千禧港女神探（一）春風化雨殺人事件: 第卅六話　兇手出現

第卅六話　兇手出現

謝隆恩為各位賓客準備茶點和飲品，何四悅前來拿飲品。

謝隆恩就拿了幾杯飲品，連托盤遞給何四悅。

何四悅說：「你俾咁多杯我做乜嘢？」

謝隆恩說：「咪咁自私啦！招呼吓人啦！」





何四悅說：「咁又係嘅！好啦！」

何四悅先行拿起一杯可樂，餘下的就遞給5A班其他人。

葉雨虹拿了雪碧，林嘉慧拿了忌廉，餘下一杯微黃色的，似是西柚汁。

何四悅走到文麗卿面前，她就不好意思不拿了。

就在文麗卿即將飲下時，葉雨晴大叫：「唔好飲呀！」





禮堂一眾賓客停下來，望向禮堂入口的葉雨晴，可是沒有人知道她叫誰人不要喝。

葉雨晴就向文麗卿的方向衝過去，突然腳下好像被甚麼絆倒似的。

葉雨晴向前衝過去，文麗卿閃避不及，剛好被撞中前臂。

手中拿着的「西柚汁」向着自己的臉部傾瀉而出，文麗卿的妝容開始溶化。

葉雨晴說：「呢啲係⋯⋯唔通係鏹水？」





於是，葉雨晴連忙拿起樽裝水向文麗卿的臉部潑過去，希望可以將「鏹水」稀釋。

然而，文麗卿的妝容繼續溶化，卻沒有半點燒燙刺痛的感覺。

葉雨晴說：「Miss Man妳無事丫嘛？使唔使送妳入醫院？」

文麗卿說：「唔使，呢啲應該唔係鏹水。」

葉雨晴說：「唔係鏹水點解妳塊面會係咁溶？」

文麗卿說：「呢陣味⋯⋯應該係卸妝液。」

雖然只是卸妝液，但是都足夠令文麗卿面目全非，眼耳口鼻的輪廓頓時消失。

葉雨晴說：「妳無事就好喇！頭先係邊個伸隻腳出來kick我？」





5A班眾人一致指向同一人，就是負責各項雜務的謝隆恩。

謝隆恩說：「頭先係我唔覺意伸咗隻腳出來，kick到妳真係唔好意思。」

這時，在暗處埋伏的高子峰拿着攝錄機走出來，趙芷芳亦在禮堂入口進來。

高子峰說：「謝隆恩，頭先妳將卸妝液加入飲品，以為自己用龐大身形遮住就無人睇到，

點知我喺另一角度拍得一清二楚。點解你要咁樣做？」

謝隆恩說：「係我做又點？平時Miss Man成日化到個妝咁濃，想睇吓佢無化妝嘅真面目姐。」

葉雨晴說：「你咁樣做同令Miss Man毀容有乜嘢分別？」





謝隆恩說：「分別好大，真係毀容就算植皮都變唔返以前個樣，卸妝之後可以再補妝，

可以變返原本個樣。更何況就算Miss Man飲咗卸妝液落肚，都唔會有乜嘢事。」

葉雨晴說：「妳果然係Tina嘅守護天使，要為被毀容嘅Tina報仇。」

謝隆恩說：「乜嘢守護天使？乜嘢報仇？我都唔知妳講乜嘢！」

趙芷芳說：「謝隆恩你就係一連串殺人兇案嘅幕後主謀，古偉達同黃傳聲嘅死都係你一手策劃。」

謝隆恩說：「Madam妳仲要拉錯幾多次人？之前三個入到罪未呀？」

《暗報》、《香島日報》，還有其他報紙的學術版記者知道事態嚴重，連忙召喚突發新聞的同事。

趙芷芳說：「今次絕對唔會有錯，被你控制嘅兩個同謀已經轉做污點證人，同警方合作。」





謝隆恩說：「妳大我咩？乜嘢殺人？乜嘢同謀呀？唔好噏得出就噏喎！」

葉雨晴說：「今次我哋有確鑿證據，唔到你抵賴。」

徐梓俊說：「你就係一直利用我哋嘅痛腳控制我同Kenneth，迫我哋幫你去殺Victor同Winson，

再將殺人罪名嫁禍俾Edward，因為佢都有份令Tina毀容。」

張宇傑說：「嗰日就係你迫我喺Victor個紙杯落瀉藥，令佢要衝出去四樓男廁。」

徐梓俊說：「亦係你迫我喺粒車厘子落毒，令Victor中毒而死。」

張宇傑說：「你仲迫我擺兇器喺Edward外套嘅袋，令佢可以令Winson中毒而死。





嗰日我下晝食飯之後最早返入5A班課室，就發現自己個櫃桶入面有兇器。」

徐梓俊說：「有時間喺食飯時間放兇器入Kenneth櫃桶嘅，就只有放食飯嗰陣最遲走嘅你。」

謝隆恩說：「咁我行路論盡嘛！不嬲都係最遲走，咁就話係我？仲有你講嘅兇器係乜嘢？」

葉雨晴說：「係一把六寸長嘅『天下第一劍』，香港漫畫《風雲天下》入面嗰把。」

謝隆恩說：「六寸長嘅劍要帶返學只可以放落書包，但係嗰日上晝搜過書包，無發現刀劍之類。」