聽到4A班課室中，有四人正在高談闊論。

古偉達說：「Winson最近又食開邊條女呀？」





黃傳聲說：「第二間中學㗎！講你都唔識啦！」

張宇傑說：「依家班裏面個個男仔都想溝Rainbow，你有無把握？」

黃傳聲說：「呢種女仔咁多人溝，一定會吊高來賣，曬時間，溝唔過。」

徐梓俊說：「咁乜嘢女仔先至溝得過呀？」

黃傳聲說：「我溝女只有一個原則，就係重量唔重質，食得唔好嘥，同埋中出即飛。」

古偉達說：「係咪真係乜嘢女仔都食得落先？」

黃傳聲說：「無錯，只要唔係男仔就得，乜嘢女仔我都食得落。」





張宇傑說：「就算係豬扒都一樣照啃？」

黃傳聲說：「無問題，豬扒都係肉，總好過自瀆。熄咗燈就係靚女，都係入同一個窿。」

徐梓俊說：「咁我哋班嘅Tina又點睇，咁極品我唔信你啃得落。」

黃傳聲說：「唔信？敢唔敢輸賭？」

古偉達說：「Tina咁極品，俾我就啃唔落，我賭一皮，你啃唔落。」